ވިއްސާރައިގައި ފެންބޮޑުވުމުން ދެ މީހުން ކައިވެނިކުރާ ތަނަށް ދިޔައީ ލޯގަނޑަކަށް އެރިގެން
20 އޮކްޓޯބަރު 2021 | ބުދަ 04:18މި ވީޑިއޯއަށް ގިނަ ބަޔެއްގެ ސަމާލުކަން ވަނީ ލިބިފައި
ކެރެލާ ދެ މީހަކު ކައިވެނި ކުރަން ލޯގަނޑަށް އެރިގެންދަނީ
އިންޑިޔާގެ ދެކުނު ސްޓޭޓެއް ކަމުގައިވާ ކެރެލާއަށް މިއީ ވަރަށް ބޯކޮށް ވާރޭވެހެމުންދާ ދުވަސްވަރެކެވެ. ބޯކޮށް ވާރޭވެހި ކެރެލާ އޮތީ ގާތްގަނޑަކަށް ފެނުއަޑީގައެވެ. މިހާރުވެސް ފެންބޮޑުވުމުގެ ހާދިސާތަކުގައި މީހުން މަރުވެ، އަނެއް ބަޔަކު ގެއްލި، މީހުން ދިރިއުޅެމުންދާ ގެތަކަށާއި ގެންގުޅޭ އެއްޗިއްސަށް ވެސް އަންނަނީ ގެއްލުންތައްވަމުންނެވެ. ދަތުރުފަތުރު ކުރުމަށް ވެސް ބޮޑެތި ގޮންޖެހުންތަކެއް ވަނީ ކުރިމަތިވެފައެވެ. އެހެންނަމަވެސް މިހާލަތުގައި ވެސް ދަތުރުކޮށް، ކުރަން ބޭނުންވާ ކަމެއް ކުރެވޭތޯ ބަލާ މީހުން ވެސް އުޅެއެވެ.
އެގޮތުން ކެރެލާގެ ދެ މީހަކު މިވަނީ ކައިވެނި ކުރުމަށްޓަކައި މި ހާލަތުގައި ވެސް ދާން ބޭނުންވާ ތަނަށް ގޮސްފައެވެ. މި ދެ މީހުން ކައިވެނިކުރާ ތަނަށް ދިއުމަށްޓަކައި، ކައްކަން ބޭނުންކުރާ ލޯގަނޑަކަށް އެރިގެން ފެންގަނޑު ތެރޭގައި ދާ މަންޒަރު ފެންނަ ވީޑިއޯއަކަށް މިވަނީ ގިނަ ބަޔެއްގެ ސަމާލުކަން ލިބިފައެވެ. މި ދެމީހުންނަށް އެރޭވަރުގެ ލޯގަނޑެއް ހޯދީ ފައްޅިއަކުންނެވެ. ވީޑިއޯއިން ފެންނަ ގޮތުގައި ލޯގަނޑު ތެރެއަށް ދެ މީހުން އެރުމުން ފެންގަނޑުތެރޭގައި ތިބި ދެމީހަކު ލޯގަނޑު ފެންގަނޑުތެރޭގައި ދަމާފައި ގެންދެއެވެ. މި މީހުންނާއެކު ފޮޓޯ ގްރާފަރެއް ވެސް ފެންގަނޑަށް އެރިގެންދާތަން ފެނެއެވެ. މި ވީޑިއޯ ސޯޝަލް މީޑިޔާގައި ދައުރުވަމުން އަންނައިރު ޗެނަލް އޭޝިޔާނެޓަށް ދިން އިންޓަރވިއުގައި ކައިވެނިކުރި އަންހެން މީހާ ބުނެފައިވަނީ ކައިވެނީގެ ރަސްމިއްޔާތު ދިޔައީ ދުވަހަކު ވެސް ހީނުކުރާ ގޮތަކަށްކަމަށެވެ.
އެމީހުން ކައިވެނި ކުރަން ހަމަޖެހިފައިވާ ތަނަކީ ވެސް ކޮންމެވެސް ވަރަކަށް ފެންބޮޑުވެފައިވާ ތަނެކެވެ. ކުޑަ ރަސްމިއްޔާތެއް ބާއްވައި ދެ މީހުން ކައިވެނިކޮށްފައިވާއިރު މީޑިޔާ ރިޕޯޓްތައް ބުނާގޮތުން ދެ މީހުންނަކީ ވެސް ސިއްހީ ދާއިރާގައި މަސައްކަތްކުރާ ދެ މީހުންނެވެ.
ސޯޝަލް މީޑިޔާގައި ދައުރުވަމުން އަންނަ ވީޑިއޯތަކުގެ ތެރެއިން އެއް ވީޑިއޯއެއްގައި މީހަކު ބުނާ އަޑުއިވެނީ ބޯޓެއް ކުއްޔަށް ނެގިނަމަ މާ ރަނގަޅުވާނެ ކަމަށެވެ.
ކެރެލާއަށް ކުރަމުންދާ ވިއްސާރާގައި ކާރުތަކާއި ބަސްތައް ވެސް ވަނީ ފެނުއަޑީގައެވެ. ހާލުގައި ޖެހިފައިވާ މީހުން ސަލާމަތްކުރުމަށް އަސްކަރިއްޔާ އާއި ނޭވީ އަދި އެއަރފޯސް އަންނަނީ އެހީތެރިކަން ފޯރުކޮށްދެމުންނެވެ. އަދި ހާލުގައި ޖެހިފައިވާ މީހުންނަށް ޚާއްސަކޮށް ކޭމްޕްތަކެއް ވެސް ވަނީ ޖަހާފައެވެ.
