ކޮޕް26 ގައި ރަނގަޅު އެއްބަސްވުމަކާ ހިސާބަށް އާދެވޭނެ ކަމަށް ރައީސް ލަފާކުރައްވައިފި
29 އޮކްޓޯބަރު 2021 | ހުކުރު 05:59ރަނގަޅު އެއްބަސްވުމަކާ ހިސާބަށް އަންނަން ވަރަށް ގިނަ މަސައްކަތްތަކެއް އެކި ގޮތްގޮތަށް ކުރެވެމުންދާ ކަމަށް ރައީސް ވިދާޅުވި
ދުބާއީ އެކްސްޕޯ 2020ގައި ރާއްޖޭގެ ޤައުމީ ދުވަހުގެ މުނާސަބާ ފާހަގަކުރުމަށް ބޭއްވި ރަސްމީ ހަރަކާތުގައި ރައީސް ވާހަކަފުޅު ދައްކަވަނީ
ކޮޕް 26ގައި ރަނގަޅު އެއްބަސްވުމަކާ ހިސާބަށް އާދެވޭނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ލަފާކުރައްވައިފިއެވެ.
ކޮޕް26 ސަމިޓަށް ފުރާވަޑައިގަތުމުގެ ކުރިން ދުބާއީގައި ހުންނަވައިގެން ޕީއެސްއެމް ނިއުސްއަށް ދެއްވި އިންޓަރވިއުގައި ރައީސް ވިދާޅުވީ ރާއްޖެފަދަ ކުދި ޤައުމުތަކުން އަބަދުވެސް ވަކާލާތުކުރަމުން އަންނަނީ ދުނިޔެއަށް ކުރިމަތިވެފައިވާ މައްސަލައަށް ކަމަށެވެ. އަދި ޖައްވު ހޫނުވުމުގެ ސަބަބުން އަދި އިންސާނުން ކުރާ ކަންކަމުން ދުނިޔެއަށް އަންނަ ބަދަލުތަކުގެ ސަބަބުން މޫސުމަށް މި އަންނަ ބަދަލުތަކާއެކީގައި ހޫނުވެ ތަފާތު އެތައްކަމެއް އިހުސާސް ކުރެވެމުންދާ ކަމަށެވެ.
އުއްމީދަކީ ކުރާ މަސައްކަތުގައި ރަނގަޅު އެއްބަސްވުމަކާ ހިސާބަށް ކޮޕް 26ގައި އާދެވުން ކަމަށާއި، އެކަމަށްޓަކައި ވަރަށް ގިނަ މަސައްކަތްތަކެއް އެކި ގޮތްގޮތަށް ކުރެވެމުންދާ ކަމަށް ރައީސް ވިދާޅުވިއެވެ. އަދި އެ މަޤްޞަދާ ހަމައަށް ހާސިލްވުމުގެ ފުރުޞަތު މިފަހަރު ވަރަށް ބޮޑު ކަމަށް ޕީއެސްއެމް ނިއުސްއަށް ދެއްވި އިންޓަރވިއުގައި ވަނީ ވިދާޅުވެފައެވެ.
ރައީސް މިހެން ވިދާޅުވެފައިވާއިރު ކޮޕް26ން ރަނގަޅު ނަތީޖާއެއް ނެރުމަކީ އިންސާނުންގެ ދިރިތިބުމާ ގުޅިފައިވާ ކަމެއް ކަމަށް ފޮރިން މިނިސްޓަރ އަބްދުﷲ ޝާހިދު ވެސް ވަނީ ވިދާޅުވެފައެވެ. މިނިސްޓަރ ޝާހިދު މިފަދައިން ވިދާޅުވީ އދ. ގެ އާންމު މަޖިލީހުގެ އިންތިޚާބީ ރައީސްގެ ހައިސިއްޔަތުން ޖަޕާނުގެ ނިކެއި ނޫހަށް ދެއްވި އިންޓަރވިއުއެއްގައެވެ. މި އިންޓަރވިއުގައި ޝާހިދު ވިދާޅުވީ މޫސުމީ ބަދަލުތަކާ ބެހޭ ބައިނަލްއަގުވާމީ ބައްދަލުވުން، ކޮޕް26ން ރަނގަޅު ނަތީޖާއެއް ހޯދުމަކީ އިންސާނުންގެ ދިރިތިބުމާ ގުޅިފައިވާ ކަމެއް ކަމަށެވެ.
ވަކިން ޚާއްސަކޮށް ރާއްޖެ ފަދަ ކުޑަ ގައުމަކަށް މޫސުމީ ބަދަލުތަކުން ލިބޭ ގެއްލުން ބޮޑުކަމަށާއި، މިހާރުވެސް މިކަމުގެ ސަބަބުން އެކި ކަންކަމާ ކުރިމަތިލާންޖެހޭ ކަމަށް މިނިސްޓަރ ވިދާޅުވިއެވެ. އެހެންކަމުން މި ކޮންފަރެންސުން ނިންމާ ނިންމުންތަކަކީ ބައެއްގެ ފުރާނައާ ގުޅިފައިވާ ނިންމުންތަކަކަށް ވާނެ ކަމަށް ޝާހިދު ވިދާޅުވިއެވެ.
ދުނިޔޭގެ އެންމެ ބޮޑު ތިމާވެށީގެ ސަމިޓް ކޮޕް26 ފަށާނީ އަންނަ އާދީއްތަ ދުވަހުއެވެ. މިއަހަރުގެ ކޮޕް ސަމިޓުގައި 100ށްވުރެ ގިނަ ޤައުމުގެ އެންމެ އިސްވެރިން ބައިވެރިވެވަޑައިގަތުމަށް ވަނީ ހަމަޖެހިފައެވެ. މި ސަމިޓު ބާއްވަނީ ސްކޮޓްލޭންޑްގެ ގްލާސްގޯވގައެވެ.
