ނަރީޝް ވިލިމާލެ ކައުންސިލަރު ނަހުލާއަށް "ކުއްތާ" އަށް ގޮވިކަމުގެ ތުހުމަތު

މާލޭ ސިޓީގެ ޑެޕިއުޓީ މޭޔަރ ނަރީޝް ވިލިމާލެ ކައުންސިލަރު ނަހުލާއަށް "ކުއްތާ" އަށް ގޮވިކަމަށް އިތުބާރު ހުރި މަސްދަރަކުން މައުލޫމާތު ދީފިއެވެ.

ކައުންސިލުން ރާއްޖެއެމްވީއަށް މައުލޫމާތު ދިން އިތުބާރު ހުރި ފަރާތަކުން ވަނީ އެކަން ކަށަވަރު ކޮށްދީފައެވެ. އެގޮތުން ނަހުލާއާމެދު ނުރުހުންވެ ނަރީޝް އެ މޭރުމުން ނަހުލާއާ ވާހަކަ ދައްކަވާފައިވަނީ ކައުންސިލުގެ ބައްދަލުވުމެއްގެ ތެރެއިންނެވެ. ރާއްޖެއެމްވީއަށް މައުލޫމާތު ދިން ފަރާތުން ބުނާ ގޮތުގައި ނަރީޝް ވަނީ ކައުންސިލް ތެރޭގައި ނަހުލާއަށް "ކުއްތާ" އަށް ގޮވައި، ބޭއަދަބީ ބަހުން ވާހަކަ ދައްކަވައި، ނުރުހުން ފާޅު ކުރައްވާފައެވެ.

އެހެންނަމަވެސް، މި ތުހުމަތުތައް ނަރީޝް ވަނީ ދޮގު ކުރައްވާފައެވެ. ރާއްޖެއެމްވީއާ ވާހަކަ ދައްކަވަމުން ނަރީޝް ވިދާޅުވީ، އެފަދަ ކަމެއް އެނގިވަޑައިގެންފައި ނުވާ ކަމަށާއި، އެއްވެސް ކައުންސިލަރަކު އެފަދަ އެއްޗެއް ވިދާޅުވިކަން އެނގިވަޑައިގެންފައި ނުވާ ކަމަށެވެ.

އެކަމާ ގުޅޭގޮތުން ނަހުލާއާ ސުވާލުކޮށްލުމުން ނަހުލާ ވަކި އެއްޗެއް ވިދާޅެއް ނުވެއެވެ. ނަމަވެސް އެ ތުހުމަތުތައް ދޮގު ކުރައްވާފައެއްވެސް ނުވެއެވެ.

ވިލިމާލޭގެ ސިނަމާލެ-4 ފެލްޓްގައި ދިރިއުޅޭ މީހުންނަށް ފްލެޓް އަމިއްލަ ކުރެވޭނެ އެއްވެސް ގޮތެއް އެއްވެސް ފަރާތަކުން ހަދައިދީފައިނުވާ ކަމަށާއި، ފްލެޓް އަމިއްލަ ވާނެ ގޮތެއް ކަނޑައެޅިފައި ނެތްކަމަށް ވިދާޅުވެ، ނަހުލާ ދައްކަވަމުން ގެންދަވާ ވާހަކަތަކާ ގުޅިގެން ކައުންސިލް ތެރޭގައި ވަނީ ދެބަސްވުންތައް އުފެދިފައެވެ. އެގޮތުން ވިލިމާލޭގެ ރައްޔިތުންގެ ހައްގުގައި ކައުންސިލަރުގެ ހައިސިއްޔަތުން ގިނަ މަސައްކަތްތަކެއް ކުރަމުންދާކަން ފާހަގަކުރައްވައި ނަހުލާ ވެސް ވަނީ މިއަދާ ހަމައަށް މަސައްކަތްތައް ކުރުމުގައި މޭޔަރު މުއިއްޒުގެ ސަބަބުން ވަރަށް ބޮޑަށް ހުރަސްއެޅި، ގިނަ ގޮންޖެހުންތައް ކުރިމަތިވާކަން ފާހަގަ ކުރައްވާފައެވެ.

ނަހުލާ މީގެ ކުރިން ވަނީ ރާއްޖެއެމްވީއަށް ވެސް އެވާހަކަތައްހިއްސާ ކުރައްވާފައެވެ.

އަދި އެއްވެސް މަސައްކަތެއްގައި މާލޭގެ މޭޔަރުގެ ފަރާތުން އެއްބާރުލުން ނުލިބޭ ކަމަށް ނަހުލާ ވިދާޅުވިއެވެ. އެ ވާހަކަތަކާއި ގުޅިގެން މުއިއްޒުގެ އިތުރުން، ނަރީޝްގެ ނުރުހުން ނަހުލާއަށް އަމާޒުވެފައިވާކަމަށް ރާއްޖެއެމްވީއާ ވާހަކަ ދެއްކެވި ފަރާތުން ބުނެއެވެ.

ޒާތީ މަސްލަހަތު އިސްކޮށް ކުރަމުންދާ މަސައްކަތްތަކުން މިއަދު ދެރަނިކަމެތިކަން ލިބެމުންދަނީ ވިލިމާލޭގެ ރައްޔިތުންނަށްކަން ނަހުލާ ފާހަގަކުރައްވާފައިވެއެވެ. ރައްޔިތުން އެދޭ ފަދަ މަސައްކަތްތަކެއްކޮށް، މައްސަލަތައް ހައްލު ކުރުމަށް މަސައްކަތް ކުރި ނަމަވެސް މިއަދު ހުރިހާ ކަމަކަށް ހުރަސްއެޅިގެންދާކަމަށް ނަހުލާ ވިދާޅުވެއެވެ.