ސަރުކާރުގެ އަމާޒަކީ ރާއްޖޭގެ ރައްޔިތުން ދިރިއުޅޭ ކޮންމެ ރަށަކީ ރައްކާތެރި ރަށެއްގެ ގޮތުގައި ހެދުން - މިނިސްޓަރ ޝައުނާ
މޫސުމަށް އަންނަ ބަދަލާއެކު ފަރުތަކަށް އޭގެ ނޭދެވޭ އަސަރު ކުރާނެ
މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާއާ ސުވާލުކުރެއްވުން
ސަރުކާރުގެ އަމާޒަކީ ރާއްޖޭގެ ރައްޔިތުން ދިރިއުޅޭ ކޮންމެ ރަށަކީ ރައްކާތެރި ރަށެއްގެ ގޮތުގައި ހަދާދިނުން ކަމަށް މިނިސްޓަރ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޮލޮޖީ އައިމިނަތު ޝައުނާ ވިދާޅުވެއްޖެއެވެ.
ރައްޔިތުންގެ މަޖިލީހުގައި ހޯމަދުވަހު ވާހަކަފުޅު ދައްކަވަމުން އެކަމަނާ ވިދާޅުވީ، ބައެއް ފަހަރު ތަރައްގީގެ މަސައްކަތްތައް ރޭވޭ އެކިއެކި ގޮތްގޮތުންނާއި، ރޭވޭ އަވަސްމިނުގެ ސަބަބުންވެސް ރަށްރަށުގެ ތިމާވެށްޓަށް ނޭދެވޭ ކަންކަން ކުރިމަތިވާ ކަމުގައެވެ.
ތިމާވެށި ރައްކާތެރިކޮށް ދެމެހެއްޓުމަށް އެންމެ ބޭނުންވާ ކަންކަމަށް ނުބަލާ މަޝްރޫޢުތައް ފަރުމާކުރެވޭކަންވެސް މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ، މޫސުމަށް އަންނަ ބަދަލުތަކާއި ގުޅިގެން ޤައުމުތައް ހޭނޭނީ ކިހާމިންވަރަކަށްތޯ ބަލާއިރުގައި، ދުނިޔޭގެ ހޫނުމިން މައްޗަށްދާވަރު 1.5 ޑިގްރީ ގައި ނުހިފެހެއްޓިއްޖެނަމަ ރާއްޖޭގެ އެންމެ މުހިންމު ގުދުރަތީ އެސެޓު ކަމުގައިވާ ރާއްޖޭގެ ރަށްތައް ވަށައިގެންމިވާ ފަރުތައް ނެތިދިއުމުގެ ބިރު އެބައޮތް ކަމަށެވެ. އެހެންވީމާ، ރަށްރަށުގެ ތަރައްގީގެ މަސައްކަތްތައް ރާވާއިރު ޚާއްޞަކޮށް އިންފްރާސްޓްރަކްޗަރ މަސައްކަތްތައް ރާވާއިރު ރަށްރަށުގެ ތިމާވެށި ރައްކާތެރިކޮށް ދެމެހެއްޓުމަށް ވަރަށް ބޮޑަށް ސަމާލުވާންޖެހޭ ކަމަށް ވިދާޅުވެ މިނިސްޓަރ ބައެއް ތަފުސީލުތައްވެސް ބަޔާންކުރެއްވިއެވެ.
މީގެ އިތުރުން ބޮޑުތިލަދުންމަތީގައި ވޭސްޓް މެނޭޖްމެންޓް ޓްރާންސްފަރ ސްޓޭޝަނެއް ގާއިމުކުރެވޭނެ ކަމަށް މިނިސްޓަރ ޝައުނާ ވިދާޅުވިއެވެ.
ހއ، ހދ ށ، މި 3 އަތޮޅުގައި އުފެދޭ ކުނި އެސަރަހައްދުގައި ޤާއިމްކުރެވޭ ވޭސްޓް މެނޭޖްމެންޓް ޓްރާންސްފަރ ސްޓޭޝަނަށް ގެންދިއުމަކީ އަމާޒެއް ކަމުގައި ވިދާޅުވެ މިނިސްޓަރ ވިދާޅުވީ މިކަމާބެހޭ މަޝްރޫޢުގެ ބަޖެޓުވެސް މިދިޔަ ހަފުތާގައި ފާސް ކުރެވިފައިވާ ކަމަށެވެ.އަދި ރޭވިފައިވަނީ މިމަހުގެ ތެރޭގައި މިމަސައްކަތް ކޮންޓްރެކްޓަރާއި ހަވާލުކުރުމަށް ކަމަށްވެސް މިނިސްޓަރ ވިދާޅުވިއެވެ.
ހއ، ހދ، ށ ވޭސްޓް މެނޭޖްމެންޓް މަޝްރޫޢަކީ ދިވެހި ސަރުކާރާއި އޮފިޑް ގުޅިގެން ހިންގާ މަޝްރޫއެކެވެ.
