ކުޅުދުއްފުށީ ސްކޫލަކީ ފުރާ ފުރިހަމަ ސްކޫލެއްގެ ގޮތުގައި ތަރައްގީކުރަން ވަނީ ނިންމާފައި: މޭޔަރ
ވަށާޖެހޭ ތައުލީމު ފޯރުކޮށްދިނުމަށް ގާއިމުކުރަންޖެހޭ ވަސީލަތްތައް ގާއިމްކުރަން ވަނީ ނިންމާފައި
ކުޅުދުއްފުށި ސިޓީ ކައުންސިލްގެ މޭޔަރ މުހައްމަދު އާތިފް
ހދ. ކުޅުދުއްފުށީ އަފީފުއްދީން ސްކޫލަކީ ފުރާ ފުރިހަމަ ސްކޫލެއްގެ ގޮތުގައި ތަރައްގީކުރަން ސަރުކާރުން ނިންމާފައިވާކަމަށް ކުޅުދުއްފުށި ސިޓީ ކައުންސިލްގެ މޭޔަރ މުހައްމަދު އާތިފް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން އާތިފް ވިދާޅުވީ ކުޅުދުއްފުއްޓަކީ ތައުލީމީ ނިޒާމު ރަނގަޅު ރަށެއް ކަމަށެވެ. އަދި އެއަތޮޅުގެ އެހެން ރަށްރަށުގެ ކުދިންވެސް ކުޅުދުއްފުށިން ތައުލީމު ހާސިލުކުރަމުންދާ ކަމަށެވެ.
މި ނިޒާމު އިތުރަށް ފުރިހަމަކުރުމަށް ސަރުކާރުން ނިންމާފައިވާކަން ފާހަގަކުރައްވައި އާތިފް ވިދާޅުވީ ސަރުކާރުގެ ފަރާތުން ރާއްޖޭގެ އެކި ކަންކޮޅުތަކުގައި ފުރާ ފުރިހަމަ ސްކޫލްގެ ގޮތުގައި ސްކޫލްތައް ތަރައްގީކުރުމުގެ މަސައްކަތުގެ ތެރެއިން އަފީފުއްދީން ސްކޫލް ވެސް ތަރައްގީކުރަން ނިންމާފައިވާކަމަށެވެ.
މި މަސައްކަތުގެ ތެރެއިން ވަށާޖެހޭ ތައުލީމު ފޯރުކޮށްދިނުމަށް ގާއިމުކުރަންޖެހޭ ހުރިހާ ވަސީލަތެއް ގާއިމުކުރުމަށް ނިންމާފައިވާކަމަށް އާތިފް ވިދާޅުވިއެވެ. އެގޮތުން މި މަސައްކަތަށް ބޭނުންވާ އިންސާނީ ވަސީލަތް ވެސް ގާއިމްކުރެވިގެންދާނެ ކަމަށް އާތިފް ވިދާޅުވިއެވެ.
އާތިފް ވިދާޅުވީ ވަށާޖެހޭ ތައުލީމު ފޯރުކޮށްދިނުމުގެ މަސައްކަތުގެ ތެރެއިން ސްޓެމް އެޑިއުކޭޝަނާއި، ކޯޑިންއާއި، ބިޒްނަސް ސްޓްރީމް، ބީޓެކް، އާޓްސްގެ އިތުރުން މަސައްކަތްތެރިކަމާއި އެކި ވައްތަރުގެ ކުޅިވަރުތައް ދަސްކޮށްދެވިގެންދާނެ ކަމަށެވެ.
މި ޕްރޮގްރާމުތައް ރާވާފައިވަނީ ސްކޫލް ނިމޭއިރު ދަރިވަރުންނަށް އެކިއެކި މަސައްކަތްތައް ދަސްވާގޮތަށް ކަމަށް އާތިފް ވިދާޅުވިއެވެ.
މި މަޝްރޫއަކީ މުސްތަގުބަލަށް މުހިންމު މަޝްރޫއެއްކަމަށް ގަބޫލުކުރައްވާކަމަށް އާތިފް ވިދާޅުވިއެވެ. ވަކިން ޚާއްސަކޮށް ސްކޫލް ނިންމާ ދަރިވަރުންނަކީ މުޖުތަމައުގައި އުޅެން އެނގޭ ދަރިވަރުންނަށް ހެދުން ކަމަށް އާތިފް ވިދާޅުވިއެވެ.
