މިހާރު ކުރިއަށްދާ ޓީ20 ވޯލްޑް ކަޕުގައި ބުރާސްފަތި ދުވަހު ކުޅުނު މެޗުން ސްރީ ލަންކާ އަތުން އޮސްޓްރޭލިއާ މޮޅުވެއްޖެއެވެ.

ގްރޫޕް އެކެއްގައި ހިމެނޭ އޮސްޓްރޭލިއާއިން މި މުބާރާތުގައި ކުޅުނު ދެވަނަ މެޗުން މޮޅުވީ ލަންކާ އަތުން ހަތް ވިކެޓުންނެވެ.

ޔުނައިޓެޑް އަރަބި އެމިރޭޓްސް (ޔޫއޭއީ) ގައި ކުޅުނު މެޗުގެ ޓޮސް ދިމާވުމުން އޮސްޓްރޭލިއާއިން ނިންމީ ހޮވުމަށެވެ. އެއާއެކު ލަންކާ އެންމެ ފުރަތަމަ ކުޅެން އަރައި، 20 އޯވަރު ހަމަވިއިރު ހަ ކުޅުންތެރިން ނުބައިވެގެން ހެދުނީ 154 ލަނޑެވެ. އެ ގައުމުން އެންމެ ރަނގަޅަށް ކުޅުނީ 25 ބޯޅައިން 35 ލަނޑު ހެދި ކުސަލް ޕެރޭރާ އާއި، 27 ބޯޅައިން 35 ލަނޑު ހަމަކުރި ޗަރިތު އަސަލަންކާގެ އިތުރުން 26 ބޯޅައިން 33 ލަނޑު ހެދި ބާނުކާ ރާޖަޕަކްސައެވެ.

ޖަވާބުގައި އޮސްޓްރޭލިއާ ކުޅެން އަރައި 17 އޯވަރުގެ ތެރޭގައި ތިން ކުޅުންތެރިއަކު ނުބައިވެގެން ވަނީ 155 ލަނޑު ހަދައި، މެޗު ކާމިޔާބުކޮށްފައެވެ. އެ ގައުމުން އެންމެ ރަނގަޅަށް ކުޅުނީ 42 ބޯޅައިން 65 ލަނޑު ހެދި ޑޭވިޑް ވާނާ އާއި 23 ބޯޅައިން 37 ލަނޑު ހަމަކުރި އާރޮން ފިންޗެވެ.

މި މެޗުން އޮސްޓްރޭލިއާ މޮޅުވިއިރު، މި މުބާރާތުގައި ކުޅުނު ފުރަތަމަ މެޗުން އެ ގައުމު ވަނީ ސައުތު އެފްރިކާ އަތުން ފަސް ވިކެޓުން މޮޅުވެފައެވެ. އެއާއެކު ގްރޫޕް އެކެއްގެ އެއްވަނައިގައި އޮތް އިންގްލެންޑާއި ދެވަނައިގައި އޮތް އޮސްޓްރޭލިއާއަށް ވަނީ ހަތަރު ޕޮއިންޓް ލިބިފައެވެ. ތިންވަނައިގައި އޮތް ސައުތު އެފްރިކާ އާއި ހަތަރުވަނައިގައި އޮތް ލަންކާއަށް ދެ ޕޮއިންޓް ލިބިފައިވާއިރު، ބަންގްލަދޭޝް އާއި އެންމެ ފަހުގެ ޗެމްޕިއަން ވެސްޓް އިންޑީޒަށް ޕޮއިންޓެއް ލިބިފައެއް ނުވެއެވެ.

މި މުބާރާތުގައި އޮސްޓްރޭލިއާ ދެން ވާދަކުރަން ޖެހޭނީ އިންގްލެންޑާއެވެ. އެ މެޗު ކުޅޭނީ ހޮނިހިރު ދުވަހެވެ.