ޓެރިފް އެކި ގޮތްގޮތަށް ޗާޖްކުރާ ކަމަށް އެއްވެސް ބަޔަކަށް ނުބުނެވޭނެ: އެމްޕީއެލް ބޯޑުގެ ޗެއާމަން
27 އޮކްޓޯބަރު 2021 | ބުދަ 19:28އެމްޕީއެލްގެ ތިން ޕޯޓުގައި ވެސް ބޭނުންކުރަނީ އެއް ޓެރިފެއް
އެމްޕީއެލް ބޯޑްގެ ޗެއާމަން މުޙައްމަދު ޝަރީފް
ޓެރިފް އެކި ގޮތްގޮތަށް ޗާޖް ކުރާ ކަމަށް އެއްވެސް ބަޔަކަށް ނުބުނެވޭނެ ކަމަށް އެމްޕީއެލް ބޯޑްގެ ޗެއާމަން މުޙައްމަދު ޝަރީފް ވިދާޅުވެއްޖެއެވެ.
ރައްޔިތުންގެ މަޖިލީހުގެ އެސްއޯއީ ކޮމެޓީގައި އެމްޕީއެލްއިން އައްޑޫސިޓީގެ ހިތަދޫ ބަނދަރުން ޗާޖުކުރާ މިންވަރު ނުވަތަ ބޯޓް ޓެރިފް ބޮޑުކަމަށް މޯލްޑިވްސް ސްޓޭޓް ޝިފިންގގެ މެނޭޖިންގ ޑިރެކްޓަރ ޢަބްދުﷲ ސަޢީދު ދެއްކެވި ވާހަކައަށް ރައްދު ދެއްވައި, ބުދަ ދުވަހުގެ ރޭ ފަލަސުރުޚީ ޕްރޮގްރާމުގައި ވާހަކަ ދައްކަވަމުން ޝަރީފް ވިދާޅުވީ; އެމްޕީއެލްގެ ތިން ޕޯޓުގައި ވެސް ބޭނުންކުރަނީ އެއް ޓެރިފެއް ކަމަށާއި އެއީ މެނޭޖްމަންޓުން ހަމަ ހުރެފައި ބަދަލު ގެނެވޭނެ އެއްޗެއް ނޫން ކަމަށެވެ. އަދި އަގުތައް ފާސްކުރުމަށްފަހު ފިނޭންސް މިނިސްޓްރީއަށް ކޮޕީ ފޮނުވާ ކަމަށް އޭނާ ވިދާޅުވިއެވެ.
ޓެރިފް ނަގަން ފެށުމުން ރާއްޖެއަށް ލިބުނު އާމްދަނީ އިތުރުވެގެން ދިޔަ ކަމަށާއި ޓެރިފްއަކީ ކުންފުންޏަށް ފައިދާ ލިބުމުގައި މުހިންމު ދައުރެއް އަދާ ކުރާ އެއްޗެއް ކަމަށް ޝަރީފް ވިދާޅުވިއެވެ. ޓެރިފްއާ ގުޅިގެން އެއްވެސް ބަޔެއްގެ ޝަކުވާތައް މިހާތަނަށް އައިސްފައިނުވާ ކަމަށް ވެސް އޭނާ ވިދާޅުވިއެވެ.
މޯލްޑިވްސް ސްޓޭޓް ޝިފިންގއާ ވަރަށް ރަނގަޅަށް ވާހަކަތައް ދެކެވި ކްރެޑިޓް ފެސިލިޓީތައް ވެސް ދީފައިވާ ކަމަށް ޝަރީފް ވިދާޅުވިއެވެ. ހުރިހާ ކުންފުންޏެއްގައި ވެސް ފްރައިޓް ޗާޖް ކަސްޓަމަރުންގެ އަތުން ނަގަނީ ޝިޕްގެ ވެރިފަރާތުން ކަމަށް ވެސް އޭނާ ވިދާޅުވިއެވެ. މިކަން އާންމުން ރައްޔިތުންނަށް އޮޅިފައިވާ ކަމަށް ފާހަގަކުރެއްވިއެވެ.
ޝިޕްގެ ވެރިފަރާތުން އެމްޕީއެލްއަށް ދައްކަން ޖެހޭ ފައިސާ ކަސްޓަމަރުންގެ އަތުން ނަގަން ކުންފުނިތަކުން ޑިމާންޓް ކުރާކަން ފާހަގަކުރައްވައި ޝަރީފް ވިދާޅުވީ, މޯލްޑިވްސް ސްޓޭޓް ޝިފިންގއިން އައްޑޫ ޕޯޓަށް 12 ވަރަކަށް ދަތުރުކޮށްފައިވާ ކަމަށެވެ.
އޭގެ ތެރެއިން ފައިސާ ދައްކާފައިވަނީ މަދު ދަތުރުތަކަށް ކަމަށާއި އެހެންނަމަވެސް އެކަމުގެ ޝަކުވާ އެމްޕީއެލް އިން ނުކުރާ ކަމަށް ޝަރީފް ވިދާޅުވިއެވެ.
ބޯޓު ހުސްކުރަން 20 ދުވަސް ނަގާކަމަށް ބުނެ އެމްއެސްއެސް ދައްކަނީ ދޮގު ވާހަކަތަކެއް ކަމަށާއި, އެންމެ ފަހުން ވެސް ކަނޑުގަދަވެގެން 4 ދުވަހުން ބޯޓު ހުސްކުރި ކަމަށް ޝަރީފް ވަނީ ފާހަގަކުރައްވާފައެވެ.
އެމްޕީއެލްގެ އަގާއި ހިތަދޫ ޕޯޓުގައި މަސައްކަތް ކުރާ މުވައްޒަފުންގެ އަގު ވެއްޓޭ ގޮތަށް ވާހަކަ ދެއްކުމަކީ ދެރަކަމެއް ކަމަށާއި އެކަން ކުށްވެރި ކުރައްވާ ކަމަށް ޝަރީފް ވިދާޅުވިއެވެ.
ހުރިހާ ކަސްޓަމަރުންނަށް ވެސް, އަދި ޝިޕްގެ ވެރިފާރަތްތަކަށް ވެސް ފަސޭހައިން ކުންފުނީގެ ވެރިންނާއި ބޯޑު މެމްބަރުންނާއި ވެސް ބައްދަލުކޮށް ހުރި ދަތިތަކުގެ ވާހަކަތައް ހިއްސާ ކުރެވޭނެ ކަމަށް ޝަރީފް ވިދާޅުވިއެވެ.
