ކޮވިޑްގެ ހަގީގަތް އެނގުމުގެ ފުރުސަތު ކުޑަ
ޗައިނާއިން ވަނީ އޯޑީއެންއައި ގެ ރިޕޯޓަށް ފާޑު ކިޔާފައި
ވުހާންގައި ކޮވިޑަށް ޓެސްޓު ކުރަމުން ދަނިކޮށް
ކޮވިޑްގެ ހަގީގަތް އެނގުމުގެ ފުރުސަތު ކުޑަ ކަމަށާއި، އެކަމަކު އެއީ ބަޔޮލޮޖިކަލް ހަތިޔާރެއްގެ ގޮތުގައި އުފެއްދި އެއްޗެއް ނޫން ކަމަށް އެމެރިކާގެ އޮފީސް އޮފް ދަ ޔޫއެސް ޑިރެކްޓާ އޮފް ނޭޝަނަލް އިންޓެލިޖެންސް (އޯޑީއެންއައި)ން ބުނެފިއެވެ.
ވައިރަސް ފެތުރެންފެށި ގޮތުގެ ދިރާސާކުރި އޯޑީއެންއައި އިން ބުނީ ވައިރަސް ފެތުރެން ފެށީ ޖަނަވާރެއްގެ ގައިން އިންސާނުންގެ ގަޔަށް އަރައިގެން ނުވަތަ ލެބޯޓްރީއަކުން ލީކުވެގެން ކަމަށް ވެސް ވެދާނެ ކަމަށެވެ. އަދި ޗައިނާގެ ވޫހާން ސިޓީން ވައިރަސް ފެތުރެން ފެށުމުގެ ކުރިން ވައިރަހާ ގުޅޭ މައުލޫމާތެއް ޗައިނާއަށް ލިބިފައި ނުވާ ކަމަށެވެ.
އެމެރިކާގެ ރައީސް ޖޯ ބައިޑެންގެ އަމުރުފުޅަށް ކޮވިޑްގެ ހަގީގަތް ހޯދުމަށް ހިންގި މި ތަހުގީގު ރިޕޯޓުގައި ބުނެފައިވަނީ ޗައިނާއިން ކޮވިޑްގެ އަސްލު ހޯދުމަށް ތަހުގީގު ކުރުމަށް ޗައިނާއިން ހުރަސް އަޅަމުންދާ ކަމަށާއި، އެގޮތުން މައުލޫމާތު ހޯދުމުގައި ދަތިތަކެއް ހުރި ކަމަށެވެ.
މި ރިޕޯޓުގައި އިތުރަށް ބުނީ ވައިރަސް އުފެދުނު ގޮތާ މެދު ތަހުގީގުކުރި ޓީމުގެ މެމްބަރުންގެ މެދުގައި ޚިޔާލު ތަފާތުވުންތަކެއް ހުރި ކަމަށެވެ.
މި ރިޕޯޓަށް ޗައިނާއިން ވަނީ ފާޑުކިޔާފައެވެ. ޗައިނާއިން ބުނީ އެންމެ ފުރަތަމަ ފެނުނު ކޮވިޑްގެ ކޭސްތައް ގުޅިފައިވަނީ ވޫހާނުގައި ހުންނަ ސީފުޑް މާރުކޭޓާ ކަމަށެވެ. އެހެންކަމުން މިއީ ޖަނަވާރެއްގެ ގައިން އިންސާނުންގެ ގަޔަށް އެރި ވައިރަހެއް ކަމުގައި ބެލެވޭ ކަމަށް ޗައިނާއިން ބުންޏެވެ. އަދި އެމެރިކާއިން އުޅެނީ ސައިންސްވެރިންގެ ވާހަކަތަކަށް ބެލުމެއް ނެތި ސިޔާސީ ކުޅިގަނޑެއް ކުޅުމަށް ކަމަށް ޗައިނާއިން ބުންޏެވެ.
އެކަމަކު މިއަހަރުގެ ކުރީކޮޅު އެމެރިކާގެ ނޫސްތަކުން ރިޕޯޓުކުރި ގޮތުގައި މިއީ އެމެރިކާގެ ލެބޯޓްރީއަކުން ލީކުވި ވައިރަހެއް ކަމަށް ބެލެވޭ ކަމަށެވެ. އަދި އެކަމުގެ ހެކިތައް ފެންނަން ހުރި ކަމަށް އެމެރިކާގެ ނޫސްތަކުން ވަނީ ރިޕޯޓްކޮށްފައެވެ.
