ލިލް އަތުން ފަހު ވަގުތު ޕީއެސްޖީއަށް މޮޅެއް

ފްރެންޗް ލީގުގައި ހުކުރު ދުވަހުގެރޭ ކުޅުނު މެޗުން އެންމެ ފަހުގެ ޗެމްޕިއަން ލިލް އަތުން ފަހު ވަގުތު ޕީއެސްޖީ މޮޅުވެއްޖެއެވެ.

އަމިއްލަ ދަނޑުގައި ކުޅުނު މެޗުން ޕީއެސްޖީ މޮޅުވީ ފަހަތުން އަރައި 2-1 ގެ ނަތީޖާއަކުންނެވެ.

މި މެޗު ފަށައިގެން ލިލްއިން ޕީއެސްޖީގެ ގޯލަށް ނުރައްކާކުރިއިރު، މެޗުގެ ފުރަތަމަ މިނެޓުގައި ކައުންޓަ އެޓޭކެއްގައި އެ ޓީމުގެ ބުރަކް ޔިލްމާޒް ވަނީ ނުރައްކާތެރި ހަމަލާއެއް ފޮނުވާލާފައެވެ. އެކަމަކު އެ ހަމަލާގެ ހުރަހަކަށްވީ ޕީއެސްޖީގެ ގޯލްކީޕަރު ޖިއަންލުއިޖީ ޑޮންނަރުއްމާއެވެ. ނަމަވެސް މި މެޗުގެ ފުރަތަމަ ހާފުގައި ލިލްއިން ވަނީ ލީޑު ނަގާފައެވެ. މެޗުގެ 31 ވަނަ މިނެޓުގައި ޔިލްމާޒް ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ޖޮނަތަން ޑޭވިޑެވެ.

މި މެޗުގައި އަނިޔާގެ ސަބަބުން ފްރާންސްގެ ޒުވާން ތަރި ކީލިއަން އެމްބާޕޭ ކުޅެފައި ނުވާއިރު، މި މެޗުގެ ދެވަނަ ހާފު ޕީއެސްޖީން ފަށާފައިވަނީ އާޖެންޓީނާގެ ލިއޮނަލް މެސީގެ ބަދަލުގައި މައުރޯ އިކާޑީއާއެކުއެވެ. މި މެޗުގެ ފުރަތަމަ ހާފުގައިވެސް މެސީއަށް އެންމެ އެދެވޭ ކުޅުމެއް ދެއްކިފައި ނުވާއިރު، ފްރެންޗް ލީގުގެ މިހާތަނަށް ކުޅުނު ފަސް މެޗުގައިވެސް މެސީއަށް އަދި މިހާތަނަށް ލަނޑެއް ޖެހިފައެއް ނުވެއެވެ.

މި މެޗުގެ ދެވަނަ ހާފުގައި ޕީއެސްޖީން ކުޅުން ރަނގަޅުކުރިއިރު، މެޗުގެ 74 ވަނަ މިނެޓުގައި އެ ޓީމުން ވަނީ ނަތީޖާ އެއްވަރުކޮށްފައެވެ. އެންހެލް ޑި މާރިއާ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން މާކީނިއޯސްއެވެ. އަދި މެޗު ނިމެން ދެ މިނެޓަށް ވެފައިވަނިކޮށް ނޭމާ ތަނަވަސްކޮށްދިން ފުރުސަތަކުން ޕީއެސްޖީ މޮޅުކޮށްދިން ލަނޑު ޖަހައިދިނީ ޑި މާރިއާއެވެ.

މި މޮޅާއެކު ތާވަލުގެ އެއްވަނައިގައި ޕީއެސްޖީ އޮތީ 10 ޕޮއިންޓުގެ ލީޑަކާއެކުއެވެ. ކުޅުނު 12 މެޗުން ޕީއެސްޖީއަށް 31 ޕޮއިންޓް ލިބިފައިވާއިރު، ދެވަނައިގައި އޮތް ލެންސްއަށް 11 މެޗުން ލިބިފައިވަނީ 21 ޕޮއިންޓެވެ. އަދި އެންމެ ފަހުގެ ޗެމްޕިއަން ލިލް އޮތީ 12 މެޗުން 15 ޕޮއިންޓާއެކު ތާވަލުގެ 11 ވަނައިގައެވެ.