ހޯމް ސޯލާރ ޕްރޮގްރާމުގެ ތެރެއިން އެއްހާސް ގެދޮރަށް ލުއިފަސޭހަކަން ލިބިގެންދާނެ: ފެނަކަ އެމްޑީ
ހޯމް ސޯލާރ ޕްރޮގްރާމު ބައްޓަންވެފައިވަނީ ރައްޔިތުމީހާގެ ޖީބަށް ކަރަންޓު ބިލުން ލުއި ލިބޭނެ ގޮތަށް
ހޯމް ސޯލާރ ޕްރޮގްރާމް ހިންގުން ފެނަކަ ކޯޕަރޭޝަނާއި ހަވާލުކުރުމަށް ބޭއްވި ރަސްމިއްޔާތުގައި ފެނަކަ ކޯޕަރޭޝަންގެ މެނޭޖިން ޑިރެކްޓަރ އަހުމަދު ސައީދު މުހައްމަދު ވާހަކަފުޅު ދައްކަވަނީ
ހޯމް ސޯލާރ ޕްރޮގްރާމުގެ ތެރެއިން އެއްހާސް ގެދޮރަށް މިކަމުގެ ލުއިފަސޭހަކަން ލިބިގެންދާނެ ކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރ އަހުމަދު ސައީދު މުހައްމަދު ވިދާޅުވެއްޖެއެވެ.
ހޯމް ސޯލާރ ޕްރޮގްރާމް ހިންގުން ފެނަކަ ކޯޕަރޭޝަނާއި ހަވާލުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ސައީދު ވިދާޅުވީ ހޯމް ސޯލާރ ޕްރޮގްރާމަށް ވާސިލްވުމަށްޓަކައި ފެނަކައިގެ ނެޓްވޯކްތައް ޒަމާނީ ފެންވަރަށް ބަދަލުކުރަން ޖެހުނު ކަމަށެވެ.
ރާއްޖޭގައި ސޯލާރ ހަކަތަ ބޭނުންކުރުމަށްޓަކައި ވަރަށް ގިނަ ވާހަކަތަކެއް މީގެކުރިން ވެސް ދެކެވިފައިވާ ކަމަށާއި ހޯމް ސޯލާރ ޕްރޮގްރާމު ބައްޓަންވެފައިވަނީ ރައްޔިތު މީހާގެ ޖީބަށް ކަރަންޓު ބިލުން ލުއި ލިބޭނެ ގޮތަށް ކަމަށް ސައީދު ވިދާޅުވިއެވެ.
މިއަދު ހޯމް ސޯލާރ ޕްރޮގްރާމް އިފްތިތާހު ކުރެވިގެންދަނީ މިކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ދެއްވި އިރުޝާދުތަކުގެ ސަބަބުން ކަމަށް ސައީދު ވިދާޅުވިއެވެ. އަދި މި ޕްރޮގްރާމް ފުޅާކުރުމުގެ ވިސްނުން ސަރުކާރުގައި އެބަހުރި ކަމަށް ވެސް ވިދާޅުވިއެވެ.
2023 ވަނަ އަހަރު ނިމުމުގެ ކުރިން ފެނަކައިން ޚިދުމަތްދޭ 154 ރަށުގެ 70 އިންސައްތަ އަށް ސޯލާރ ލިބޭނެ ވަސީލަތްތައް ގާއިމު ކުރުމަކީ ފެނަކައިގެ އަމާޒެއް ކަމަށް ސައީދު ފާހަގަކުރެއްވިއެވެ.
ސޯލާރ ހަރުކުރުމަށް ބައެއް ރަށްތަކުގައި ބިމުގެ ދަތިކަން ހުރުމުން އެއީ ވަރަށް ބޮޑު ގޮންޖެހުމެއް ކަމަށް ސައީދު ވިދާޅުވިއެވެ. އެހެންކަމުން ބިން ނެތް ރަށްރަށުގައި ބިން ހިއްކައިގެންވެސް ހައިބްރިޑް ސިސްޓަމަށް ނިޒާމު ބަދަލުކުރުމަށް މަސައްކަތް ކުރަންޖެހޭ ކަމަށް ވިދާޅުވެ، އެންވަޔަރަމެންޓް މިނިސްޓަރ އައިމިނަތު ޝައުނާ އެކަމާމެދު ވިސްނެވުމަށް ސައީދު އެދިވަޑައިގެންނެވިއެވެ.
ފެނަކައިން ބުނީ މި ޕްރޮގްރާމަކީ ސަރުކާރުގެ ސްޓްރެޓެޖިކް އެކްޝަން ޕްލޭންގައި ހިމަނާފައިވާ، 2023 ގެ ނިޔަލަށް މަދުވެގެން 10 މެގަވޮޓްގެ އިރުގެ އަލިން ހަކަތަ އުފައްދާ ނިޒާމުތައް ނެޓްމީޓަރިންގ އުސޫލުން ގާއިމުކުރުމަށް ކަނޑައަޅާފައިވާ ލަނޑުދަނޑި ހާސިލުކުރުމަށް، އަދި 2030 ވަނަ އަހަރުގެ ނިޔަލަށް ދިވެހި ރާއްޖޭގެ ކާބަން އެމިޝަންސް ނެޓް ޒީރޯއަށް ހެދުމަށް ދިވެހި ސަރުކާރުން އަމާޒުކޮށްފައިވާތީ، އެ ޓާގެޓް ހާސިލްކުރުމަށް މަގުފަހިކުރުމަށް ފަށާ ޕްރޮގްރާމެއް ކަމަށެވެ.
