އައްޑޫސިޓީން 38 މީހަކު ކޮވިޑަށް ފައްސިވެއްޖެ

އައްޑޫސިޓީން 38 މީހަކު ކޮވިޑަށް ފައްސިވެއްޖެއެވެ.

އައްޑޫ އިމަރޖެންސީ އޮޕަރޭޝަންސް ސެންޓަރުން ޢާއްމުކުރި ތަފާސްހިސާބުތައް ދައްކާ ގޮތުން އާދީއްތަ ދުވަހު ފައްސިވި މީހުންގެ ތެރޭގައި ހިމެނެނީ ހިތަދޫގެ 16 މީހަކާއި މަރަދޫއިން 16 މީހެއްގެ އިތުރުން މަރަދޫފޭދޫން އެކަކާއި ފޭދޫން 5 މީހެކެވެ. މި މީހުންނާއެކު މިހާރު އައްޑޫސިޓީގައި މިބައްޔަށް ފައްސިވެފައިވާ 225 މީހުން އެބަތިއްބެވެ.

Advertisement

އާދީއްތަ ދުވަހު ބަލިން ރަނގަޅުވެފައިވަނީ 24 މީހުންނެވެ. މިވަގުތު ކޮވިޑް ފެސިލިޓީގައި އެޑްމިޓްކޮށްގެން ފަރުވާ ދެމުން އަންނަނީ 4 މީހަކަށެވެ. ފައްސިވެފައިވާ މީހުންނާ އެއްތަންވި މީހުންގެ ގޮތުގައި 250 މީހަކު މިވަގުތު ތިބިއިރު އާދީއްތަ ދުވަހު 158 މީހެއްގެ ސާމްޕަލް ނަގައި ޓެސްޓުކޮށްފައިވެއެވެ.

މި ބަލި އައްޑޫސިޓީން ފެނުނު ފަހުން މިއަދާ ހަމަޔަށް 29275 މީހެއްގެ ސާމްޕަލް އޭއީއެޗުންވަނީ ޓެސްޓުކޮށްފައެވެ. އޭގެތެރެއިން އައްޑޫސިޓީން މިހާތަނަށް ކޮވިޑް ބައްޔަށް ފައްސިވި މީހުންގެ ޖުމްލަ އަދަދަކީ 2049 އެވެ.

ނިމިގެން މިދިޔަ އޮކްޓޯބަރ މަހު އައްޑޫ ކޮވިޑް ފެސިލިޓީގައި ކޮވިޑަށް ފައްސިވެގެން ހާލު ބޮޑުވެ ފަރުވާދެމުންދިޔަ މީހުންގެ ތެރެއިން 5 މީހަކު ވަނީ ނިޔާވެފައެވެ. އެގޮތުން މިހާތަނަށް އައްޑޫ ސިޓީން މިބަލީގައި 9 މީހަކު ނިޔާވެފައިވެއެވެ.  

އައްޑޫގައި ކޮވިޑް ދިފާއު ވެކްސިން ދިނުން ކާމިޔާބުކަމާއެކު ކުރިއަށް ގެންދިއުމުގެ ނަތީޖާއެއްގެ ގޮތުން ވެކްސިން ޖަހަންޖެހޭ އާބާދީގެ 90 އިންސައްތަ މީހުން ވެކްސިންގެ ދެ ޑޯޒު ފުރިހަމަކޮށްފައިވާ ރަށްރަށަށް ޕީސީއާރު ޓެސްޓު ހެދުމަކާ ނުލައި ދަތުރު ކުރެވޭނެ ގޮތަށް އުސޫލު ބަދަލުކޮށް ޕީސީއާރް ނުހަދާ ދަތުރު ކުރެވޭ ލިސްޓު ޢާއްމު ކުރިއިރު އެލިސްޓުގައި އައްޑޫ ސިޓީގެ ނަން އެޗްޕީއޭއިން ވަނީ ހިމަނާފައެވެ. މިބަދަލާއެކު އައްޑޫސިޓީއަށް އެހެންހިސާބުތަކުން ދަތުރުކުރުމުގައި ފަސޭހަތަކެއް ލިބިފައިވާއިރު ގުޅިފައިވާ އަވަށްތަކާއި ވަކިން އޮންނަ ހުޅުދޫއާއި މީދޫއަށް ދަތުރު ކުރުމުގައި ވެސް އިތުރު ލިޔެކިއުމެއް ހުށަނާޅާ ދަތުރުކުރެވޭ ގޮތަށް މިހާރުވަނީ ގަވާއިދު ބަދަލުކޮށްފައެވެ.