ޒުވާނުންގެ ދުވަސް ފާހަގަ ކުރުމުގެ ގޮތުން ޔޫތު މިނިސްޓްރީއާއި ތުރާކުނު ކައުންސިލުން ގުޅިގެން މަސްރޭހެއް ބާއްވާއިފިއެވެ.

އިއްޔެ ހަވީރު 16:00އިން 18:00އަށް މި ހަރަކާތްވަނީ ހއ. ތުރާކުނުގައި ކުރިއަށް ގެންގޮސްފައެވެ. ތުރާކުނު ކައުންސިލްގެ ރައީސް ޢަލީ ޢަބްދުއްލަޠީފް ރާއްޖެ އެމް.ވީއަށް މަޢުލޫމާތު ދެއްވަމުން ވިދާޅުވީ; ވަނަ ހޮވާ މި މުބާރާތުގައި ހަތަރު ޓީމެއް ބައިވެރިވެފައިވާ ކަމަށެވެ. އެއީ ޓީމް ގަޕި، ޓީމް ވަރަށް ޗިއްލާ, ޓީމް ކެޕޭސިޓީ އަދި ޓީމް ބިލެތްދޫ ތިލައެވެ.

އެންމެ ގިނަ މަސްބާނާ ގްރޫޕަކާއި އެންމެ ބަރު މަސް ބާނާ ގުރޫޕެއް ހޮވާފައިވާނެކަމަށް ލަޠީފް ވިދާޅުވިއެވެ. އެގޮތުން 151 ކިލޯގެ މަސް ބާނައިގެން އެއްވަނައަށް ގޮސްފައިވަނީ ޓީމް ގަޕި ކަމަށާއި 68 ކިލޯގެ މަސްބާނައިގެން ދެވަނައަށް ގޮސްފައިވަނީ ވަރަށް ޗިއްލާ ކަމަށެވެ. އަދި ބާނައިގެން ގެނައި މަސްތަކުން ރޭ ވަނީ ރަށު ރައްޔިތުންނަށް ބާބަކިޔުއެއް ދީފައި ކަމަށްވެސް ލަޠީފް ވިދާޅުވިއެވެ.

ލަޠީފް ވިދާޅުވި ގޮތުގައި މިފަދަ ޙަރަކާތެއް ހިންގުމުގެ މައިގަނޑު މަޤްޞަދަކީ ޒުވާނުންގެ ދުވަހާ ގުޅިގެން ރަށުގެ ރައްޔިތުންނާއި ޒުވާނުންގެ މެދުގައި ގުޅުން ބަދަހި ކުރުން ކަމަށާއި, ޒުވާނުން ބައިވެރިކުރުން ކަމަށެވެ. އަދި މި ޙަރަކާތުގެ އިތުރުން ޒުވާނުންގެ ދުވަސް ފާހަގަ ކުރުމަށްޓަކައި އިތުރު ޙަރަކާތްތަކެއްވެސް ކުރިއަށް ގެންދެވިފައިވާ ކަމަށް ލަޠީފް ވިދާޅުވިއެވެ. އެގޮތުން ތުރާކުނުގެ ޒުވާނުންގެ ޓީމާއި ދިއްދޫ ބީ.އެކްސް ސްޕޯރޓްސް ކުލަބްގެ މެދުގައި ފުޓްބޯޅަ މެޗެއް ކުޅެވިފައިވެއެވެ. މި މެޗް 6-4އިން ކާމިޔާބު ކުރީ ތުރާކުނު ޒުވާނުންގެ ޓީމްއެވެ. ލަޠީފް ވިދާޅުވީ ކުރިއަށްވެސް އިތުރު ޙަރަކާތްތަކެއް ރޭވިފައިވާ ކަމަށެވެ.

މިއަހަރުގެ ޒުވާނުންގެ ދުވަސް ރަސްމީ ގޮތެއްގައި ފާހަގަ ކޮށްފައިވަނީ ހދ. ކުޅުދުއްފުށީގައިއެވެ.