މެދުރާއްޖެ ތެރެއަށް ޔެލޯ އެލަރޓް ނެރެފި
އާދިއްތަ ދުވަހުގެ ރޭ 23:15ން ފެށިގެން ފަތިހު 3:15އާ ހަމައަށް ޅ އަތޮޅުން ފެށިގެން އދ އަތޮޅަށް ވަނީ ޔެލޯ އެލަރޓް ނެރެފައި
ހުޅަނގު މޫސުމުގެ ވިއްސާރައިގައި މާލޭގެ ހާލަތު: މަގުމަތީގައި ފެންބޮޑުވެފައި
ޅ އަތޮޅުން ފެށިގެން އދ އަތޮޅަށް ޔެލޯ އެލަރޓް ނެރެފިއެވެ.
މޫސުމާބެހޭ ގައުމީ އިދާރާއިން ބުނީ އާދިއްތަ ދުވަހުގެ ރޭ 23:15ން ފެށިގެން ފަތިހު 3:15އާ ހަމައަށް އެސަރަހައްދަށް ޔެލޯ އެލަރޓް ނެރޭކަމަށެވެ. މިވަގުތުތަކުގައި އެސަރަހައްދަށް ގަޑިއަކު 25 މޭލާ 30 މޭލާ ދެމެދުގެ ބާރުމިނުގައި ވައިޖެހޭނެކަމަށާއި ވިލާގަނޑުގައި ގަޑިއަކު 50 މޭލަަށް ވައިގަދަވާނެކަމަށެވެ. އަދި ކަނޑުތައް ގަދަވާނެކަމަށް ލަފާކުރެވޭކަމަށެވެ.
މީގެއިތުރުން ހއ އަތޮޅުން ފެށިގެން ތ އަތޮޅަށް ވަނީ ވައިޓް އެލަރޓް ނެރެފައެވެ. އާދިއްތަ ދުވަހުގެ ރޭ ފަތިހު 4:30އާ ހަމައަށް ވައިޓް އެލަރޓް ނެރެފައިވާއިރު, މެޓް އޮފީހުން ބުނީ މިސަރަހައްދަށް ބޯކޮށް ވާރޭވެހުމާއެކު ގުގުރާނެކަމަށެވެ. އަދި ގަޑިއަކު 22 މޭލާ 27 މޭލާ ދެމެދުގެ ބާރުމިނުގައި ވައިޖެހޭނެކަމަށާއި ވިލާގަނޑުގައި ގަޑިއަކު 50 މޭލަަށް ވައިގަދަވާނެކަމަށެވެ. މީގެއިތުރުން ކަނޑުތައް ގަދަވާނެކަމަށް ލަފާކުރެވޭކަމަށްވެސް މެޓް އޮފީހުން ބުނެއެވެ.
މެޓް އޮފީހުން ބުނީ ހޯމަ ދުވަހުގެ ހެނދުނު 10 ޖެހުމާ ހަމައަށް ރާއްޖޭގެ އެކިހިސާބަށް ވިއްސާރަކުރާނެ ކަމަށާއި, ވައިގަދަވުމާއެކު ބޯކޮށް ވާރޭވެހުން އެކަށީގެންވާކަމަށެވެ. ހުޅަނގުދެކުނާއި ހުޅަނގުން ގަޑިއަކު 17 މޭލާ 27 މޭލާ ދެމެދުގެ ބާރު މިނުގައި ވައި ޖެހޭނެކަމަށާއި ވިލާގަނޑުގައި ގަޑިއަކު 40 މޭލާ 50 މޭލާ ދެމެދުގެ ބާރުމިނަކަށް ވައިގަދަވުން އެކަށީގެންވާކަމަށެވެ. އަދި ކަނޑުތައް ގަދަވާނެކަމަށާއި, ރާޅުގެ އުސްމިން ހުންނާނެކަމަށް ބެލެވެނީ 5 ފޫޓާ 8 ފޫޓާ ދެމެދުގައި ކަމަށެވެ. އަދި ބައެއް ރަށްތަކަށް އުދައިގެ އަސަރު ކުރުން އެކަށީގެންވާކަމަށްވެސް މެޓް އޮފީހުން ބުނެއެވެ.
މޫސުން ގޯސްވެފައިވާތީ, ހުރިހާ ފަރާތްތަކުން (ޚާއްސަކޮށް ކަނޑު ދަތުރުކުރާ ފަރާތްތަކުން) މޫސުމަށް ވަރަށް ބޮޑަށް ސަމާލުވުމަށް ވަނީ އިލްތިމާސްކޮށްފައެވެ.
