އިންޓަ އަތުން ފަހު ވަގުތު ޔުވެންޓަސް ސަލާމަތްވެއްޖެ

އިޓާލިއަން ލީގުގައި އާދީއްތަ ދުވަހުގެރޭ ކުޅުނު މެޗުން އެންމެ ފަހުގެ ޗެމްޕިއަން އިންޓަ މިލާން އަތުން ފަހު ވަގުތު ޔުވެންޓަސް ބަލިނުވެ ސަލާމަތްވެއްޖެއެވެ.

އިންޓަގެ ދަނޑުގައި ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ އިންޓައިންނެވެ. މެޗުގެ 17 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އެޑިން ޒެކޯއެވެ. އޭނާ މި ލަނޑު ކާމިޔާބުކޮށްފައިވަނީ އޭރިއާ ބޭރުން އެ ޓީމުގެ ހަކަން ޗަޅަނޮގްލޫ ފޮނުވާލި ބާރު ހަމަލާ، ގޯލުގެ ދަނޑީގައި ޖެހިފައި ނުކުތް ބޯޅައިންނެވެ.

އޭގެ ފަހުން ފުރަތަމަ ހާފުގައި އޭރިއާ ބޭރުގައި ޔުވެންޓަސްގެ ހުއާން ކުއަޑްރާޑޯ ފޮނުވާލި ނުރައްކާތެރި ހަމަލާއެއް ގޯލުގެ އަރިމަތީ ދަނޑި ކައިރިން ބޭރަށް ދިޔައިރު، ދެވަނަ ހާފުގައި އެ ޓީމުގެ ޕައުލޯ ޑިބާލާ ފޮނުވާލި ހިލޭ ޖެހުމެއް އިންޓަގެ ގޯލްކީޕަރު ސާމިރު ހަންޑަނޮވިޗް ވަނީ ދިފާއުކޮށްފައެވެ.

މި މެޗުގައި ޔުވެންޓަސްއިން ނަތީޖާ އެއްވަރުކޮށްފައިވަނީ މެޗު ނިމެން މިނެޓަކަށް ވެފައި ވަނިކޮށެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ޑިބާލާއެވެ. މިއީ އޭރިއާ ތެރެއިން ޔުވެންޓަސްގެ އެލެކްސް ސަންޑްރޯއަށް އިންޓަގެ ޑެންޒެލް ޑަމްފްރީސް ކުރި ފައުލަކާ ގުޅިގެން، ވީޑިއޯ އެސިސްޓަންޓް ރެފުރީ (ވީއޭއާރް) ގެ އެހީ ހޯދުމަށްފަހު ދިން ޕެނަލްޓީއެކެވެ. މި ޕެނަލްޓީ ދިނުމާ ގުޅިގެން އިންޓަގެ ކޯޗު ސިމޯން އިންޒާގީ ހިތްހަމަނުޖެހުން ފާޅުކުރުމާ ގުޅިގެން، ރެފުރީ ވަނީ އޭނާއަށް ސީދާ ރަތް ކާޑެއް ދައްކާފައެވެ.

މި ނަތީޖާއާއެކު ތާވަލުގެ ތިންވަނައިގައި އިންޓަ އޮތީ ކުޅުނު ނުވަ މެޗުން ލިބުނު 18 ޕޮއިންޓާއެކުއެވެ. އަދި އިންޓައާ އެއްވަރުކުރި ޔުވެންޓަސް އޮތީ ތާވަލުގެ ހަވަނައިގައި ނުވަ މެޗުން 15 ޕޮއިންޓާއެކުއެވެ. މީގެ އިތުރުން ލީގުގައި އާދީއްތަ ދުވަހުގެރޭ ކުޅުނު މެޗުން ރޯމާއާ ލަނޑެއް ނުޖެހި އެއްވަރުވެ، ނާޕޮލީ ވަނީ ތާވަލުގެ އެއްވަނައަށް އަލުން ޖެހިލާފައެވެ. ނާޕޮލީ އެއްވަނައަށް ޖެހިލިއިރު، އެ ޓީމާއި ދެވަނައިގައި އޮތް އޭސީ މިލާނަށް ނުވަ މެޗުން ލިބިފައިވަނީ 25 ޕޮއިންޓެވެ.