ފަތުރުވެރިކަމުގެ ބޭނުމަށް ކުއްޔަށް ދޫކުރަން ނިންމާފައިވާ 18 ރަށް ބިޑްކުރުމަށް ހުޅުވާލައިފިއެވެ.

ރިސޯޓުތައް ތަރައްގީކުރުމަށްޓަކައި ބިޑްކުރުމަށް ހުޅުވާލާފައިވާ ރަށްތަކަކީ ހއ. އަލިދުއްފަރުފިނޮޅު، ހއ. މެދުފުށި، ހދ. ކުޑަފަރުފަސްގަނޑު، ށ. ކުޑަޅައިމެންދޫ، ރ. އެއްތިގިލި، މ. ސީދީހުރާ (ސީދީހުރާ ވެލިގަނޑާއެކު)، މ. މާއުފުށި، ފ. އެނބުލުފުށި، ފ. ޖިންނަތުގައު، ތ. ކާއްޑޫ، ތ. އޮޅުފުށި (އޮޅުފުށިފިނޮޅާއެކު)، ލ. ކަށިދޫ، ލ. ބޮޑުމުންޔަފުށި، ލ. ދޮންބެރަހާ (ހޮޅުރަހާއާއެކު)، ގއ. މާރެހާ، ގއ. ފުނަދޫވިލިގިއްލާ، ގދ. ކަނޑަހަލަގަލާ، ގދ. ފެރޭތަވިލިގިއްލާއެވެ. ފެރޭތަވިލިގިއްލާއާއެކު ދެކަނބާ އަދި ކޮޑެރަޓާ ދިނުމަށް ވަނީ ހުޅުވާލާފައެވެ.

މި ރިސޯޓުތަކަށް ބިޑް ކުރުމަށް ހުޅުވާލައި ޓުއަރިޒަމް މިނިސްޓްރީން ބުނީ, މިއިން ކޮންމެ ރަށެއްވެސް ކުއްޔަށް ދޫކުރާނީ އެންމެ މަދުވެގެން 50 އަހަރަށް ކަމަށެވެ. ރިސޯޓު ތަރައްގީކުރުމަށް 36 މަހުގެ މުއްދަތެއް ދެވޭނެ ކަމަށާއި، އިތުރަށް ހިއްކަން ޖެހޭ ރަށްރަށަށް އިތުރު 18 މަސް ދެވޭނެ ކަމަށް މިނިސްޓްރީން ބުނެފައިވެއެވެ. މިނިސްޓްރީން ވަނީ މި ރަށްތައް ދޫކުރާނެ އެންމެ ކުޑަ އަގު ކަނޑައަޅާފައެވެ. ބިޑަށް ހުށަހަޅާއިރު، މިނިސްޓްރީން ކަނޑައަޅާފައިވާ އަގަށްވުރެ ކުޑަ ނުކުރުމަށް މިނިސްޓްރީން ވަނީ އެދިފައެވެ.

މީގެ އިތުރުން ބިޑް ހުށަހަޅާއިރު، ބިޑް ސެކިއުރިޓީގެ ގޮތުގައި އެމްއެމްއޭއިން ބަލައިގަންނަ ތަނަކުން ދޫކޮށްފައިވާ 50،000 ޑޮލަރުގެ ގެރެންޓީއެއް ހުށަހަޅަންޖެހޭނެ ކަމަށް ޓުއަރިޒަމް މިނިސްޓްރީން ވަނީ ބުނެފައެވެ. އަދި ބިޑް ހުށަހަޅާ ފަރާތްތަކުގެ ތެރެއިން ރަށް ކުއްޔަށް ދޭނީ އެންމެ މަތިން ބިޑް ހުށަހަޅާ ފަރާތަށް ކަމަށް މިނިސްޓްރީން ބުނެފައިވެއެވެ.

އެޕްލިކޭޝަން ފޯމެއް ފުރިހަމަކޮށްގެން މި ރަށްތަކަށް ބިޑް ކުރެވޭނެ ކަމަށް މިނިސްޓްރީން ބުނެފައިވެއެވެ. ޓުއަރިޒަމް މިނިސްޓްރީން ބުނީ މި ރަށްތަކަށް ބިޑް ކުރުމުގެ ފުރުސަތު 31 އޮކްޓޯބަރުން ފެށިގެން 24 ފެބްރުއަރީ 2022ގެ ނިޔަލަށް ހުޅުވާލާފައިވާކަމަށެވެ.

ޓުއަރިޒަމް މިނިސްޓްރީން ބުނީ މި 18 ރަށް ރިސޯޓުގެ ގޮތުގައި ތަރައްގީކުރެވުމުން ރާއްޖޭގެ ފަތުރުވެރިކަމަށް 4،710 އެނދު އިތުރުވެގެންދާނެ ކަމަށެވެ.

މިއަހަރަށް ލަފާކުރާ ދައުލަތުގެ ބަޖެޓު ހުށަހަޅުއްވަމުން ފިނޭންސް މިނިސްޓްރ އިބްރާހިމް އަމީރު ވަނީ ދައުލަތުގެ އާމްދަނީ އިތުރުކުރުމަށް ރިޒޯޓްތައް ހެދުމަށް އައު ރަށްތައް ދޫކުރަން ނިންމާފައިވާކަން އިއުލާނުކުރައްވާފައެވެ. މީގެ އިތުރުން މިހާރު ކުރިއަށްދާ ދުބާއީ އެކްސްޕޯގައިވެސް ފަތުރުވެރިކަމުގެ ބޭނުމަށް ރަށްތައް ދޫކުރުމަށް ހުޅުވާލާފައިވާކަން ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވަނީ ވިދާޅުވެފައެވެ.