ކުންފުނީގެ ނަން "މެޓާ" އަށް ބަދަލުކުރިޔަސް ފޭސްބުކް އެޕްލިކޭޝަންގެ ނަން ބަދަލެއް ނުވާނެ

ދުނިޔޭގެ އެންމެ ގިނަ މީހުން ބޭނުންކުރާ ސޯޝަލް މީޑިއާ ޕްލެޓްފޯމް ކަމަށްވާ ފޭސްބުކް ކުންފުނި ރީބްރޭންޑްކޮށް ކުންފުނީގެ ނަމަކަށް "މެޓާ" ކިޔަން ނިންމާފައިވާއިރު ފޭސްބުކް އެޕްލިކޭޝަންގެ ނަން ބަދަލު ނުވާނެ ކަމަށް އެ ކުންފުނީގެ ބާނީ މާކް ޒެކަބަކް ބުނެފިއެވެ.

ފޭސްބުކްއިން ބުރާސްފަތި ދުވަހުގެ ރޭ ބޭއްވި އިވެންޓްގައި ކުންފުނީގެ ނަމަކަށް މެޓާ ކިޔަން ނިންމާފައިވާ ކަމަށް އެ ކުންފުނީގެ ބާނީ މާކް ޒެކަބަކް ވަނީ އިއުލާން ކުރައްވާފައެވެ. ޒެކަބަކް ބުނީ ކުންފުނި ރީބްރޭންޑް ކުރުމުގެ މައިގަނޑު މަޤްޞަދަކީ އެ ކުންފުންޏަކީ ހަމައެކަނި ސޯޝަލް މީޑިއާ ކުންފުންޏެއްގެ ގޮތުގައި އޮތް އޮތުން ބަދަލުކުރުން ކަމަށެވެ. އަދި އެކަމަށް އެންމެ އެކަށޭނެ ނަމަކީ މެޓާ ކަމުގައި ދެކޭ ކަމަށާއި، ކުންފުނީގެ އަސްލު ބޭނުމަކީ އެކަކު އަނެކަކާ ގުޅުވައިދޭން މަސައްކަތް ކުރުން ކަމަށެވެ.

ޒެކަބަކް އިތުރަށް ބުނީ "ފޭސްބުކް" މި ނަމުން އެ ކުންފުނީގެ އަސްލު މަސައްކަތް އާންމުންނަށް ބުނެ ނުދެވޭ ކަމަށެވެ. ފޭސްބުކް ކުންފުނީގެ ނަން މެޓާއަށް ބަދަލުކުރަން ނިންމި ނަމަވެސް ފޭސްބުކް އެޕްގެ ނަން މެޓާއަށް ބަދަލުކުރާނެ ނުކުރާނެ ކަމަށް މިވަނީ ހާމަކޮށްފައެވެ.

ޒެކަބަކް ބުނީ ކުރިޔަށް އޮތްތަނުގައި ކުންފުނީގެ ދުވެލި އިތުރަށް ފުޅާވެގެން ދާނެ ކަމަށާއި، އެގޮތުން ކުރިޔަށް އޮތް އަހަރު ދުވަހުގެ ތެރޭގައި ދިހަ ބިލިއަން ޑޮލަރުގެ ޑިޖިޓަލް މާހައުލެއް ވެބްސައިޓް ބޭނުން ކުރާ މީހުންނަށް ގާއިމް ކޮށްދިނުމަށް ބޭނުންވާ ޓެކްނޮލޮޖީ ތަރައްގީކުރުމަށް ހޭދަކުރާނެ ކަމަށެވެ.