ހިޔާގެ ހާދިސާތަކާ ގުޅިގެން ދައުވާކުރަން ފޮނުވީ އަދުލުވެރިކަމާއެކު މައްސަލަ ބެލުމަށްފަހު: އެޗްއާރުސީއެމް
30 މީހެއްގެ މައްޗަށް ދައުވާ ކުރަން ވަނީ ފޮނުވާފައި
ކުޑަކުދިންގެ ހިޔާ
2017 ވަނަ އަހަރު ކުޑަކުދިންގެ ހިޔާގައި ހިނގި ހާދިސާތަކުގެ ތަހުގީގުގައި އެއްވެސް ފަރާތަކާމެދު ޒާތީވެފައި ނޯންނާނެ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)އިން ބުނެފިއެވެ.
އެޗްއާރުސީއެމުން މިފަދައިން ބުނީ އެކޮމިޝަނުން ތަހުގީގުކޮށް، ދައުވާ ކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވި މައްސަލައަކާ ގުޅޭގޮތުންނެވެ.
އެޗްއާރުސީއެމުން ބުނީ 2017 ކުޑަކުދިންގެ ހިޔާގައި ހިނގި ހާދިސާތަކަކާ ގުޅޭގޮތުން ހުށަހަޅާފައިވާ މައްސަލަތަކަކީ ކުޑަކުދިންނަށް ކުރާ އަނިޔާތަކުގެ މައްސަލަތައް ބަލާ ކޮމިޝަނުން ބެލުމަށްފަހު އެޗްއާރުސީއެމްގެ ސަމާލުކަމަށް ގެނެސްފައިވާ މައްސަލައެއް ކަމަށެވެ. އެ މައްސަލައަކީ ކުޑަކުދިންގެ ހިޔާގައި ބައިތިއްބާފައިވާ ކުޑަކުދިންތަކަކަށް މޯލްޑިވްސް ޕޮލިސް ސަރވިސްއާއި، މޯލްޑިވްސް ނޭޝަނަލް ޑިފެންސް ފޯސްއާ ގުޅިގެން މިނިސްޓްރީ އޮފް ޖެންޑަރގެ ފަރާތުން ހިންގި ހަރަކާތްތަކެއްގައި، އެމުއައްސަސާތަކުގެ ބައެއް މުވައްޒަފުން އެކުދިންނާ ހަޑިހުތުރު ބަހުން މުއާމަލާތުކޮށް، ބައެއް ކުޑަކުދިން ބިޑި އަޅުވައި، ޖިސްމާނީ އަދި ނަފްސާނީ އަނިޔާތަކެއް ދީފައިވާކަމަށް ތުހުމަތުކޮށް ހުށަހަޅާފައިވާ މައްސަލަތަކެއް ކަމަށް އެޗްއާރުސީއެމުން ބުނެފައިވެއެވެ.
އެ މައްސަލައިގައި ކުޑަކުދިންތަކަކާ ގުޅުންހުރި އަނިޔާގެ މައްސަލަ އެންޓި ޓޯޗަރ ގާނޫނުގެ ދަށުން ތަހުގީގުކޮށް، އެމައްސަލަތަކުގެ ލިޔުންތައް ހިއްސާކުރުމާއެކު، ދައުވާ ކުރުމާމެދު ވަކި ގޮތެއް ނިންމުމަށްޓަކައި ޕްރޮސިކިއުޓަރ ޖެނެރަލްގެ އޮފީހަށް މިހާރު ހުށަހަޅާފައިވާކަމަށެވެ.
އެޗްއާރުސީއެމުން ބުނީއެންޓި ޓޯޗަރ ގާނޫނުގެ 44 ވަނަ މާއްދާގެ (ހ)އިން, އަނިޔާކުރުމާއި ރަޙުމްކުޑަ އަމަލު ހިންގުމާއި، ލާއިންސާނީ އަމަލު ހިންގުމާއި، އިހާނެތި އަމަލު ހިންގުމާއި، އިންސާނީ ކަރާމާތް ގެއްލޭފަދަ އަދަބުދިނުމާ ދެކޮޅަށް މަސައްކަތްކުރުމާއި، އެކަންކަން ރާއްޖޭގައި ހިނގިޔަ ނުދިނުމަށްޓަކައި ކުރަންޖެހޭ ކަންކަންކުރުމާއި، އެގާނޫނުގެ ދަށުން ކުށްކަމުގައި ކަނޑައަޅާފައިވާ އަމަލުތައް ހިނގިޔަ ނުދިނުމަށްޓަކައި ސީދާގޮތުންނާއި ނުސީދާގޮތުން އަޅަންޖެހޭ ފިޔަވަޅުތައް އެޅުމުގެ ގާނޫނީ ޒިންމާ މަތިކޮށްފައިވަނީ އެ ކޮމިޝަނުގެ މައްޗަށް ކަމަށެވެ. އަދި މިކަންކަން ތަންފީޒު ކުރުމަށް ކުރަންޖެހޭ އެންމެހައި ކަންކަން ކުރުމުގެ ބާރުވެސް އެ ގާނޫނުގެ ދަށުން އެކޮމިޝަނަށް ލިބިދޭކަމަށް އެ ކޮމިޝަނުން ބުނެފައިވެއެވެ.
އެންޓި ޓޯޗަރ ގާނޫނާއި ހިއުމަން ރައިޓްސް ކޮމިޝަނުގެ ގާނޫނުގެ ދަށުން އެކޮމިޝަނަށް މަތިކޮށްފައިވާ ޒިންމާތައް އަދާކުރުމުގައާއި، ހުށަހެޅޭ މައްސަލަތައް ތަހުގީގުކުރުމުގައި، އެއްވެސް ފަރާތަކާމެދު ޒާތީ ތައައްސުބެއް ނޯންނާނެކަމުގެ ޔަގީންކަން އެކޮމިޝަނުން ވަނީ ދީފައެވެ. އަދި މައްސަލަތަކުގައި ގޮތް ނިންމަނީ ހަމައެކަނި ކުރިމަތީގައިވާ ހެކީގެ މައްޗަށް ބުރަވެ، އިންސާފުވެރިކަމާއި، އަދުލުވެރިކަމާއި، ނަޒާހާތްތެރިކަމާއެކުގައި ކަމަށް އެޗްއާރުސީއެމުން ބުނެފައިވެއެވެ.
ކުޑަކުދިންގެ ހިޔާގައި ހިނގައިދިޔަ ހާދިސާތަކާ ގުޅިގެން ކުރީގެ ޖެންޑަރ މިނިސްޓަރ ހިމެނޭހެން 30 މީހެއްގެ މައްޗަށް ދައުވާކޮށްދިނުމަށް އެދި އެޗްއާރްސީއެމްއިން ޕީޖީ އޮފީހަށް ފޮނުވާފައިވާއިރު، ކުރީގެ ޖެންޑަރ މިނިސްޓަރ ޒެނީޝާ ޝަހީދު ޒަކީއަށް ކޮށްފައިވާ ދައުވާތައް އަނބުރާ ގެންދިއުމަށް (ސަރުކާރުގެ އިސް ވެރިން ހިމެނޭހެން) ގިނަ ބަޔަކު ގެންދަނީ ގޮވާލަމުންނެވެ.
