އިންޓަ އޮފީސް ރާޒުވާ މުބާރާތުގެ ޗެމްޕިއަންކަން އެމްޕީއެލްއަށް

ތިންވަނަ އިންޓަ އޮފީސް ރާޒުވާ މުބާރާތުގެ ޗެމްޕިއަންކަން މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހޯދައިފިއެވެ.

މި އަހަރުގެ އިންޓަ އޮފީސް ރާޒުވާ މުބާރާތުގައި 18 އޮފީހަކުން 100 އަށްވުރެ ގިނަ ކުޅުންތެރިން ވަނީ ވާދަކޮށްފައެވެ. އަދި މި މުބާރާތުގެ މެޗުތައް ކުޅެވިގެންދިޔައީ ހުޅުމާލޭ ޗެސް އާކެޑުގައެވެ.

ބުރާސްފަތި ދުވަހުން ފެށިގެން ހޮނިހިރު ދުވަހުގެ ނިޔަލަށް ކުރިއަށްދިޔަ މި މުބާރާތުގެ ޗެމްޕިއަންކަން އެމްޕީއެލްއިން ހޯދިއިރު، ދެވަނަ ހޯދާފައިވަނީ ސްޓެލްކޯއިންނެވެ. އަދި ތިންވަނަ ހޯދާފައިވަނީ ޕޮލިސް ކުލަބުންނެވެ. މި މުބާރާތް ނިމުމުގެ ރަސްމިއްޔާތު ހޮނިހިރު ދުވަހުގެރޭ ބޭއްވިއިރު، ޗެމްޕިއަން ޓީމަށް އިނާމު ދެއްވާފައިވަނީ ހޯމް މިނިސްޓަރު އިމްރާން އަބްދުﷲ އެވެ.

މޯލްޑިވްސް ޗެސް އެސޯސިއޭޝަނުގެ ރައީސް ވިދާޅުވީ އެހެން އަހަރުތަކުގައި ބޭއްވި މުބާރާތްތަކާ ޚިލާފަށް މި އަހަރުގެ މުބާރާތުގައި ބައިވެރިވި ކުޅުންތެރިންގެ އަދަދު އިތުރު ކަމަށާއި، އަދި މުބާރާތުގައި ޕްރޮފެޝަނަލް ކުޅުންތެރިއަކު ވާދަކުރި ކަމަށެވެ. އެހެންކަމުން މިއީ ރާއްޖޭގައި ރާޒުވާ ކުރިއެރުވުމަށް ލިބުނު ބޮޑު ކުރިއެރުމެއް ކަމަށްވެސް ވިދާޅުވިއެވެ.

މި މުބާރާތުގެ ޗެމްޕިއަން ޓީމަށް 10،000 ރުފިޔާގެ ފައިސާގެ އިނާމެއް ދިންއިރު، ދެވަނައަށްދިޔަ ޓީމަށް 7،000 ރުފިޔާގެ ފައިސާގެ އިނާމެއް ވަނީ ދީފައެވެ. އަދި ތިންވަނައަށް ދިޔަ ޓީމަށް ވަނީ 3،000 ރުފިޔާގެ ފައިސާގެ އިނާމެއް ދީފައެވެ. މީގެ އިތުރުން ބޯޑް ޕްރައިޒްގެ ގޮތުގައި އެއްވަނައަށްދިޔަ ބޯޑަކަށް 4،000 ރުފިޔާ ދިންއިރު، ދެވަނަ ބޯޑަށް 3،000 ރުފިޔާ ވަނީ ދީފައެވެ. އަދި ތިންވަނަ ބޯޑަށް 2،000 ރުފިޔާ އަދި ހަތަރުވަނަ ބޯޑަށް 1،000 ރުފިޔާގެ ފައިސާގެ އިނާމެއްވެސް ވަނީ ދީފައެވެ.