މެލޭޝިއާގައި ހިންގި 1އެމްޑީބީގެ ބޮޑު ޚިޔާނާތާ ގުޅިގެން ކުރީގެ ބޮޑު ވަޒީރު ނަޖީބު ރައްޒާގުގެ މައްޗަށް އުފުލި ބައެއް ދައުވާތައް ސާބިތުވެފައިވާއިރު، އާއިލީ ކަމެއްގައި ސިންގަޕޫރަށް ވަޑައިގެންނެވުމަށްޓަކައި ނަޖީބުގެ ޕާސްޕޯޓު ކޯޓުން ދޫކޮށްލައިފިއެވެ.

މެލޭޝިއާގެ އެޕީލް ކޯޓުން ނަޖީބުގެ ޕާސްޕޯޓު ދޫކޮށްލާފައިވަނީ ހޯމަ ދުވަހުއެވެ. އެގޮތުން ޕާސްޕޯޓު ދޫކޮށްލުމުގެ ހުއްދަ ދިނީ ނަޖީބުގެ ކާފަދަރިފުޅު އުފަންވާތަން ދެކިވަޑައިގަތުމަށް ސިންގަޕޫރަށް ވަޑައިގެންނެވުމުގެ ހުއްދައަކަށް ކޯޓުގައި އެދިވަޑައިގެންނެވުމުންނެވެ.

މެލޭޝިއާގެ ކުރީގެ ބޮޑުވަޒީރު ނަޖީބު ރައްޒާގުގެ މައްޗަށް އުފުލި ދައުވާތަކުގެ ތެރެއިން ހަތް ދައުވާ ސާބިތުވެފައިވާތީ އޭނާ 12 އަހަރަށް ޖަލަށްލުމަށް މެލޭޝިއާގެ ހައިކޯޓުން ހުކުމްކޮށްފައިވަނީ މިދިޔަ އަހަރުގެ ޖުލައި މަހުއެވެ.

މެލޭޝިއާގައި ހިންގި 1އެމްޑީބީގެ ބޮޑު ޚިޔާނާތާ ގުޅިގެން ނަޖީބު ރައްޒާގުގެ މަށްޗަށް 42 ދައުވާއެއް އުފުލާފައިވެއެެވެ. އޭގެތެރެއިން 5 މައްސަލައަކާ ގުޅިގެން 7 ދައުވާ ސާބިތުވާ ކަމަށް މެލޭޝިއާގެ ހައިކޯޓުން ނިންމާފައިވެއެވެ. އެ ދައުވާތަކުގެ ތެރޭގައި ހިމެނެނީ، މަނީ ލޯންޑަރިންގއާއި މަގާމުގެ ނުފޫޒު ބޭނުން ކުރުމުގެ ދައުވާތަކެކެވެ.

މި ހުރިހާ ދައުވާތަކެއް ވެސް ގުޅިފައިވަނީ މެލޭޝިޔާގެ ތަރައްގީގެ ފަންޑުން ނަޖީބުގެ އަމިއްލަ އެކައުންޓަށް 42 މިލިއަން ރިންގިޓް ޖަމާކޮށްފައިވާ މައްސަލައާ ގުޅިގެންނެވެ. މިކަން ހިނގާފައިވަނީ ނަޖީބުގެ ވެރިކަމުގެ ދުވަސްވަރުއެވެ.

މިއީ މެލޭޝިއާގެ ވެރިކަން ކުރެއްވި ބޭފުޅެއްގެ މައްޗަށް ބޮޑެތި ޖިނާއި ބޮޑެތި ކުށްތަކެއް ސާބިތުވި ފުރަތަމަ ފަހަރެވެ.