ކުނި ބައިބަޔަށް ވަކިކުރުމާއި ގުޅޭ ހޭލުންތެރިކަމުގެ ކެމްޕެއިނެއް މާލޭގައި ފަށަނީ

މިއަހަރުގެ ޖޫން މަހުން ފެށިގެން މާލެ ސިޓީގައި ގޭބެސީތަކުން ކުނި އުކާލާއިރު ބައިބަޔަށް ވަކިކޮށްގެން ކުނިއުކާލަން ހަމަޖެހިފައިވާތީ އެކަމަށް އާންމުން ހޭލުންތެރިކުރުވުމުގެ ކެމްޕެއިނެއް ހިންގުމަށް ހަމަޖެހިފައިވާކަމަށް މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވިދާޅުވެއްޖެއެވެ.

ކުނި މެނޭޖްކުރުމާ ބެހޭ ގަވާއިދަށް އެންމެފަހުން ގެނައި އިސްލާހުގައި ކުނި އުފައްދާ ތަންތަނުން ކުނި ބައިބަޔަށް ބެހުމުގެ މާއްދާއެއް ވަނީ ހިމަނާފައެވެ. މިއިސްލާހުގެ ދަށުން މިއަހަރުގެ ޖެނުއަރީ މަހުން ފެށިގެން ރަށްރަށުގެ ގޭބެސީތަކުން އުފައްދާ ކުނި ހުންނަންޖެހޭނީ ގަވާއިދާ އެއްގޮތަށް ބައިބަޔަށެވެ. މާލެ ސިޓީގެ ގޭބެސީތަކުން ކުނި ބައިބައި ކޮށްފައި ބަހައްޓަންޖެހޭނީ މިއަހަރުގެ ޖޫން މަހުން ފެށިގެންނެވެ.

މިކަމާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން މިނިސްޓަރ ވިދާޅުވީ ކުނި ބައިބަޔަށް ބަހައިގެން ރަށްރަށުގައި ވަރަށް ރަނގަޅަށް އެކަން ކުރަމުންދާކަމަށެވެ. މާލޭގައި ގިނަ އެޕާޓްމަންޓްތަކެއްގައި ގިނަ ބަޔަކު ދިރިއުޅޭއިރު އެކަމަށް ދަތިތަކެއް ހުރިނަމަވެސް އެކަން ކުރެވޭނެކަމަށް ގަބޫލުކުރައްވާކަމަށް މިނިސްޓަރ ވިދާޅުވިއެވެ.

އެއީ މިހާރުވެސް މާލޭގައި ގިނަ ގޭބެސީތަކުން ކުނި ނެރޭއިރު ޕްލާސްޓިކާއި ބަދީގޭގެ ކުންޏާއި އެނޫންކުނި ވަކިކޮށްފައިކަމަށް ހުންނާތީ ކަމަށް މިނިސްޓަރ ވިދާޅުވިއެވެ. ފަށައިގަންނަ އިރު ދަތިތަކެއް ހުރިނަމެއް ނަމަވެސް މިކަން ކުރެވޭނެކަމަށް މިނިސްޓަރ ވިދާޅުވިއެވެ.

މިކަމަށް އޮތް އެންމެ ބޮޑު ގޮންޖެހުމެއްގެ ގޮތުގައި ފާހަގަކުރެވެނީ އާންމު ރައްޔިތުން ހޭލުންތެރިކުރުވުންކަމަށް މިނިސްޓަރ ވިދާޅުވިއެވެ. އެއީ މިކަން ކުރަންޖެހޭކަމުގެ ވާހަކަތައް އެހާބޮޑަށް ނުދެކެވޭތީކަމަށް މިނިސްޓަރ ވިދާޅުވިއެވެ.

މި ކެމްޕެއިން ފަށާނެ ސީދާ ތާރީޚެއް މިނިސްޓަރ ވިދާޅެއްނުވެއެވެ.

ގަވާއިދުގައިވާ ގޮތުން މާލެ ސިޓީގެ ކުނި އުފައްދާ ތަންތަނުގެ ކުނި ބަހައްޓަންވާނީ 3 ބަޔަކަށް ބަހާފައެވެ.

އެ ތިން ބަޔަކީ:

ގަވާއިދުގައި ބުނެފައިވަނީ މިބައިގައި ނުހިމެނޭ ބާވަތެއްގެ ބޮޑެތި ކުނީގެ ގޮތުގައި ބެލެވޭ ފަރުނީޗަރު، ގޭތެރޭގައި ހިފައިގެންގުޅޭ ސާމާނު، ފުރިޖް، ޓީވީ، ދޮންނަމެޝިން، މިނޫންވެސް މިފަދަ ކުނި އެހެން އެއްވެސް ކުންޏަކާ އެކުވެގެންނުވާނެކަމަށެވެ.

އަދި މިގޮތަށް ކުނި ބައިބަޔަށް ބަހައިފައިނުވާނަމަ އެކުނި ބަލައިނުގަތުމުގެ އިޚުތިޔާރު ކުނި މެނޭޖްކުރުމުގެ ޚިދުމަތްދޭ ފަރާތަށް ލިބިގެންވާކަމަށްވެސް ގަވާއިދުގައި ބުނެފައިވެއެވެ. މިގޮތަށް އަމަލުނުކުރާ ކުނި އުފައްދާ ތަންތަން ޖޫރިމަނާކުރެވޭނެކަމަށް ގަވާއިދުގައި ވަނީ ބުނެފައެވެ.