ބްރެޒިލްގެ ރައީސް ޖައިރް ބޮލްސޮނާރޯގެ މައްޗަށް ދައުވާކުރަން ފެންނަކަމަށް އެ ޤައުމުގެ ސެނެޓުން ވެސް ނިންމައިފިއެވެ.
ބްރެޒިލްގެ ސެނެޓުގެ އިންވެސްޓިގޭޝަން ކޮމިޓީން އަންގާރަ ދުވަހު ވަނީ ރައީސް ބޮލްސޮނާރޯގެ މައްޗަށް ދައުވާ ކުރަންޖެހޭކަމަށް ބަޔާންކޮށް އެކުލަވާލާފައިވާ ރިޕޯޓެއް ފާސްކޮށްފައެވެ. އެގޮތުން މި ރިޕޯޓުގައި ވަނީ ބޮލްސޮނާރޯގެ މައްޗަށް ތުހުމަތު ކުރެވޭ 9 މައްސަލައެއްގައި ދައުވާކުރަން ފެންނަކަމަށް ބަޔާންކޮށްފައެވެ. އޭގެ ތެރޭގައި ކޮވިޑުގެ ބަލިމަޑުކަމުގެ ތެރޭގައި ބޮލްސޮނާރޯ އަމަލުކުރެއްވިގޮތާ ގުޅޭ މައްސަލަތަކާއި، އިންސާނިއްޔަތުކަމާ ޚިލާފަށް ނިންމެވުންތައް ނިންމަވާފައިވާކަމަށް ތުހުމަތު ކުރެވޭ މައްސަލަތައް ވެސް ހިމެނެއެވެ.
1300ށް ވުރެ ގިނަ ސޮފްޙާގެ މައްޗަށް އެކުލެވޭ މި ރިޕޯޓު ތައްޔާރުކުރުމަށް 6 މަހުގެ މުއްދަތެއް ހޭދަވެފައިވާކަމަށް އެ ޤައުމުގެ ކަމާބެހޭ ފަރާތްތަކާ ޙަވާލާދީ އަލްޖަޒީރާގައި ރިޕޯޓު ކޮށްފައިވެއެވެ.
ބޮލްސޮނާރޯގެ އިތުރުން، 10 މީހަކަށް ދައުވާ ކުރަންޖެހޭކަން މި ރިޕޯޓުގައި ފާހަގަކޮށްފައިވެއެވެ.
މި ރިޕޯޓާ ގުޅިގެން ނޫސްވެރިންނާ ވާހަކަ ދައްކަވަމުން ބޮލްސޮނާރޯގެ ދަރިކަލުން ސެންލާވިއޯ ބޮލްސޮނާރޯ ވިދާޅުވީ، އެ ރިޕޯޓަކީ ޤާނޫނީ ގޮތުން ބަލިކަށި، އަދި ސިޔާސީ މަޤްޞަދެއްގައި އެކުލަވާލާފައިވާ ރިޕޯޓެއް ކަމަށެވެ. އަދި މިއީ ބޮލްސޮނާރޯއަށް ގެއްލުން ދިނުމުގެ މަޤްޞަދުގައި އެކުލަވާލާފައިވާ ރިޕޯޓެއްގެ ގޮތުގައި ސެންލާވިއޯ ވަނީ ސިފަކުރައްވާފައެވެ.
ރިޕޯޓުތައް ބުނާގޮތުން އެ ޤައުމުގެ އިދިކޮޅުގެ އަޣުލަބިއްޔަތު އޮންނަ ސެނެޓުގެ އިންވެސްޓިގޭޝަން ކޮމިޓީން އެކުލަވާލި މި ރިޕޯޓުގައި އެހެން ބަޔާންކޮށްފައިވީނަމަވެސް، ބޮލްސޮނާރޯއަށް ދައުވާ ކުރުމަކީ ވަރަށް ދުރުގައިވާ ކަމެކެވެ. ސަބަބަކީ އެ ޤައުމުގެ ޕްރޮސެކިއުޓަރ ޖެނެރަލް އޮގަސްޓޯ އަރާސްއަކީ ބޮލްސޮނާރޯ އައްޔަނު ކުރައްވާފައިވާ، އެމަނިކުފާނަށް ވަފާތެރި ބޭފުޅަކަށްވާތީ ކަމަށް އެ ޤައުމުގެ މަސްރަހު ދިރާސާ ކުރާ ފަރާތްތަކުން ބުނެއެވެ.
ބްރެޒިލްގައި ކޮވިޑު ބަލީގައި މަރުވާ މީހުންގެ އަދަދު ރެކޯޑު އަދަދުތަކުން މައްޗަށް ގޮސް، އެންމެ ފަހުން އެ ޤައުމުން މަރުވި މީހުންގެ ޖުމުލަ އަދަދު ވަނީ ހަލައްކައިން މައްޗަށް ގޮސްފައެވެ. އެއާއެކު އާންމުންނާއި، ނޫސްވެރިންގެ ގިނަ ސުވާލުތަކާއި ކަންބޮޑުވުންތައް ބޮލްސޮނާރޯއަށް ދަނީ އަމާޒުވަމުންނެވެ. އެހެންނަމަވެސް، ކޮވިޑް-19 ބަލިމަޑުކަމުގައި މީހުން މަރުވަމުންދަނީ އަލަށް ނޫންކަމަށާއި، އެއީ މިހާރު ފޫހި ވާހަކަތަކެއް ކަމަށް ވިދާޅުވެ ބޮލްސޮނާރޯ ވަނީ އެކި ފަހަރުމަތިން އެކަމުގެ ނުރުހުން ފާޅު ކުރައްވާފައެވެ.
ކޮވިޑް ކޮންޓްރޯލްކުރުމުގައި ބޮލްސޮނާރޯ ގެންގުޅުއްވާ ސިޔާސަތުތަކުގެ ސަބަބުން އެގައުމުގައި ބޮލްސޮނާރޯއަށް އޮންނަ ތާއީދުވަނީ ވަރަށް ބޮޑަށް ދަށްވެފައެވެ. އެހެންކަމުން އަންނަ އަހަރު އޮންނަ އިންތިޚާބުގައި ބޮލްސޮނާރޯއަށް ނާކާމިޔާބީއާ ކުރިމަތިވުމަކީ ވަރަށް ގާތްކަމެއްކަމަށް ދިރާސާކުރާ ފަރާތްތަކުން ބުނެއެވެ.
