ހާބަރު ފުޑް ކޯޓުގައި ހުންނަ "ސިޓީ ޓޭސްޓް" ކެފޭގައި ހިންގި މަރާމާރީއާ ގުޅިގެން އެއްވެސް މީހަކު ހައްޔަރު ނުކުރާކަމަށް ފުލުހުން ބުނެފިއެވެ.

ރާއްޖެއެމްވީއަށް ފުލުހުންގެ މީޑިއާ އޮފިސަރު ވިދާޅުވީ; ކެފޭގައި ހިންގި މާރާމާރީގެ މައްސަލަ ތަހުގީގު ކުރަމުން އަންނަ ކަމަށާއި، މިހާތަނަށް އެއްވެސް މީހަކު ހައްޔަރު ނުކުރާ ކަމަށެވެ.

މިމާރާމާރީގައި ކެފޭގައި މަސައްކަތް ކުރަމުން އައި ބޭރުގެ ދެ މުވައްޒަފުންނަށް ވަރަށް ބޮޑަށް އަނިޔާވެ, ފުލުހުންގެ އެހީތެރިކަމާއެކު ހޮސްޕިޓަލަށް ގެންގޮސްފައިވެއެވެ.

މިމަހުގެ 22 ބުރާސްފަތި ދުވަހުގެ ރޭ މެންދަމު 3:15 ސިޓީ ޓޭސްޓް ކެފޭގައި މާރާމާރީއެއް ހިންގާފައިވެއެވެ. މައުލޫމާތު ލިބޭ ގޮތުގައި މިމާރާމާރީ ހިންގާފައިވަނީ ކެފޭގައި ކާން ތިބި ޒުވާނުންތަކެއް, ކެއުމަށްފަހު ބިލް ނުދައްކައި ދާން އުޅުމުގެ ތެރޭގައެވެ. އެމީހުން ވަނީ އެތަނުގައި މަސައްކަތް ކުރާ މުވައްޒަފުންނަށް ވެސް ހަމަލާދީފައެވެ. ޕޭމަންޓުގައި ހުރި ގައުތައް އުކާފައިވާއިރު، ގޮނޑިތަކާއި މޭޒުތައް ވެސް އުކާފައިވެއެވެ. އަދި ބޮޑެތި ގެއްލުންތަކެއް ކެފޭއަށް ދީފައިވާކަމަށް މައުލޫމާތު ލިބެއެވެ.

24 ގަޑިއިރު ޚިދުމަތް ދޭ ސިޓީ ޓޭސްޓް ކެފޭއަށް ހަމަނުޖެހުން ހިންގި މީހުން ގޮސް ޚިދުމަތް ހޯދާ ކަމަށް މައުލޫމާތު ލިބެއެވެ.

މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.