ފާއިތުވި 24 ގަޑިއިރުތެރޭ ރާއްޖެއިން 113 މީހުން ކޮވިޑް-19ށް ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން ހާމަކޮށްފައިވާ ތަފާސްހިސާބުތަކަށް ބަލާއިރު 113 މީހުންގެ ތެރެއިން މާލެ ސަރަހައްދުން ޕޮޒިޓިވްވެފައިވަނީ 36 މީހުންނެވެ. ރަށްރަށުން 69 މީހުން ޕޮޒިޓިވްވެފައިވާއިރު ހިނގަމުންދާ ރިސޯޓްތަކުން 6 މީހުން ޕޮޒިޓިވްވެފައިވެއެވެ. އަދި ލައިވް އެބޯޑް ތަކުން 2 މީހަކު ވަނީ ކޮވިޑަށް ޕޮޒިޓިވްވެފައެވެ.

މިއާއެކު ރާއްޖެއިން ކޮވިޑަށް ޕޮޒިޓިވްވި މީހުންގެ އަދަދު ވަނީ 86،324ށް އަރާފައެވެ. މީގެތެރެއިން 84،793 މީހުން ވަނީ ބަލިން ރަނގަޅުވެފައެވެ. އަދި މިވަގުތު 1279 މީހަކަށް އަންނަނީ މިބަލީގައި ފަރުވާދެމުންނެވެ. އަދި މީގެތެރެއިން 17 މީހަކަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ.

ރާއްޖެއިން މިހާތަނަށް ކޮވިޑް ޖެހިގެން 239 މީހަކު ވަނީ ނިޔާވެފައެވެ.

ރާއްޖޭގައި މިހާރު ކޮވިޑްގެ އަދަދުތައް ވަނީ ވަކި މިންވަރެއްގައި ކޮންޓްރޯލްކުރެވިފައެވެ. ނަމަވެސް ކޮވިޑުން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުކަންދިނުމަށް ކަމާބެހޭ ފަރާތްތަކުން އަންނަނީ އިލްތިމާސްކުރަމުންނެވެ.