100 ކިލޯ ޑްރަގް ކޭސްގައި ހިމެނޭ ޒައިދުއާއި ޝިނާން ވެސް ދޫކޮށްލައިފި

ރާއްޖެއަށް 100 ކިލޯއަށް ވުރެ ގިނަ މަސްތުވާތަކެތި އެތެރެކުރިކަމުގެ ތުހުމަތުގައި ހައްޔަރުކުރި 10 މީހުންގެ ތެރެއިން އެކަކު އަނެއްކާވެސް ދޫކޮށްލައިފިއެވެ.

މި މައްސަލައިގައި އެންމެ ފުރަތަމަ ދޫކޮށްލާފައިވަނީ 100 ކިލޯ އެތެރެ ކުރުމުގައި އިސްކޮށް އުޅުނު ކަމަށް ފުލުހުން ތުހުމަތުކުރާ 2 މީހުންނެވެ. އެމީހުންނަކީ މާރާމާރީއާއި، ތޫނު ހަތިޔާރު ބޭނުންކޮށްގެން މީހުންނަށް ޙަމަލާ ދިނުން ފަދަ މައްސަލަތަކުގެ ތުހުމަތުގައި މީގެ ކުރިން ވެސް ހައްޔަރު ކޮށްފައިވާ ބައެކެވެ.

Advertisement

އޭގެ ފަހުން މި މައްސަލައިގައި ހައްޔަރު ކުރި މީހުންގެ ތެރޭގައި ހިމެނޭ ގއ. ދެއްވަދޫ، ދޭލިޔާގެ، މިދުހަތު އިބްރާހިމް، 26 ވެސް ވަނީ ދޫކޮށްލާފައެވެ.

ރާއްޖެއެމްވީއަށް އެނގިފައިވާ ގޮތުގައި މި މައްސަލައިގައި ހައްޔަރުކުރި ގއ. ކޮލަމާފުށި ސޯސަންގެ އިބްރާހިމް ޒައިދު ހަބީބްއާއި، ހދ. ކުމުންދޫ ޑިއާފްރެންޑް އިބްރާހިމް ޝިނާނު ވެސް ކްރިމިނަލް ކޯޓުން މިހާރު ވަނީ ދޫކޮށްލާފައެވެ.

މި މައްސަލައާ ގުޅިގެން ފުލުހުން ހައްޔަރުކުރި 10 މީހުންގެ ތެރޭގައި ނ. ވެލިދޫ ބީޗްހެވަން ޖުމާން މުސްތަފާ، ލ. ކަލައިދޫ ޖަނަވަރީމާގެ މުޙައްމަދު އަހުމަދާއި، ދ. ބަނޑިދޫ ޕޮލަރިސް މުޙައްމަދު ހުސައިންގެ އިތުރުން، ބަންގްލަދޭޝްގެ 2 މީހުން ވެސް ހިމެނެއެވެ.

މި މައްސަލައިގައި ހައްޔަރުކުރި މީހުންގެ ތެރެއިން ފުލުހުން ވަނަވަރު އާއްމުކުރީ 8 މީހެއްގެއެވެ.

މި މީހުން ހައްޔަރުކުރި އޮޕަރޭޝަން ކުރިއަށް ގެންދިޔައީ، އޮކްޓޯބަރ މަހުގެ 13 ވަނަ ދުވަހުއެވެ. އެ އޮޕަރޭޝަންގައި ރާއްޖޭގެ ބައެއް ފަޅު ރަށްތަކާއި، ހުޅުމާލެއާއި މާލެ އާއި މާލޭގެ ބައެއް ގޭގޭގެ އިތުރުން ސަފާރީއަކާއި ލޯންޗެއް ބަލައި ފާސްކުރިއެވެ. 100 ކިލޯއަށްވުރެގިނަ މަސްތުވާތަކެތި ހޯދާފައިވަނީ ފަޅުރަށެއް ކަމަށްވާ އދ. ބޮޑުކާށިހުރާއިންނެވެ.

މިއޮޕަރޭޝަންގެ އިތުރުން އޮކްޓޯބަރ މަހުގެ 15 ވަނަދުވަހު 215 ކިލޯގެ މަސްތުވާތަކެތި ރ. އޮތޮޅުން ވަނީ އަތުލައިގެންފައެވެ. އެ އޮޕަރޭޝަންގައި ވެސް ދެ މީހަކު ވަނީ ހައްޔަރުކޮށްފައެވެ.