ޖަރުމަން ކަޕުގެ ދެވަނަ ބުރުގައި ބުދަ ދުވަހުގެރޭ ކުޅުނު މެޗުން ފަސޭހަކަމާއެކު ވަރުގަދަ ބަޔާން މިއުނިކް ބަލިކޮށް، ގަދަ 16 ގެ ޖާގައެއް ބޮރޫޝިއާ މޮންޗެންގްލަޑްބަކުން ހޯދައިފިއެވެ.

އަމިއްލަ ދަނޑުގައި ކުޅުނު މެޗުން މޮންޗެންގްލަޑްބަކް މޮޅުވީ 5-0 ގެ ތަފާތު ބޮޑު ނަތީޖާއަކުންނެވެ. މިއީ 1978 ވަނަ އަހަރަށްފަހު މިހާ ތަފާތު ބޮޑުކޮށް މެޗަކުން ބަޔާން ބަލިވި ފުރަތަމަ ފަހަރެވެ.

ބުދަ ދުވަހުގެރޭ ކުޅުނު މެޗު ފަށައިގެން 21 މިނެޓު ތެރޭ މޮންޗެންގްލަޑްބަކުން ވަނީ ތިން ލަނޑު ޖަހާފައެވެ. އެގޮތުން މެޗު ފަށައިގެން ދެވަނަ މިނެޓުގައި އެ ޓީމަށް ލީޑު ނަގައިދިނީ ކޮއަޑިއޯ ކޯނޭއެވެ. އަދި މެޗުގެ 15 ވަނަ މިނެޓުގައި ރަމީ ބެންސެބައިނީ މޮންޗެންގްލަޑްބަކަށް ލީޑު ފުޅާކޮށްދިންއިރު، މެޗުގެ 21 ވަނަ މިނެޓުގައި ލިބުނު ޕެނަލްޓީއަކުން ބެންސެބައިނީ ވަނީ އެ ޓީމުގެ ތިންވަނަ ލަނޑު ޖަހާފައެވެ.

މި މެޗުގެ ދެވަނަ ހާފުގައިވެސް މޮންޗެންގްލަޑްބަކުން މޮޅު ކުޅުމެއް ދެއްކިއިރު، މި ހާފު ފަށައިގެން ހަވަނަ މިނެޓުގައި އެ ޓީމުގެ ހަތަރުވަނަ ލަނޑު ޖަހައިދީފައެވެ. އަދި އޭގެ ހަ މިނެޓު ފަހުން އެމްބޯލޯ ވަނީ އިތުރު ލަނޑެއް ޖަހައި، މޮންޗެންގްލަޑްބަކަސް ފަސް ލަނޑު ހަމަކޮށްދީފައެވެ.

މި ނަތީޖާއާއެކު މި ސީޒަނުގެ ޖަރުމަން ކަޕުގެ ދެވަނަ ބުރުން ބަޔާން ކެޓިއިރު، މިދިޔަ ސީޒަނުގެ މުބާރާތުންވެސް އެ ޓީމު ކަޓާފައިވަނީ ދެވަނަ ބުރުންނެވެ. އެ ފަހަރު ބަޔާން ބަލިވީ ދެވަނަ ޑިވިޝަނުގެ ޓީމެއް ކަމަށްވާ ހޯލްސެން ކިއެލް އަތުންނެވެ. ބަޔާން ބަލިކޮށް ޖަރުމަން ކަޕުގެ ގަދަ 16 އަށް މޮންޗެންގްލަޑްބަކް ދަތުރުކުރިއިރު، ގަދަ 16 ގެ މެޗުތައް ކުޅޭނީ އަންނަ އަހަރުގެ ޖެނުއަރީ މަހުގެ ތެރޭގައެވެ.