ކުރިއަށް އޮތް ސީޒަނުގެ ދިވެހި ޕްރިމިއާ ލީގު އަންނަ އަހަރުގެ ފެބްރުއަރީ މަހު ފެށުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފިއެވެ.

އެފްއޭއެމުން އާދީއްތަ ދުވަހު ނެރުނު ކަލަންޑަރުގައިވާ ގޮތުން ދިވެހި ޕްރިމިއާ ލީގުގެ އައު ސީޒަން ފަށާނީ ފެބްރުއަރީ މަހުގެ 12 ވަނަ ދުވަހެވެ. މިދިޔަ ސީޒަނުގެ ލީގުގައިވެސް ކުޅުނު އަށް ޓީމާއެކު ކުރިއަށް އޮތް ސީޒަނުގެ ދިވެހި ޕްރިމިއާ ލީގު ކުރިއަށްދާއިރު، މި ފަހަރުގެ ލީގުގައިވެސް ތިން ބުރު ކުޅުމަށް ވަނީ ނިންމާފައެވެ.

ނިމިދިޔަ ސީޒަނުގައިވެސް ލީގުގައި ތިން ބުރެއް ކުޅެން އެންމެ ފުރަތަމަ ނިންމި ނަމަވެސް، އެ ފަހަރު ދެވަނަ ބުރާ ހަމައިން ލީގު ވަނީ ނިންމާލާފައެވެ. އެގޮތުން ރާއްޖޭގެ ކޮވިޑް-19 ގެ ހާލަތާ ގުޅިގެން މިދިޔަ މެއި މަހުގެ ތެރޭގައި ތިންވަނަ ބުރު ނުކުޅެ މިދިޔަ ސީޒަނުގެ ދިވެހި ޕްރިމިއާ ލީގު ކުރުކޮށްލުމަށް އެފްއޭއެމުގެ ހިންގާ ކޮމިޓީން ނިންމީ ކުލަބުތަކާއެކު މަޝްވަރާކުރުމަށްފަހުއެވެ.

އެއާއެކު މާޒިޔާ ސްޕޯޓްސް އެންޑް ރެކްރިއޭޝަނުން ވަނީ ނުވަ ޕޮއިންޓުގެ ލީޑަކާއެކު މިދިޔަ ސީޒަނުގެ ލީގު ޗެމްޕިއަންކަން ދިފާއުކޮށްފައެވެ. މާޒިޔާއަށް ކުޅުނު 14 މެޗުން 34 ޕޮއިންޓް ލިބުނުއިރު، ދެވަނައިގައި އޮތް ކުލަބު ވެލެންސިއާއަށް 14 މެޗުން ލިބުނީ 25 ޕޮއިންޓެވެ.

އަދި ލީގުގެ ތިންވަނައިގައި އޮތީ 14 މެޗުން 19 ޕޮއިންޓާއެކު ކުލަބު ގްރީން ސްޓްރީޓްސްއެވެ. ހަތަރުވަނައިގައި 14 މެޗުން 17 ޕޮއިންޓާއެކު ކުލަބު އީގަލްސް އޮތްއިރު، ފަސްވަނައިގައި އޮތީ 14 މެޗުން 16 ޕޮއިންޓާއެކު ދަ ގްރާންޑޭ ސްޕޯޓްސް ކުލަބެވެ. އަދި ހަވަނައިގައި އޮތީ 14 މެޗުން 15 ޕޮއިންޓާއެކު ސުޕަ ޔުނައިޓެޑް ސްޕޯޓްސް (ސަސް) އެވެ. މީގެ އިތުރުން ތާވަލުގެ ހަތްވަނައިގައި އޮތް ޓީސީ ސްޕޯޓްސް ކުލަބަށް 14 މެޗުން 13 ޕޮއިންޓް ލިބުނުއިރު، ޔުނައިޓެޑް ވިކްޓަރީ (ޔޫވީ) ފުލުގައި އޮތީ 14 މެޗުން 12 ޕޮއިންޓް ހޯދައިގެންނެވެ.

ކުރިއަށް އޮތް ސީޒަނުގައިވެސް މި އަށް ޓީމު ދިވެހި ޕްރިމިއާ ލީގުގައި ވާދަކުރާއިރު، މި ފަހަރު އެއްވެސް ޓީމެއް ރެލިގޭޓުވެފައި ނުވަނީ މިދިޔަ ސީޒަނުގައި ދެވަނަ ޑިވިޝަން ބާއްވާފައި ނުވާތީއެވެ.

އެކަމަކު މި ސީޒަނުގައި ދެވަނަ ޑިވިޝަން އަނެއްކާވެސް ބާއްވާއިރު، އެފްއޭއެމުން ނެރެފައިވާ ކަލަންޑަރުގައިވާ ގޮތުން އެ މުބާރާތް ކުރިއަށްދާނީ އަންނަ އަހަރު ޖޫން މަހުގެ 27 ވަނަ ދުވަހުން ފެށިގެން ޖުލައި މަހުގެ 28 ވަނަ ދުވަހުގެ ނިޔަލަށެވެ. އަދި އޭގެ ފަހުން ދިވެހި ޕްރިމިއާ ލީގުގެ ކޮލިފިކޭޝަން މެޗުތައް ކުޅުމަށް ތާވަލުކޮށްފައި ވަނީ އޮގަސްޓް މަހުގެ ތެރޭގައެވެ.