ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)ގެ އަމިއްލަ ވޯކްޝޮޕް، ސްޓެވޯއިން އެސެމްބަލްކުރާ ސްޓެވޯ ބްރޭންޑުގެ ޖަނަރޭޓަރުތަކުގެ އާމޮޑެލްއެއް އެސެމްބަލްކޮށް، ބާޒާރަށް ނެރެން ތައްޔާރުވެއްޖެއެވެ.

ސްޓެވޯއިން އެސްޓީޑަބްލިޔުގެ ތިން މޮޑެލްއެއްގެ ޖަނަރޭޓަރު ސެޓް ރާއްޖޭގެ ބާޒާރަށް ވަނީ ތައާރަފުކޮށްފައެވެ. އެއީ STW300،  STW600 އަދި STW800 އެވެ.

ސްޓެލްކޯއިން މިއަދު ބުނީ، ސްޓެވޯ ބްރޭންޑްގެ STW500 މޮޑެލްގެ ފުރަތަމަ ޖަނަރޭޓަރުގެ ލޯޑް އަދި ފަންކްޝަން ޓެސްޓް ހަދައި ނިމި، މިހާރު ވ. ތިނަދޫއަށް ފޮނުވާލުމަށްޓަކައި ތައްޔާރު ކުރެވިފައިވާ ކަމަށެވެ.

އަދި މި މޮޑެލްއާއެކު މިހާރު ޖުމުލަ ހަތަރު މޮޑެލްގެ ޖަނަރޭޓަރު އެސެމްބަލް ކުރެވިފައިވާ ކަމަށް ބުންޏެވެ.

ސްޓެލްކޯގެ ވޯކްޝޮޕުން އެސެމްބަލް ކުރާ ޖަނަރޭޓަރު ސެޓުތަކަށް އޯޑަރު ދިނުމުގެ ފުރުސަތު ހުޅުވާލާފައިވާ އިރު، ކޮންމެ ޖަނަރޭޓަރު ސެޓަކަަށް ވެސް ލޯކަލް ވޮރަންޓީއާއި އާފްޓާ ސޭލްސް ސާވިސްގެ އިތުރުން ކަސްޓަަމަރުން ބޭނުންވެއްޖެ ހިނދެއްގައި އިންސްޓޯލް ކޮށްދިނުމުގެ ޚިދުމަތް ވެސް ފޯރުކޮށްދޭނެ ކަމަށެވެ.

ސްޓެލްކޯއިން، ހަކަތަ އުފައްދާ ސިސްޓަމްތަކުގެ ސިނާޢަތަށް ނުކުމެ، އެކުންފުނީގެ ވޯކްޝޮޕް ހުޅުވީ މި މަހުގެ ހަތަރު ވަނަ ދުވަހުއެވެ. އަދި އެތަނުން ޕަވާ ސިސްޓަމް ޑިޒައިން ކުރުމާއި ޕަވާ ޖަނަރޭޓަރު ސާވިސަސް އަދި ޖަނަރޭޓާ އެސެމްބްލިންގެ ޚިދުމަތުގެ އިތުރުން، ޖަނަރޭޓަރު ސާވިސަސްގެ ޚިދުމަތް ވެސް ލިބެއެވެ.

އޭގެ އިތުރުން އާރްއޯ ފްލާންޓް އެމްސެމްބަލްކުރުމުގެ ޚިދުމަތާއި އަލްޓްރާސޮނިކް ކްލީނިން ޚިދުމަތާއި އޯލްޓަނޭޓާ އެންޑް މޮޓޯ ސާވިސަސްގެ ޚިދުމަތް ވެސް އެ ވޯކްޝޮޕުން ފޯރުކޮށްދެއެވެ.