ދިއްދޫ ގޮނޑުދޮށް ހިމާޔަތް ކުރުމުގެ މަޝްރޫޢު ނިމިއްޖެ: އެމް.ޓީ.ސީ.ސީ
މިއީޖުމްލަ 10.2 މިލިޔަން ރުފިޔާގެ މަޝްރޫޢެއް
ދިއްދޫ ގޮނޑުދޮށް ހިމާޔަތް ކުރުމަށް ޖެހި ޖީއޯ ބޭގްސް
ހއ. ދިއްދޫ ގޮނޑުދޮށް ހިމާޔަތް ކުރުމުގެ މަޝްރޫޢު ނިމިއްޖެ ކަމަށް މޯލްޑިވްސް ޓްރާންސްޕޯރޓް އެންޑް ކޮންސްޓްރަކްޝަން ކޮމްޕެނީ(އެމް.ޓީ.ސީ.ސީ)އިން ހާމަކޮށްފިއެވެ. އެމް.ޓީ.ސީ.ސީން ހާމަކުރި ގޮތުގައި މި މަޝްރޫޢު ނިމިފައިވަނީ 27 އޮކްޓޯބަރ 2021 ވަނަ ދުވަހުއެވެ.
މިނިސްޓްރީ އޮފް ނޭޝަނަލް ޕްލޭނިންގ އިންފްރާ ސްޓްރަކްޗަރގެ ފަރާތުން އެމް.ޓީ.ސީ.ސީއާ ހަވާލުކުރެވުނު މި މަޝްރޫޢަކީ 10.2 މިލިޔަން ރުފިޔާގެ މަޝްރޫޢެކެވެ. މި މަޝްރޫޢުގެ ދަށުން ރަށްގިރުން ސަލާމަތަކުރުމަށްޓަކައި 310 މީޓަރުގެ ސަރަޙައްދެއްގައި ޖީއޯ ބޭގް ރިވެޓްމެންޓް ޖެހުމުގެ މަސައްކަތް ކުރެވިފައިވެއެވެ. އެގޮތުން ޖީއޯ ބޭގަށް އެޅުމަށްޓަކައި 1926ކިއުބިކް މީޓަރުގެ ވެލި ބޭނުން ކުރެވިފައިވެއެވެ. އަދި ކޮނުމަށް ފަހު ބިންގަނޑު އެއްވަރު ކުރުމަށްޓަކައި 7750 މީޓަރުގެ ވެލި ބޭނުންކުރެވިފައިވެއެވެ. މި މަޝްރޫޢުގެ އަމަލީ މަސައްކަތް ފެށިފައިވަނީ 28 ފެބްރުއަރީ 2021ގައެވެ. ދިއްދޫގެ ހުޅަނގު ފަރާތު ގޮނޑުދޮށް ހިމާޔަތް ކުރެވިފައިވާއިރު މި ސަރަޙައްދު ގިރަމުން އަންނަތާ 10 އަހަރަށްވުރެން ގިނަ ދުވަސް ވަނީ ވެފައެއެވެ.
އެމް.ޓީ.ސީ.ސީން ދަނީ ދިއްދޫގެ ބަނދަރު ބޮޑުކުރުމާއި ފެރީ ޓާރމިނަލް އެޅުމުގެ މަސައްކަތްވެސް ކުރަމުންނެވެ. މިއަހަރުގެ މިހާތަނަށް އެމް.ޓީ.ސީ.ސީން ވަނީ 17 މަޝްރޫޢުއެއްގެ މަސައްކަތް ނިންމާފައިއެވެ.
