އަންނަ އަހަރު އޮޑިޓަރ ޖެނެރަލް އޮފީހަށް 90،315،293 (ނުވަދިހަ މިލިއަން ތިންލައްކަ ފަނަރަހާސް ދުއިސައްތަ ނުވަދިހަ ތިން) ރުފިޔާގެ ބަޖެޓެއް ދިނުމަށް ރައްޔިތުންގެ މަޖިލީހުން ފާސްކޮށްފިއެވެ.
އަންނަ އަހަރަށް ލަފާކޮށް އޮޑިޓް އޮފީހުން ރައްޔިތުންގެ މަޖިލީހަށް ހުށަހަޅާފައިވަނީ 118.7 މިލިއަން ރުފިޔާގެ ބަޖެޓެކެވެ. އެއީ ރިކަރަންޓް ޚަރަދުގެ ގޮތުގައި ހިނގާނެކަމަށް ލަފާކުރި 58.9 މިލިއަން ރުފިޔާ އާއި ކެޕިޓަލް ޚަރަދުގެ ގޮތުގައި ހިނގާނެކަމަށް ލަފާކުރި 59.7 މިލިއަން ރުފިޔާއެވެ.
މިބަޖެޓް ދިރާސާކުރި މާލިއްޔަތު ކޮމިޓީން ކަންކަން ދިރާސާކުރުމަށްފަހު ނިންމާފައިވަނީ 28.3 މިލިއަން ރުފިޔާ އުނިކުރުމަށެވެ. އެއީ 24 އިންސައްތައެވެ. އެގޮތުން ކުޑަކުރުމަށް ނިންމާފައިވަނީ އޮޑިޓަރ ޖެނެރަލް އޮފީހުން ޕީއެސްއައިޕީގެ ގޮތުގައި އޮފީސް އިމާރާތް ހެދުމަށް ހިނގާ ޚަރަދެވެ. އެޚަރަދު އޮޑިޓް އޮފީހާ މަޝްވަރާކުރުމަށްފަހު 30 މިލިއަން ރުފިޔާއަށް ކުޑަކުރުމަށް ވަނީ ނިންމާފައެވެ.
ހުޅުމާލޭގައި އެއޮފީހުގެ އިމާރާތެއް އެޅުމަށް ހިނގާނެކަމަށް ލަފާކޮށް ބަޖެޓްގައި ހިމަނާފައިވަނީ 55.1 މިލިއަން ރުފިޔާއެވެ. ނަމަވެސް ކޮމިޓީން ފިނޭންސް މިނިސްޓްރީއާއެކު މަޝްވަރާކުރުމަށްފަހު ނިންމާފައިވަނީ އެފައިސާއަކީ މިފަދަ މަޝްރޫޢަކަށް އެއް އަހަރު ދުވަހުގެ ތެރޭގައި ޚަރަދު ކުރުމަށް ބޮޑު އަދަދެއްކަމަށެވެ. އަދި މި މަޝްރޫޢަކީ އެއް އަހަރު ދުވަހުން ނިންމޭނެކަމަށް ލަފާކުރެވޭ މަޝްރޫޢަކަށް ނުވުމާއެކު މަޝްރޫޢުގެ ޚަރަދު ބަޖެޓް ކުރަންވާނީ މަޝްރޫޢު ޑިސްބަރސްމަންޓް ޕްލޭނާ އެއްގޮތަށް އަހަރުތަކަށް ބަހާލައިގެންކަމަށް މިނިސްޓްރީން ވަނީ ލަފާދީފައެވެ.
ކޮމިޓީން ގެނައި ބަދަލުތަކާއެކު ނިންމާފައިވަނީ ރިކަރަންޓް ޚަރަދާއި އޮފީސް ހިންގުމަށް ބޭނުންވާ ހަރުމުދާ ހޯދުމަށް ކުރާ ޚަރަދުގެ ގޮތުގައި 60.3 މިލިއަން ރުފިޔާ އަދި ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ގޮތުގައި 30 މިލިއަން ރުފިޔާ ކަނޑައެޅުމަށެވެ.
އޮޑިޓަރ ޖެނެރަލް އޮފީހުގެ ބަޖެޓް ދިރާސާކުރި މާލިއްޔަތު ކޮމިޓީގެ ކޮމިޓީ ރިޕޯޓަށް ބަހުސްކުރައްވަމުން މެމްބަރުން ވަނީ ސަރުކާރު ހިއްސާވާ ކުންފުނިތަކާއި ދައުލަތުގެ އިދާރާތަކުގެ ޕާފޯމެންސް އޮޑިޓެއް ނުހެދޭ މައްސަލަ ފާހަގަކުރައްވާ އެކަމުގެ ކަންބޮޑުވުން ފާޅުކުރައްވާފައެވެ. ބަހުސް މަރުހަލާގައި ހުޅުދޫ ދާއިރާގެ އެމްޑީޕީ މެމްބަރ އިލްޔާސް ލަބީބު ވަނީ ސިވިލް ސަރވިސްގައި މަސައްކަތްކުރާ މުވައްޒަފުންގެ ޕާފޯމެންސް އޮޑިޓެއް އަންނަ އަހަރު ފެށުމަށް ކޮމިޓީ ރިޕޯޓަށް އިސްލާހު ހުށަހަޅުއްވާފައެވެ. މިއިސްލާހަށް ތާއީދުކުރެއްވީ ދާންދޫ ދާއިރާގެ އެމްޑީޕީ މެމްބަރ ޔައުގޫބް އަބްދުﷲ އެވެ.
މިއިސްލާހާއެކު ކޮމިޓީ ރިޕޯޓް ތަޅުމުގައި ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ. އެއީ 49 މެމްބަރުންގެ ވޯޓުންނެވެ.
