ހޯޑެއްދޫގައި ހުޅަނގު އުތުރުން އޮންނަ ކުޅިތަކުގެ ގުދުރަތީ ރީތިކަން ދަމަހައްޓަނީ!
27 އޮކްޓޯބަރު 2021 | ބުދަ 03:22އާންމުންނަށް ބޭނުންކުރެވޭ ގޮތަށް ނޭޗަރ ޕާކް ސަރަހައްދު ބައްޓަން ކުރާނެ
އެއްބަސްވުމުގައި ސޮއިކުރި ރަސްމިއްޔާތުގެ ތެރެއިން،
ގދ. ހޯޑެއްދޫގައި ހުޅަނގު އުތުރުން އޮންނަ ކުޅިތަކުގެ ގުދުރަތީ ރީތިކަން ދަމަހައްޓައި، އެތަނަކީ އިޖުތިމާއީ ގޮތުންނާއި، އިޤްތިޞާދީ ގޮތުން ބޭނުންހިފޭ، މުހިންމު ނޭޗަރ ޕާކެއްގެ ގޮތުގައި ތަރައްގީކުރުމަށް ހޯޑެއްދޫ ކައުންސިލާއި ހުވަދޫ އެއިޑާ ދެމެދު ސޮއިކޮށްފިއެވެ.
މިއީ ކުޅިތަކާއި، ގޮނޑޮށް އަދި މޫދުގެ ރީތި ގުދުރަތީ މާހައުލު ހިމާޔަތްކޮށް، ދެމެހެއްޓެނިވި ގޮތަކަށް، ބޭނުންކޮށް، އާއިލާތަކަށް ހިތްހަމަޖައްސާލަން ދެވޭ ހިތްފަސޭހަ މައިދާންތަކަކަށް ބަދަލުކުރުމަށް ހޯޑެއްދޫ ކައުންސިލުން ވެފައިވާ ވައުދާ އެއްގޮތަށް ކައުންސިލްއާއި ހުވަދޫ އެއިޑްއާ ގުޅިގެން ހިންގޭ މަޝްރޫއެކެވެ.
ހުވަދޫ އެއިޑުން ބުނީ މި މަޝްރޫއުގެ ދަށުން، ކުޅީގެ ނެތެމުންދާ ގުދުރަތީ ރީތިކަން އާލާކުރުމާއި، ތައުލީމީ ކަންކަމަށާއި، ދިރާސާކުރުމަށާއި، ހިތްފަސޭހަ މައިޒާނެއްގެ ގޮތުގައި ކުޅިތައް ބޭނުންކުރުމަށް، ކުޅިތަކުގެ ތެރެއަށް ވަދެ ނިކުމެ އުޅެވޭހެން ބޯޑްވޯކް ހެދުމާއި މަޑުކޮށްލައިގެން ތިބެވޭނެހެން ޕްލެޓްފޯމުތަކެއް ގާއިމްކުރެވޭނެ ކަމަށެވެ.
ތިން އަހަރުގެ މުއްދަތަށް ހިންގޭ މި މަޝްރޫއު ނިމޭއިރު 3،889،570.00 (ތިން މިލިއަން އަށްލައްކަ އަށްޑިހަ ނުވަހާސް ފަސްސަތޭކަ ހަތްދިހަ) ދިވެހި ރުފިޔާ ޚަރަދުވާނެ އެވެ. މި މަޝްރޫއަކީ ހޯޑެއްދޫ ކައުންސިލުން އެއްވެސް ޚަރަދެއް ކުރަން ނުޖެހޭ ގޮތަށް ހުވަދޫ އެއިޑުން އެކިފަރާތްތަކުގެ އެހީތެރިކަން ހޯދައިގެން ހިންގުމަށް ރާވާފައިވާ މަޝްރޫއެކެވެ.
