ރާއްޖޭގައި ސުވާން ފުޓްބޯޅަ ކުޅުންތެރިން ބިނާކުރުމުގެ މަޝްރޫއު ސްޕެއިން އަދި ރެއާލް މެޑްރިޑުގެ ލެޖެންޑް މިޝޭލް ސަލްގާޑޯގެ ކުލަބު، ރިއަލް ހިސްޕަނިއާ އެފްސީއާ ހަވާލުކޮށްފިއެވެ.

މި މަޝްރޫއަކީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޓުވާޑްސް ފިއުޗާ ބެނާގެ ދަށުން ހިންގޭ އެންމެ ބޮޑު މަޝްރޫއެވެ. މި މަޝްރޫއުގެ ދަށުން ޒުވާން ފުޓްބޯޅަ ކުޅުންތެރިން ޅަ އުމުރުން ފެށިގެން ހައި ޕާފޯމަންސް ސެންޓަރެއްގެ ތެެރެއިން ތަމްރީނުކުރެވި، ސީނިއާ ފުޓްބޯޅައަށް ގެނެސްދޭނެއެވެ.

ހައި ޕާފޯމަންސް ސެންޓަރެއްގެ ގޮތުގައި ހުޅުމާލޭ ސެންޓަރު (ގައުމީ ފުޓްބޯޅަ ސްކޫލް) އެންމެ ފުރަތަމަ ހިންގާއިރު، އެ ތަނަށް ހޮވޭ ކުދިން ނަގަން 18 އެކެޑަމީއެއް މުޅި ރާއްޖޭގައި ހުޅުވާނެއެވެ. އޭގެ ތެރެއިން މާލެ ސަރަހައްދުގައި އަށް އެކެޑަމީ ހުޅުވާއިރު، އަތޮޅު ތެރޭގައި 10 އެކެޑަމީ ހުޅުވާނެއެވެ. މި އެކެޑަމީތައް ކުރިއަށްގެންދާނީ ސްކޫލުތަކާ ގުޅިގެންނެވެ.

ހޯމަ ދުވަހު ހޮޓެލް ޖެންގައި ބޭއްވި ޚާއްސަ ރަސްމިއްޔާތެއްގައި ވާހަކަދައްކަމުން ސަލްގާޑޯ ބުނީ މި މަޝްރޫއުގެ މަސައްކަތް މިދިޔަ ތިނެއް ނޫނީ ހަތަރު އަހަރު ކުރިން ފެށުނު ކަމަށާއި، މަސައްކަތް ލަސްވީ ކޮވިޑް-19 އާ ގުޅިގެން ކަމަށެވެ. އަދި ރާއްޖޭގައި ފުޓްބޯޅަ ކުރިއަރުވާނަމަ ފަށަން ޖެހޭނީ ގްރާސްރޫޓުން ކަމަށާއި، ގްރާސްރޫޓުން ފަށައިގެން ކަންކަން ބަދަލުނުކޮށް، ސީނިއާ ގައުމީ ޓީމު ރަނގަޅެއް ނުކުރެވޭނެ ކަމަށެވެ.

މި ރަސްމިއްޔާތުގައި ސަލްގާޑޯ ވަނީ މި މަޝްރޫއު ކުރިއަށްދާނެ ގޮތް ތަފުސީލުކޮށް ކިޔާދީފައެވެ.

އެގޮތުން އެންމެ ފުރަތަމަ ހަތް އަހަރުން ފެށިގެން 12 އަހަރުން ދަށާ ހަމައަށް އެކި އުމުރުފުރާތަކަށް ބަހާލައިގެން ކުދިން ތަމްރީނުކުރާނީ އެ ސްކޫލް ނުވަތަ އެކެޑަމީތަކުންނެވެ. މި ހުރިހާ އެކެޑަމީއަކުން ހައި ޕާފޯމަންސް ސެންޓަރަށް ނަގާނީ 12 އަހަރާއި 17 އަހަރާ ދެމެދުގެ ކުދިންނެވެ. އެއަށްފަހު ހައި ޕާފޯމަންސް ސެންޓަރުގެ އެންމެ ރަނގަޅު 20 ކުޅުންތެރިން ކޮންމެ އަހަރަކު ދިވެހި ޕްރިމިއާ ލީގުގެ ކުލަބުތަކަށް ދެވޭނެ ގޮތެއް މަގުފަހިކުރުމަށްވެސް ވަނީ ނިންމާފައެވެ.

