މަހްމޫދުގެ މަރާ ގުޅިގެން ބިދޭސީ މީހާގެ އިތުރުން އެހެން މީހެއްގެ ބައިވެރިވުން އޮތް ކަމަކަށް ނުބެލެވޭ: ފުލުހުން
މަހްމޫދުގެ ފޯނާއި އައިޑީގެ ކާޑުގެ އިތުރުން، މައްސަލައާ ގުޅިގެން ހުރި އިތުރު ހެކިތައް ވަނީ ފެނިފައި
މަހްމޫދުގެ މަރުގެ މައްސަލަ
އދ. ދަނގެތީގެ ވިޔަފާރިވެރިޔާ މަހްމޫދު އަބޫބަކުރުގެ މަރުގެ މައްސަލައިގައި ހައްޔަރުކުރި ބިދޭސީ މީހާ, ޝާ އަލޮމް މިއާގެ އިތުރުން އެހެން މީހެއްގައި ނުވަތަ ބައެއްގެ ބައިވެރިވުން އޮތް ކަމަށް މިހާތަނަށް ތަހުޤީޤަށް ފާހަގަކުރެވިފައިނުވާ ކަމަށް ފުލުހުން ބުނެފިއެވެ.
ފުލުހުން ބުނީ މި މައްސަލައާ ގުޅިގެން ޝާ އަލޮމް އދ. ދަނގެތީގައި ދިރިއުޅެމުންދިޔަ ގެ, ކޯޓު އަމުރެއްގެ ދަށުން ބަލައި ފާސްކޮށް، މައްސަލައާ ގުޅިގުން ހުރި ކަމަށް ބެލެވޭ ގިނަ އަދަދެއްގެ ތަކެތި ވަޅުލާފައިވަނިކޮށް ހޯދައި، ތަހުލީލު ކުރުމަށްޓަކައި ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. އޭގެ ތެރޭގައި މަހްމޫދުގެ ފޯނާއި އައިޑީގެ ކާޑުގެ އިތުރުން މައްސަލައާ ގުޅިގެން ހުރި އިތުރު ހެކިތައް ހިމެނޭ ކަމަށެވެ.
މަހުމޫދު މަރާލި މައްސަލައިގެ ތުހުމަތުގައި ބިދޭސީ މީހާގެ ބަންދަށް 15 ދުވަސް ޖަހާފައިވަނީ ހޮނިހިރު ދުވަހުގެ ރޭގައެވެ.
މައުލޫމާތު ލިބިފައިވާ ގޮތުގައި އެ ބިދޭސީ މީހާއަކީ މަހުމޫދުގެ ހަށިގަނޑު ފެނުނު ގެޔާ ޖެހިގެން ހުރި ގެއެއްގައި, އުމުރުން ދުވަސްވީ މީހަކު ބަލަން ހުންނަ މީހެކެވެ.
އޮކްޓޫބަރު މަހުގެ 14ވީ ބުރާސްފަތި ދުވަހުގެ މެންދުރުފަހުގެ ވަގުތެއްގައި, 57 އަހަރުގެ މަހުމޫދު ގެއްލިގެން ހޯދަނިކޮށް ފެނުނީ ބޮލަށާއި ފަޔަށް ގޯއްޏެއް ލައްވައި، ވަޅެއްގައި އެކޮޅުކޮޅުން އެލުވާފައިވަނިކޮށެވެ. އޭނާއަށް ވަރަށް ބޮޑަށް އަނިޔާކޮށްފައިވާ ކަމުގެ ނިޝާންތައް ހަށިގަނޑުގެ ބޭރުފުށުން ފެންނަން ހުރި ކަމަށް މަންޒަރު ދުށް މީހުން ބުނެއެވެ. އަދި ވަޅުން ނެގި ވަގުތު ވަރަށް ގިނަ ލޭ ފޭބިއެވެ.
ފުލުހުން ބުނީ މި މައްސަލަ ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓްގެ ހޮމިސައިޑް އިންވެސްޓިގޭޝަންގެ ތަހުގީގު ޓީމަކާއި އދ. އަތޮޅުގެ ފުލުހުންގެ އިތުރުން ފޮރެންސިކް ތަހުލީލު ޓީމެއް ގުޅިގެން ސީރިއަސް މައްސަލައެއްގެ ގޮތުގައި ތަހުގީގު ކުރަމުންދާ ކަމަށެވެ.
