ދުނިޔެ އެއްބައިވަންތަވެ މޫސުމީ ބަދަލުތަކުން ލިބޭ ގެއްލުންތަކުން ރާއްޖެ ސަލާމަތްކޮށްދިނުމަށް އެންވަޔަރަންމަންޓް މިނިސްޓަރ އައިމިނަތު ޝައުނާ ގޮވާލައްވައިފިއެވެ.
ސްކޮޓްލެންޑްގެ ގްލާސްގޯ ގައި ކުރިޔަށްދާ ކޮޕް26 ސަމިޓަށް ރާއްޖެއިން ދީފައިވާ ވީޑިއޯ މެސެޖްގައި ވާހަކަދައްކަވަމުން މިނިސްޓަރ ވިދާޅުވީ މޫސުމީ ބަދަލުތަކަކީ ރާއްޖެއިން ކޮންމެ ދުވަހަކުވެސް ތަޖުރިބާކުރަމުން އަންނަ ކަންތައްތަކެއްކަމަށެވެ. މިގަރުނު ނިމޭ ހިސާބުގައި ދުނިޔެއަށް ކުރިމަތިވާނެކަމަށް ކުރިން އަންދާޒާކުރި މޫސުމީ ބަދަލުތައް މިހާރު ރާއްޖެއިން އަންނަނީ ތަޖުރިބާކުރަމުން ކަމަށް މިނިސްޓަރ ވިދާޅުވިއެވެ. ރާއްޖޭގެ ފަރުތައް ހަލާކުވެ ރަށްތައް ފެނަށް ޖެހެމުންދާކަމަށް މިނިސްޓަރ ވިދާޅުވިއެވެ. ދުވަހަކަށްވުރެ ދުވަހެއް މޫސުން އަންނަނީ ގޯސްވަމުންކަމަށް މިނިސްޓަރ ވިދާޅުވިއެވެ.
މޫސުމީ ބަދަލުތަކުން އަރައިގަތުމަށް ދުނިޔެއިން ކުރަމުންދާ މަޝްވަރާތަކަށް ބަލަން ރާއްޖެއަށް ނޯވެވޭނެކަމަށް މިނިސްޓަރ ވިދާޅުވިއެވެ. 1.5 ޑިގްރީގައި ދުނިޔޭގެ ހޫނުމިން ހިފެހެއްްޓުމަށް ދުނިޔެއިން އެއްބަސްވުމަކާ ހަމައަށް އައުމަށް ރާއްޖެއިން ބޭނުންވާކަމަށް މިނިސްޓަރ ވިދާޅުވިއެވެ.
ރާއްޖެއިން މިއަންނަނީ ރާއްޖެއަށް ކުރެވެން ހުރި މަސައްކަތެއް ކުރަމުން. ހަކަތަ އުފެއްދުމުގައި ތެލަށް ބަރޯސާވުމުގެ ބަދަލުގައި އިރުގެ އަލިން ކަރަންޓް އުފެއްދުމަށް މިއަންނަނީ މަސައްކަތްކުރަމުން. ސިންގަލް ޔޫސް ޕްލާސްޓިކް ބޭނުންކުރުން އެއްކޮށް ހުއްޓާލުމަށް މިއަންނަނީ މަސައްކަތްކުރަމުން. އެންމެ މަދުވެގެން ކަނޑުގެ ސަރަހައްދުން 20 އިންސައްތަ ހިމާޔަތްކުރުމަށް މިއަންނަނީ މަސައްކަތްކުރަމުންއައިމިނަތު ޝައުނާ / އެންވަޔަރަންމަންޓް މިނިސްޓަރ
މިނިސްޓަރ ވިދާޅުވީ ރާއްޖެއަށް މިކަންކަން ވާކަމަށްވާނަމަ މުޅި ދުނިޔެއަށްވެސް މިކަންކަންވާނެކަމަށެވެ. އަދި މުޅި ދުނިޔެ އެކުވެ ރާއްޖެ ސަލާމަތްކޮށްދިނުމަށް ވަނީ އެދިވަޑައިގަންނަވާފައެވެ.
މިވީޑިއޯގައި ވާހަކަދައްކަވަމުން ރާއްޖޭގައި ހުންނަވާ ޔޫއެންޑީޕީގެ ރެސިޑެންޓް ރެޕްރެޒެންޓޭޓިވް އެންރިކޯ ގަވެގްލިއާ ވިދާޅުވީ މޫސުމީ ބަދަލުތަކުން ކުދި ބިންތިރި ޖަޒީރާ ގައުމުތަކަށް ލިބޭ ގެއްލުންތަކުން އަރައިގަތުމަށް ފައިސާ ހަމަޖެހިގެންދިޔުމަކީ އެގެއްލުންތަކުން އަރައިގަނެ މޫސުމީ ބަދަލުތަކާއި އެއްގޮތަށް ކަންކަން ބަދަލުކުރުމަށް ކުދި ގައުމުތަކަށް ލިބިގެންދާ ފުރުސަތެއްކަމަށެވެ. ކޮންމެ އަހަރަކު 100 ބިލިއަން ޑޮލަރު އެފަދަ ގައުމުތަށް ދިނުމަށް ވެވުނު އެއްބަސްވުމާ ހަމައަށް ވާސިލުވެފައިނުވާކަން ފާހަގަކުރައްވަމުން އެންރިކޯ ވިދާޅުވީ މިހާރު ލިބެންހުރި ވަސީލަތްތަކާއެކު މިމައްސަލަތަކަށް ހައްލެއް ގެނެވެންނެތްކަމަށެވެ.
އަދި މިކަންކަން ހައްލުކުރުމަށް އަމަލުކުރުމަށް އިތުރު ވަގުތެއް ނެތްކަމަށް އެންރިކޯ ވިދާޅުވިއެވެ. ލިބޭ ގެއްލުންތަކުން އަރައިގަތުމަށް މަސައްކަތްކުރުމަށް ބޮޑެތި ގައުމުތަކުން ފަށައިގަންނައިރު އޮންނާނީ ރާއްޖެ ފަދަ ގައުމުތަކަށް މާބޮޑަށްވެސް ލަސްވެފައިކަމަށް އެންރިކޯ ވިދާޅުވިއެވެ.