އެންމެ ފުރަތަމަ ހުޅުމާލޭގައި ގާއިމުކޮށްފައިވާ ހައި ޕާފޯމަންސް ސެންޓަރަށް ކުދިން ނަގާއިރު، އަވަސް މުސްތަގުބަލެއްގައި ރާއްޖޭގެ ދެކުނުގައިވެސް ހައި ޕާފޯމަންސް ސެންޓަރެއް ހެދުމަށް ވަނީ ނިންމާފައެވެ. މި ރަސްމިއްޔާތުގައި ވާހަކަދައްކަވަމުން އެފްއޭއެމުގެ ރައީސް ބައްސާމް އަދީލް ޖަލީލް ވިދާޅުވީ މި މަޝްރޫއުގެ އަމާޒަކީ މުޅި ރާއްޖެ ޝާމިލުވާ ގޮތަށް ޕްރޮގްރާމުތައް ހިންގުން ކަމަށާއި، އެގޮތުން މާލެ އާއި ރާއްޖޭގެ ދެކުނުގެ އިތުރުން އުތުރުގައިވެސް ހައި ޕާފޯމަންސް ސެންޓަރެއް ހެދުމުގެ ވިސްނުން ގެންގުޅުއްވަމުން އަންނަ ކަމަށެވެ. އެގޮތުން ދެކުނުގައި ގާއިމުކުރާ ސެންޓަރުގެ މަސައްކަތް ކުރިއަށް އޮތް އަހަރެއްގެ ތެރޭގައި ފެށޭނެ ކަމަށްވެސް ވިދާޅުވިއެވެ.

މި ޕްރޮގްރާމުގައި އެކި އުމުރުފުރާތަކަށް ހާއްސަކޮށް ކޯޗިން ސްޓާފުން ވަނީ އައްޔަނުކޮށްފައެވެ. މި ކޯޗުންގެ އެންމެ އިސް މީހެއްގެ ގޮތުގައި ސަލްގާޑޯ މަސައްކަތްކުރާއިރު، އެ ކޯޗިން ޓީމާއެކު ދިވެހި ކޯޗުންވެސް ހަރަކާތްތެރިވާނެއެވެ. އެފްއޭއެމުން ސަލްގާޑޯއާއެކު ހަ އަހަރުގެ އެއްބަސްވުމެއް ހަދާފައިވާއިރު، މި ހަ އަހަރު ފަހުން އައު އެއްބަސްވުމެއްގައި ސޮއިކުރެވޭނެ ކަމުގެ އުއްމީދު އެބައޮތް ކަމަށް ސަލްގާޑޯ ބުންޏެވެ. އަދި އައު އެއްބަސްވުމުގައި ސޮއިކުރާނީ މި މަޝްރޫއުގެ ނަތީޖާ ނެރުމަށްފަހު ކަމަށްވެސް ވަނީ ބުނެފައެވެ.

އެފްއޭއެމުން ފަށާ ހައި ޕާފޯމަންސް ސެންޓަރުގައި ކުދިންގެ ހުރުމާއި، ކެއުން އަދި ކިޔެވުންވެސް ކުރިއަށްދާއިރު، އެ ސެންޓަރުގައި ކުދިންނަށް ކިޔަވައިދޭ ކަރިކިއުލަމް ތައްޔާރުކުރުމުގެ މަސައްކަތް ތަޢުލީމާ ބެހޭ ވުޒާރާއާ ގުޅިގެން މިދިޔަ އަހަރުގެ ތެރޭގައި އެފްއޭއެމުން ވަނީ ފަށާފައެވެ.