ޙޫޘީންގެ 160 ހަނގުރާމަވެރިން މަރާލައިފި
24 ގަޑިއިރުތެރޭ ވައިގެ 32 ހަމަލާ ދީފި
ޙޫޘީންގެ ހަނގުރާމައިގެ ތެރެއިން
ޔަމަނުގައި ހަރަކާތްތެރިވާ ޙޫޘީ ހަނގުރާމަވެރިންގެ ބާރުގެ ދަށުގައި އޮންނަ މަރިބް ސިޓީއަށް ސައޫދީ ކޯލިޝަނުން ދިން ވައިގެ ހަމަލާއެއްގައި 160 ހަނގުރާމަވެރިން މަރާލައިފިއެވެ.
ސައޫދީ ކޯލިޝަނުން, ސައުދީ ޕްރެސް އޭޖެންސީއާ ހަވާލާދީ ބުނެފައިވަނީ, 24 ގަޑިއިރުތެރޭ ވައިގެ 32 ހަމަލާ ދީފައިވާކަމަށެވެ. އަދި މީގެ އިތުރުން 11 އަސްކަރީ އުޅަނދު ގޮއްވާލުމާއެކު 160އަށްވުރެ ގިނަ ހަނގުރާމަވެރިން މަރުވެފައިވާކަމަށް ރިޕޯޓުތަކުން ބުނެއެވެ.
އިދިކޮޅުން, ލިބިފައިވާ ގެއްލުން ތަކާމެދު ކަންބޮޑުވުން ފާޅުކޮށް ވާހަކަ ދައްކާފައިވަނީ ވަރަށް މަދު ފަހަރެއްގައެވެ. އަދި ހަމަލާތަކުގައި މަރުވި މީހުންގެ އަދަދު މިހާތަނަށް އެނގިފައެއް ނުވެއެވެ.
ނަމަވެސް ސައުދީ ކޯލިޝަނުން ބުނާ ގޮތުގައި މިދިޔަ ހޯމަ ދުވަހުން ފެށިގެން މިއަދާއި ހަމައަށް އަސްކަރީ ހަމަލާ ތަކުގައި 700 އަށްވުރެ ގިނަ އިދިކޮޅު މީހުންވަނީ މަރާލައިފައެވެ.
މިދިޔަ ފެބްރުއަރީ މަހުގެ ޙޫޘީ ހަނގުރާމަވެރިން މަރިބް ސިޓީ ޙިޞާރުކުރުމަށް ފެށި ހަނގުރާމައަށް މެދުކެނޑުމެއް އައިސް، ފާއިތުވެދިޔަ މަދު ހަފްތާތަކުގެ ތެރޭގައިވަނީ އަނެއްކާވެސް އާ ބާރުތަކާއެކު ކުރިއަށް ގެންދަން ފަށާފައެވެ.
