''ފިލްމް ފޯ ޗޭންޖް: ކްލައިމެޓް އެޑިޝަން'' ގައި ބައިވެރިވުމަށް ހުޅުވާލައިފި

''ފިލްމް ފޯ ޗޭންޖް: ކްލައިމެޓް އެޑިޝަން'' ގައި ބައިވެރިވުމުގެ ފުރުސަތު ހުޅުވާލައިފިއެވެ.

ފިލްމް ފޯ ޗޭންޖް ކްލައިމެޓް އެޑިޝަން އަކީ ޔޫއެންޑީޕީ ދިވެހިރާއްޖެ އާއި ދިރާގު ގުޅިގެން ކުރިއަށް ގެންދާ ޕްރޮޖެކްޓެކެވެ. މި ޕްރޮޖެކްޓްގެ މަޤްޞަދަކީ ޒުވާނުން ބާރުވެރިކުރުވައި ރާއްޖޭގެ ތިމާވެއްޓަށް އަންނަ ބަދަލުތަކާ މެދު ވިސްނައި އެކަމާ ގުޅިގެން ދިމާވާ މައްސަލަތައް ފިލްމްގެ ޒަރިއްޔާއިން ހާމަކޮށްދިނުމެވެ. މީގެ ސަބަބުން ޒުވާނުންނަށް މޯބައިލް ފޯނާއި ޓެބްލެޓް ފަދަ ޒަމާނީ ވަސީލަތްތައް ބޭނުންކޮށްގެން ޑޮކިއުމްންޓަރީ-ސްޓައިލް ފިލްމް ހެދުމަށް ބޭނުންވާ ފަންނީ ހުނަރުތަކާއި އުކުޅުތައް ދަސްވެގެންދާނެއެވެ.

ދިރާގުން ބުނީ މި ޕްރޮޖެކްޓްގައި ހިމެނޭނީ ތަމްރީން ބަޔަކާއި ޕޯސްޓް-ޕްރޮޑަކްޝަން ބަޔެއް ކަމަށެވެ. ކޮންމެ ބައެއްވެސް ކުރިއަށް ދާނީ ފިލްމީ ދާއިރާގައި މަސައްކަތްކުރާ ފަރާތްތަކާއި ތަޖުރިބާކާރުންގެ އިރުޝާދުގެ ދަށުން ކަމަށާއި، މި ޕްރޮޖެކްޓް ނިމިގެން ދާއިރު ބައިވެރިން ގްރޫޕްތަކަށް ބަހާލެވި މި އަހަރުގެ ޝިޔާރަށް (ތިމާވެއްޓަށް އަންނަ ބަދަލުތައް) 5 ކުރު ފިލްމް ތައްޔާރުކުރާނެ ކަމަށެވެ.  މިއީ އދ.ގެ 13 ވަނަ ދެމެހެއްޓެނިވި ތަރައްގީގެ ލަނޑުދަނޑިއާ ގުޅުވައިގެން އެކުލެވިފައިވާ ޝިޔާރުކަން ފާހަގަކޮށް ދިރާގުން ބުނީ ބައިވެރިންގެ ފިލްމްތައް އެކި ސޯޝަލް މީޑިއާ އަދި ޕަބްލިކް ޕްލެޓްފޯމް ތަކުގައި ދެއްކޭނެ ކަމަށާއި، މި ފިލްމްތައް އެކިއެކި ތިމާވެއްޓަށް އަންނަ ބަދަލުތަކާ ބެހޭ ޒުވާނުންގެ އެޑްވޮކަސީ މަންސިތަކުގައި ދެއްކުމުގެ ފުރުސަތު ވެސް ހުޅުވިގެންދާނެ ކަމަށެވެ.

18 އަހަރުން މަތީގެ ހުރިހާ ދިވެހި ރައްޔިތުންނަށް ވެސް މި ޕްރޮޖެކްޓްގައި ބައިވެރިވުމުގެ ފުރުސަތު ވަނީ ހުޅުވާލާފައެވެ. ނަމަވެސް އިސްކަން ދެވޭނީ 18 އަހަރާއި 25 އަހަރާ ދެމެދުގެ ޒުވާނުންނަށެވެ. މީގެ ތެރެއިން ޕްރޮޖެކްޓްގައި ބައިވެރިވުމަށް ހޮވާލެވޭނީ 30 މީހުންނަށެވެ. މި ޕްރޮޖެކްޓްގައި އިތުރަށް އަންހެނުން ބައިވެރިވުމަށް އިލްތިމާސްކޮށްފައިވެއެވެ. އަދި ބައިވެރިން ހޮވުމުގައި ބޮޑަށް ބަލާނީ ފިލްމް ހެދުމުގެ ތަޖުރިބާ މަދު މީހުންނަށް ކަމަށް ދިރާގުން ބުނެއެވެ.

ފިލްމް ފޯ ޗޭންޖް ކްލައިމެޓް އެޑިޝަން ގައި ބައިވެރިވުމުގެ ފުރުސަތު ހުޅުވާލައި ދިރާގުން ބުނީ ބައިވެރިވުމަށް 24 އޮކްޓޫބަރު 2021ގެ ކުރިން ފޯމު ހުށަހަޅަން ޖެހޭ ކަމަށާއި ތަމްރީން ބާއްވަނީ އޮކްޓޫބަރު މަހުގެ ފަހު ހަފްތާގައި ކަމަށެވެ. އަދި ފިލްމް ފޯ ޗޭންޖް: ކްލައިމެޓް އެޑިޝަން ގައި ބައިވެރިވުމަށް ހޮވޭ މީހުންނަށް ޓްރެއިނިންގ ސެޝަންތައް ބޭއްވޭނެ ތަން ފެށޭ ތާރީޚާއި ކައިރިކޮށް ހާމަކުރެވޭނެ ކަމަށް ދިރާގުން ބުނެއެވެ.

ފިލްމް ފޯ ޗޭންޖް ކްލައިމެޓް އެޑިޝަންގައި ބައިވެރިވާން ބޭނުންވާ މީހުންނަށްtinyurl.com/ffcca21ލިންކުން ބައިވެރިވާ ފޯމު ހުށައެޅޭނެއެވެ.