ޒެނީޝާއަށް ދައުވާކުރަން ފޮނުވުން: "ތަރުތީބުގައި އިސްފަސްވުމެއް ނެތް"
ޕީޖީ އެ މައްސަލައެއް ޝަރީއަތަށް ފޮނުވުމުން އެކަމުގައި ނިޔާ ކަނޑައަޅުއްވާނީ ފަނޑިޔާރު
ކުރީގެ ބަންޑާރަނައިބް ޑރ. އަހުމަދު އަލީ ސަވާދު- ޑރ ސަވާދު ވިދާޅުވީ ދައުވާކުރަން ފޮނުވާ މައްސަލަތަކާމެދު އަމަލު ކުރަންޖެހޭ ތަރުތީބުގައި އިސްފަސްވުމެއް ނެތްކަމަށް
އެޗްއާރްސީއެމްގެ ޒިންމާ އަދާކޮށް ޝަރީޢަތަށް ހުށަހަޅަން ޕްރޮސެކިއުޓަރ ޖެނެރަލް (ޕީޖީ) އަށް ފޮނުވާ ކަންކަމުގައި ގޮތް ނިންމަންވާނީ ޕްރޮސެކިއުޓިންގ ގައިޑްލައިންސަށް ބަލާފައި ކަމަށާއި، އެކަމުގެ ތަރުތީބުގައި އިސްފަސްވުމެއް ނެތްކަމަށް ކުރީގެ ބަންޑާރަނައިބް ޑރ. އަހުމަދު އަލީ ސަވާދު ވިދާޅުވެއްޖެއެވެ.
ކުޑަކުދިންގެ ހިޔާގައި ހިނގައިދިޔަ ހާދިސާއަކާ ގުޅިގެން ޒެނީޝާ ހިމެނޭހެން 30 މީހެއްގެ މައްޗަށް ދައުވާކޮށްދިނުމަށް އެޗްއާރްސީއެމްއިން ޕީޖީ އޮފީހަށް ފޮނުވުމާއެކު، އެކަމަށް ބައެއް ސިޔާސީ އިސް ފަރާތްތަކުންނާއި ދައުލަތުގެ އިސް ފަރާތްތަކުން ގެންދަނީ ފާޑު ކިޔަމުންނެވެ. އެކަމާ ގުޅޭގޮތުން ޑރ ސަވާދު ކުރެއްވި ޓްވީޓެއްގައި ވިދާޅުވީ، ޕީޖީއަށް ފޮނުވާ ކަންކަމުގައި ގޮތް ނިންމަންވާނީ ޕްރޮސެކިއުޓިންގ ގައިޑްލައިންސަށް ބެއްލެވުމަށްފަހު ކަމަށާއި، އެހިސާބުން ޕީޖީ އެ މައްސަލައެއް ޝަރީއަތަށް ފޮނުވުމުން އެކަމުގައި ނިޔާ ކަނޑައަޅުއްވާނީ ފަނޑިޔާރު ކަމަށެވެ.
ޑރ ސަވާދު ވިދާޅުވީ، ފަނޑިޔާރުން ގޯހެއް ހައްދަވައިފިނަމަ، ޖުޑީޝަލް ސަރވިސް ކޮމިޝަން (ޖޭއެސްސީ) މެދުވެރިކޮށް އެކަން ބަލާނީ ރައްޔިތުންގެ މަޖިލީހުން ކަމަށެވެ. އަދި މި ކަންކަން މިހެން ހިންގުމުގައި ތަރުތީބުގެ އިސްފަސްވުމެއް ނެތްކަން އޭނާ ފާހަގަ ކުރެއްވިއެވެ.
އޭގެ އިތުރުން، އެޗްއާރްސީއެމް، ޕީޖީ ނުވަތަ ފަނޑިޔާރު ގޯސް ހެއްދެވުމުން އެކަން ހަމަމަގަށް ގެންދަވަން ތިއްބެވި ފަރާތްތަކުން އެ މައްސަލައާއި ގުޅޭ 'ޒާތީ' ރައުޔު އާންމު ކުރެއްވުމުން މިނިވަން މުއައްސަސާތަކަށް އެ ފޯރުވެވެނީ ނާޖާއިޒް ނުފޫޒެއް ކަމަށެވެ. އަދި 'ޒާތީ' ރައުޔުތަކަށް މިނިވަން ކޮމިޝަންތައް ހިންގިގެން ނުވާނެކަމަށްވެސް ޑރ ސަވާދު ވިދާޅުވިއެވެ.
ޑރ ސަވާދު އެހެން ވިދާޅުވެފައިވާއިރު، ޕްރޮސެކިއުޓަރ ޖެނެރަލްގެ ޤާނޫނުގެ 11 ވަނަ މާއްދާގެ ށ ގައި ބަޔާންކޮށްފައިވަނީ ޕްރޮސިކިއުޓަރ ޖެނެރަލަކީ، އޭނާގެ މަޤާމުގެ ވާޖިބުތައް އަދާކުރުމުގައާއި އޭނާގެ ބާރުތައް ބޭނުންކުރުމުގައި، އެއްވެސް ފަރާތެއްގެ ނުފޫޒެއްގެ ދަށުގައިވާ މީހެއް ކަމުގައި ވެގެންނުވާނެ ކަމަށެވެ. 9/2008ށް އިތުރު ކޮށްފައިވާ މި މާއްދާއަކީ 19 ވަނަ ރައްޔިތުންގެ މަޖިލީހުން އިތުރުކޮށްފައިވާ މާއްދާއެކެވެ.
