'ދެން އަހަރެންބާ؟' ޕެނަލް ޑިސްކަޝަން މިރޭ ބާއްވަނީ
ޕެނަލް ޑިސްކަޝަން ފެށެނީ މިރޭ 09:30 ގައި
'ދެން އަހަރެންބާ؟' ޕެނަލް ޑިސްކަޝަން
ޔާމީން ރަޝީދުގެ މަރުގެ މައްސަލައަށް އިންސާފު ހޯދައިދިނުމަށް ކުރާ މަސައްކަތުގެ ތެރެއިން " ދެން އަހަރެންބާ؟" ގެ ނަމުގައި ބާއްވާ ޚާއްސަ ޕެނަލް ޑިސްކަޝަން ރާއްޖެޓީވީ ލައިވް ކުރުމަށް ނިންމައިފި އެވެ.
މި ޕެނަލް ޑިސްކަޝަން އިންތިޒާމުކޮށްފައިވަނީ ޓްރާސްންޕޭރެންސީ މޯލްޑިވްސް އިންނެވެ.
ބުރާސްފަތި ދުވަހުގެ ރޭ 09:30 އިން 10:30 އަށް ބާއްވާ އިރު މި ޕެނަލްގައި އެކި ދައިރާތަކުން ފާހަގަކޮށްލެވޭ ފަރާތްތަކުން ބައިވެރިވާނެއެވެ. އެގޮތުން މޯލްޑިވްސް ޑިމޮކްރެޓިކް ނެޓްވޯކްގެ އެގްޒެކެޓިވް ޑިރެކްޓަރ ޝަހިންދާ އިސްމާއިލް އާއި އެ ޖަމިއްޔާގެ ބޯޑް މެންބަރު މުހައްމަދު ހަމީދާއި ގާނޫނީ ވަކީލު ހުސްނު ސުއޫދުގެ އިތުރުން ވެސް އިންސާނީ ހައްގުތަކަށް މަސައްކަތް ކުރާ ގިނަ ފަރާތްތަކެއް ބައިވެރިވުމަށް ވަނީ ހަމަޖެހިފަ އެވެ.
މި ޕެނަލް ޑިސްކަޝަން ކްލިކް ކޮލެޖުގެ ހަތަރު ވަނަ ފްލޯގައި ކުރިއަށްދާ އިރު، މި ޕެނަލްގައި ބައިވެރިވާ ފަރާތްތަކުން، ޔާމީން ރަޝީދުގެ މަރާ ގުޅިގެން އުފެދިފައިވާ ކަންބޮޑުވުންތައް ފާޅު ކުރުމަށް ވަނީ ހަމަޖެހިފަ އެވެ.
މިދިޔަ އޭޕްރީލް މަހުގެ 22 ވަނަ ދުވަހުގެ ރޭގެ ދަންވަރުގެ ވަގުތެއްގައި އަނިޔާވެރިގޮތަކަށް މަރާލެވުނު ޔާމީނު ރަޝީދުގެ މަރާގުޅިގެން ހަތް މީހަކު ހައްޔަރުކޮށްފައިވާ ކަމަށް ފުލުހުން ބުނެ އެވެ. މި މައްސަލައާ ގުޅިގެން އިތުރު އެއްވެސް މައުލޫމާތެއް ފުލުހުން ހާމަކޮށްފައެއް ނުވެ އެވެ.