ހުވަދޫ އެއިޑުން ބުނީ 1،392 ފޫޓު ދިގުމިނުގެ ބޯޑްވޯކާއި 11 ވިޔުއިން ޕްލެޓްފޯމް ކައުންސިލުން ފާސްކޮށްފައިވާ ކުރެހުމާ އެއްގޮތަށް ތަރައްގީކޮށް އެސަރަހައްދަށް ޒިޔާރާތްކުރާ ފަރާތްތަކަށް ހުޅުވާލާނެ ކަމަށާއި، 3 ކެނޯ އަދި 3 ޕެޑަލް ބޯޓް ބާއްވައި، އާންމުންނަށް ބޭނުންކުރެވޭ ގޮތަށް ނޭޗަރ ޕާކް ސަރަހައްދު ބައްޓަން ކުރާނެ ކަމަށެވެ. ކުޅިތައް ހިމާޔަތްކޮށް ދެމެހެއްޓެނިވި ގޮތެއްގައި ބެލެހެއްޓުމުގެ ދާއިރާއިން 2 ތަމްރީނު ޕްރޮގްރާމް، ރަށުގެ މުއައްސަސާތަކާއި، މަދަނީ ޖަމްއިއްޔާތައް އަދި އާންމު ފަރުދުންނަށް އަމާޒުކޮށް ހިންގުމަށް ހަމަޖެހިފައިވާ ކަމަށް ހުވަދޫ އެއިޑުން ބުނެއެވެ.
ހުވަދޫ އެއިޑުން ބުނީ މަޝްރޫއު ހިންގާ ސަރަހައްދު އާރޯކޮށް، ގަސް މަރުވެފައިވާ ސަރަހައްދުގެ 90 އިންސައްތަ ފެހިކުރާނެ ކަމަށެވެ. އެގޮތުން ކުޅީގައި ހެދޭ އެކި ވައްތަރުގެ ގަސް ހިމެނޭހެން 2000 ގަސް އިންދައި، އެސަރަހައްދު ސާފުކޮށް ޗަކަ ނަގަންޖެހޭ ސަރަހައްދުތަކުން ޗަކަ ނަގާނެ ކަމަށެވެ. އަދި ކުޅިތަކުގެ މުހިންމުކަމާ ގުޅޭގޮތުން ރައްޔިތުން ހޭލުންތެރިކުރުމާއެކު، ކުޅި ހިމާޔަތްކޮށް ބެލެހެއްޓުން ރަށުތަރައްގީގެ ޕްލޭންގައި ހިމެނުމާއި އެކަމަށް ބޭނުންވާ ގަވާއިދުތައް ހަދައި ތަންފީޒުކުރުމުގައި ކައުންސިލަށް އެހީތެރިވެދޭނެ ކަމަށް ހުވަދޫ އެއިޑުން ބުނެއެވެ.
ސޮއިކުރި އެއްބަސްވުމުގެ ދަށުން ހޯޑެއްދޫ ނެޗަރ ޕާކް ޕްލޭންގައިވާ ގޮތަށް އެތަން ތަރައްގީކުރުމަށް 3 އަހަރާ އެކު އިތުރު 5 އަހަރުވަންދެން އެތަން ހިންގައި ބަލަހައްޓާނީ ހުވަދޫ އެއިޑުންނެވެ. އަދި ހޯޑެއްދޫ ނޭޗަރ ޕާކް މެނޭޖްމެންޓް ޕްލޭނާ އެއްގޮތަށް އެތަން ހިންގުމަށް 7 މެންބަރުންގެ މައްޗަށް އެކުލެވޭ "ހޯޑެއްދޫ ނޭޗަރ ޕާކް މެނޭޖްމެންޓް ކޮމިޓީ" އުފައްދައި، އެކޮމިޓީގެ ލަފައާއި އިރުޝާދުގެ ދަށުން ނޭޗަރ ޕާކް ހިންގުމުގެ އެންމެހާ ކަންކަން ތަރުތީބުކޮށް ބަލަހައްޓާނީ ހުވަދޫ އެއިޑުންނެވެ.
