ޗެލްސީއަށް ދެ ޕޮއިންޓުގެ ލީޑެއް، ސިޓީ ދެވަނައަށް

އިނގިރޭސި ޕްރިމިއާ ލީގުގައި ހޮނިހިރު ދުވަހުގެ ހަވީރު ކުޅުނު މެޗުން ނޯވިޗް ބަލިކޮށް ޗެލްސީން ތާވަލުގެ އެއްވަނައިގައި ދެ ޕޮއިންޓުގެ ލީޑެއް ނެގިއިރު، ހޮނިހިރު ދުވަހުގެރޭ ފަސޭހަކަމާއެކު ބްރައިޓަން ބަލިކޮށް ތާވަލުގެ ދެވަނައަށް އެންމެ ފަހުގެ ޗެމްޕިއަން މެންޗެސްޓާ ސިޓީ ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން ޗެލްސީ މޮޅުވީ 7-0 ގެ ތަފާތު ބޮޑު ނަތީޖާއަކުންނެވެ.

މި މެޗުގައި ޗެލްސީން މޮޅު ކުޅުމެއް ދެއްކިއިރު، މެޗު ފަށައިގެން އަށްވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ މޭސަން މައުންޓެވެ. އޭގެ 10 މިނެޓު ފަހުން ކަލުމް ހަޑްސަން-އޮޑޯއި ޗެލްސީއަށް ލީޑު ފުޅާކޮށްދިންއިރު، ފުރަތަމަ ހާފު ނިމުމުގެ ކުރިން އެ ޓީމުގެ ތިންވަނަ ލަނޑު ޖަހައިދިނީ ރީސް ޖޭމްސްއެވެ.

މި މެޗުގެ ދެވަނަ ހާފުގައިވެސް ޗެލްސީން ތަފާތު މޮޅު ކުޅުމެއް ދެއްކިއިރު، މި ހާގު ފަށައިގެން 13 ވަނަ މިނެޓުގައި ބެން ޗިލްވެލް ވަނީ ޗެލްސީގެ ހަތަރުވަނަ ލަނޑު ޖަހާފައެވެ. އަދި އޭގެ ފަސް މިނެޓު ފަހުން ޗެލްސީން ފަސްވަނަ ލަނޑެއް ޖެހިއިރު، މި ލަނޑަކީ ނޯވިޗުގެ މެކްސް އާރޮންސް އަތުން ބައިކޮޅަށް ވަން ލަނޑެކެވެ. ދެން

މި މެޗުގެ ފަހުކޮޅު އިތުރު ދެ ލަނޑު ޖަހައި ޗެލްސީގެ މައުންޓް ވަނީ މި މެޗުގައި ހެޓްރިކް ހަދާފައެވެ. މިއީ މައުންޓް ޗެލްސީ ކެރިއަރުގައި ހެދި ފުރަތަމަ ހެޓްރިކެވެ.

މި މެޗުން ޗެލްސީ މޮޅުވިއިރު، ހޮނިހިރު ދުވަހުގެރޭ ކުޅުނު މެޗުން ސިޓީ މޮޅުވީ ރަށުން ބޭރުގައި ކުޅެ ބްރައިޓަން އަތުން 4-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ސިޓީން ތިން ލަނޑުގެ ލީޑެއް ނެގިއިރު، މެޗުގެ 13 ވަނަ މިނެޓުގައި އެ ޓީމަށް ލީޑު ނަގައިދިން ލަނޑު ކާމިޔާބުކޮށްދިނީ އިލްކާއި ގުންޑޮގާނެވެ. އަދި ފުރަތަމަ ހާފުގައި ސިޓީގެ ފިލް ފޯޑެން ވަނީ ދެ ލަނޑެއް ޖަހައި، އެ ޓީމުގެ ލީޑު ފުޅާކޮށްދީފައެވެ.

މި މެޗުގެ ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗު ނިމެން ނުވަ މިނެޓަށް ވެފައި ވަނިކޮށް ލިބުނު ޕެނަލްޓީއަކުން އެލެކްސިސް މެކް އެލިސްޓާ ވަނީ ބްރައިޓަނަށް ލަނޑެއް ޖަހައިދީފައެވެ. އެކަމަކު މެޗުގެ އިތުރު ވަގުތުގައި ސިޓީން ހަތަރުވަނަ ލަނޑެއް ޖެހިއިރު، މި ލަނޑު އެ ޓީމަށް ކާމިޔާބުކޮށްދިނީ ރިޔާދު މާރޭޒެވެ.

މި ނަތީޖާތަކާއެކު ތާވަލުގެ އެއްވަނައިގައި އޮތް ޗެލްސީއަށް ދެ ޕޮއިންޓުގެ ލީޑެއް ލިބުނުއިރު، އެ ޓީމު އެއްވަނައިގައި އޮތީ ކުޅުނު ނުވަ މެޗުން ލިބުނު 22 ޕޮއިންޓާއެކުއެވެ. އަދި ދެވަނައިގައި އޮތް ސިޓީއަށް ނުވަ މެޗުން 20 ޕޮއިންޓް ލިބިފައިވާއިރު، ތިންވަނައިގައި އޮތް ލިވަޕޫލަށް އަށް މެޗުން ލިބިފައިވަނީ 18 ޕޮއިންޓެވެ.

އެހެންކަމުން ލީގުގައި އާދީއްތަ ދުވަހުގެރޭ ކުޅޭ މެޗުން ވާދަވެރި މެންޗެސްޓާ ޔުނައިޓެޑް ބަލިކޮށް ލިވަޕޫލަށް ތާވަލުގެ ދެވަނައަށް އަލުން ޖެހިލައި، ޗެލްސީގެ ލީޑު އެއް ޕޮއިންޓަށް ކުޑަކުރެވޭނެއެވެ.