މޮޅަށް ކިޔަވައިގެން ނުކުންނަ ކުދިންނަށް ތައުލީމީ ދާއިރާއިން ވަޒީފާގެ "އެޓްރެކްޓިވް ޕެކޭޖް" އެއް ދެވިދާނެ
ތައުލީމީ ދާއިރާއިން ވަޒީފާގެ މާޙައުލަށް ކުދިން ނުނުކުންނަ ބައެއް ސަބަބުތައް ފާހަގަވެފައިވޭ
ސުކޫލުގައި ޓީޗަރަކު ދަރިވަރުންނަށް ކިޔަވައިދެއްވަނީ- ރާއްޖޭގެ ސްކޫލުތަކުގައި 10615 ޓީޗަރުން ދަނީ ވަޒީފާ އަދާކުރަމު
މޮޅަށް ކިޔަވައިގެން ނުކުންނަ ކުދިންނަށް ތައުލީމީ ދާއިރާއިން "އެޓްރެކްޓިވް ޕެކޭޖް" އެއް ދެވިއްޖެނަމަ، ތައުލީމީ ދާއިރާއިން ވަޒީފާގެ ބާޒާރަށް ނުކުތުމަށް ކުދިންގެ ޝައުޤުވެރިކަން އިތުރުވެދާނެ ކަމަށް އެޑިއުކޭޝަން މިނިސްޓްރީން ބުނެފިއެވެ.
މޮޅަށް ކިޔަވައިގެން ނުކުންނަ ކުދިން ތައުލީމީ ދާއިރާއިން ކުރިއަށް ދިއުމަށް ޝައުޤުވެރިކަން ނުހުންނަ ސަބަބުތައް ދެނެގަތުމަށް ޤައުމީ ފެންވަރުގެ ދިރާސާއެއް ހަދަން ޖެހިފައިވާކަމަށް ދާދި ފަހުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވިދާޅުވެފައިވާއިރު، އެކަމާ ގުޅޭގޮތުން ރާއްޖެޓީވީން ސުވާލުކޮށްލުމުން އެޑިއުކޭޝަން މިނިސްޓްރީގެ ޕާމަނަންޓް ސެކެޓަރީ އަހުމަދު އަލީ ވިދާޅުވީ، މިނިސްޓްރީގެ ފުރިހަމަ އެއްބާރުލުން އެކަމުގައި ލިބިގެންދާނެ ކަމަށެވެ.
އަހުމަދު ވިދާޅުވީ، ތައުލީމީ ދާއިރާއިން ވަޒީފާގެ މާޙައުލަށް ކުދިން ނުނުކުންނަ ބައެއް ސަބަބުތައް މިނިސްޓްރީއަށް ވެސް ފާހަގަވެފައިވާ ކަމަށެވެ. އެގޮތުން އެއް ކަމެއްގެ ގޮތުން މުސާރައިގެ އޮނިގަނޑުގެ މައްސަލަ ފާހަގަ ކުރެވޭކަމަށް އަހުމަދު ވިދާޅުވިއެވެ. އަދި ޓީޗަރުންގެ މުސާރަ ކުޑަވުމާއި، އެހެން ސެކްޓަރތަކުގެ މުވައްޒަފުންނަށް ވަޒީފާގެ އިތުރުގަޑީގެ ފައިސާ ލިބޭގޮތަށް ދޫކޮށްލާފައި އޮންނައިރު، ތައުލީމީ ދާއިރާގައި އިތުރުގަޑި ލިމިޓް ކޮށްފައި އޮންނަ އޮތުން ވެސް ބައެއް ފަރާތްތަކުން ސަބަބެއްގެ ގޮތުގައި ފާހަގަކުރާކަމަށް އަހުމަދު ވިދާޅުވިއެވެ.
އަހުމަދު ވިދާޅުވީ، މަސައްކަތުގެ ގޮތުން ޓީޗަރުންނަކީ ގިނަ ވަގުތު މަސައްކަތުގައި ވެސް ހޭދަކުރަން ޖެހޭ ބައެއް ކަމަށާއި، އެކި ސުކޫލުތަކުގައި އެކި ގޮތަށް މަސައްކަތްތައް ބައްޓަންވެފައި ހުންނަ ކަމަށެވެ. ވަކިން ޚާއްސަކޮށް ފަހަކަށް އައިސް ރަނގަޅު ނަތީޖާ ހޯދާ ކުދިން ކިޔަވާ ދިނުމުގެ ދާއިރާއަށް ޝައުޤުވެރިނުވާ މައްސަލަ ފާހަގަކުރެވިފައިވާކަމަށް އަހުމަދު ވިދާޅުވިއެވެ. އެގޮތުން ވަޒީފާގެ ބާޒާރަށް އަންނަ ބަދަލާއެކު، އެހެން ދާއިރާތަކުގެ އޮނިގަނޑު ފަދައިން ޓީޗަރުންގެ "ޕެކޭޖް އެޓްރެކްޓިވް" ނުވާތީކަން ބައެއް ފަރާތްތަކުން ފާހަގަކުރާކަމަށް އޭނާ ވިދާޅުވިއެވެ.
އެހެންނަމަވެސް، ޓީޗަރުންގެ މުސާރައިގެ އޮނިގަނޑަށް ބަދަލު ގެނެސް، އެކަށީގެންވާ ފުރުސަތުތަކެއް ފަހިކޮށްދެވިއްޖެނަމަ، މި ދާއިރާއަށް ވެސް އިތުރު ކުދިން ޝައުޤުވެރިވާނެ ކަމަށް ބެލެވޭކަމަށް އޭނާ ވިދާޅުވިއެވެ. އަދި މި ސަރުކާރު އައިސް ޓީޗަރުންގެ ދަތިކަން ފާހަގަކުރެވި، އެކަން ހައްލުކުރުމަށް އެކި މަރުޙަލާގައި މަސައްކަތްތަކެއް ކުރެވިފައިވާކަމަަށް ވެސް އޭނާ ވިދާޅުވިއެވެ. އެގޮތުން ވަޒީފާގެ އޮނިގަނޑު ހަރުދަނާކުރުމަށް ސީއެސްސީއާއި، ޕޭ ކޮމިޝަނާއި، ރައީސް އޮފީސް ގުޅިގެން ކުރަމުންދާ މަސައްކަތްތަކާއެކު، ކުރިއަށް އޮތް ތަނުގައި ތައުލީމީ ދާއިރާއިން ވަޒީފާގެ ބާޒާރުގައި އޮންނަ ޑިމާންޑު ވެސް ބޮޑުވާނެ ކަމަށް ބެލެވޭކަމަށް އޭނާ ވިދާޅުވިއެވެ.
މިހާރުވެސް ރާއްޖޭގެ ސްކޫލްތަކުގައި ކިޔަވައިދޭ ޓީޗަރުންގެ އާބާދީގެ 20 އިންސައްތައަކީ ބިދޭސީންކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްގެ ތަފާސް ހިސާބުން ދައްކައެވެ. މޯލްޑިވްސް ބިއުރޯ އޮފް ސްޓެޓިސްޓިކްސްއިން އާންމުކޮށްފައިވާ ތަފާސްހިސާބުތައް ދައްކާގޮތުން ރާއްޖޭގެ ސްކޫލުތަކުގައި 10615 ޓީޗަރުން ދަނީ ވަޒީފާ އަދާކުރަމުންނެވެ.
