ކާބޯތަކެތީގެ ރައްކާތެރިކަމުގެ ބިލަށް އާންމުންގެ ޚިޔާލު ހޯދުމަށް ހުޅުވާލައިފި
17 އޮކްޓޯބަރު 2021 | އާދީއްތަ 12:32މިމަހުގެ 31ގެ ކުރިން ޚިޔާލު ހުށަހެޅުމަށް ވަނީ ހުޅުވާލާފައި
ރައްޔިތުންގެ މަޖިލިސް
ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ކާބޯތަކެތީގެ ރައްކާތެރިކަމުގެ ބިލަށް އާންމުންގެ ޚިޔާލު ހޯދުމަށް ހުޅުވާލައިފިއެވެ.
ރައްޔިތުންގެ މަޖިލީހުގެ އިދާރާއިން ނެރުނު އިއުލާނެއްގައި ބުނީ މަޖިލީހުގެ އިޖުތިމާއީ ކޮމިޓީން ދިރާސާކުރަމުންދާ ކާބޯތަކެތި ރައްކާތެރިކުރުމުގެ ބިލާ ގުޅޭގޮތުން އާންމުންގެ ޚިޔާލު ހޯދުމަށް އާދީއްތަ ދުވަހުން ފެށިގެން އެ ފުރުސަތު ހުޅުވާލާފައިވާކަމަށެވެ.
އެހެންކަމުން މި ބިލަށް ހުށަހަޅަން ބޭނުންވާ ޚިޔާލެއް ނުވަތަ އިސްލާހެއް އޮތްނަމަ 31 އޮކްޓޫބަރު ވާ އާދިއްތަ ދުވަހުގެ މެންދުރު 12:00ގެ ކުރިން ކޮމިޓީގެ އީމެއިލް އެޑްރެސް social.affairs_committee@majlis.gov.mv އަށް ނުވަތަ ރައްޔިތުންގެ މަޖިލީހުގެ އިދާރާއަށް ލިޔުމުން ފޮނުވުމަށް ވަނީ އެދިފައެވެ.
ކާބޯތަކެތީގެ ބިލަށް މަޖިލީހުގައި ބަހުސް ކުރިއަށްގެންގޮސްފައިވާއިރު، މި ބިލް މިހާރު އޮތީ ކޮމިޓީ މަރުހަލާގައެވެ. ބިލަށް ބަހުސްކުރެއްވި މެމްބަރުންގެ ތެރެއިން ހޯރަފުށީ ދާއިރާގެ މެމްބަރު އަހުމަދު ސަލީމް ވިދާޅުވީ, ކާބޯތަކެތީގެ ރައްކާތެރިކަން ލިބުމަކީ އަސާސީ ހައްގަކަށްވާއިރު، ކާބޯތަކެތީގެ ރައްކާތެރިކަމުގެ ބިލަކީ ލާމަރުކަޒީ އުސޫލުން ގާނޫނު ތަންފީޒު ކުރެވޭ ގޮތަށް ވިސްނާފައި ތައްޔާރުކޮށްފައި އޮތް ބިލެއްކަމަށެވެ. މި ބިލު ގާނޫނަކަށް ވެގެން އަންނައިރު, ހެދޭ ގަވާއިދު ތަކަކީ އަމަލުކުރުން ފަސޭހަ ގަވާއިދުތަކަށް ވާންޖެހޭ ކަމަށް ވެސް މެމްބަރު ވިދާޅުވިއެވެ.
މީގެ އިތުރުން ބިލަށް ބަހުސްކުރައްވަމުން މަނަދޫ ދާއިރާގެ މެމްބަރު އަހުމަދު ހާރޫނު ވަނީ ގާނޫނުއަސާސީގައި ރަނގަޅު ކާނާއާއި ސާފު ބޯފެން ފުދޭ މިންވަރަކަށް ލިބެންޖެހޭ ކަމަށް އޮތްނަމަވެސް ކާބޯތަކެތީގެ ރައްކާތެރިކަން ކަށަވަރު ކުރުމަށް މިހާތަނަށް ވަކި ގާނޫނެއް ނެތްކަން ފާހަގަކުރައްވާފައެވެ. ކާބޯތަކެތީގެ ރައްކާތެރިކަމުގެ ބިލު ގާނޫނަކަށް ވެގެން އަންނަތާ 3 މަސް ތެރޭގައި ގަވައިދުތަކެއް ހަދައި އެއަަށް އަމަލުކުރަން ޖެހޭކަމަށް ހާރޫނު ވިދާޅުވިއެވެ. ކާބޯތަކެތީގެ ރައްކާތެރިކަން ކަށަވަރުކުރުމަށް ކަނޑައަޅާ ކަންކަމުގައި އިހުމާލުވާ މީހުންނަށް އެޅޭނެ ފިޔަވަޅުތައްވެސް ބިލުގައި ބަޔާންކޮށްފައިވާ ކަމަށް މެމްބަރު ވިދާޅުވިއެވެ.
ކާބޯތަކެތި އުފެއްދުމުގެ މަރުހަލާގައި ރައްކާތެރިކަން ކަށަވަރުކުރުމާއި، ކާބޯތަކެތި އުފައްދައިގެން ވިއްކުމުގައި ހުންނަންޖެހޭ މިންގަނޑުތަކާއި، ކާބޯތަކެތި އުފައްދާ މީހާގެ ހުންނަންޖެހޭ މިންގަނޑުތައް ވެސް މި ބިލުގައި ބަޔާން ކޮށްފައިވެއެވެ.
ދިވެހިރާއްޖެއަށް އިމްޕޯޓުކުރާ ނުވަތަ ދިވެހިރާއްޖެއިން އެކްސްޕޯޓުކުރާ އަދި ދިވެހިރާއްޖޭގައި އުފައްދާ ކާބޯތަކެތި ޓެސްޓުކުރުމަށާއި، ކާބޯތަކެތި އުފައްދާ ތަންތަނާއި، ނުވަތަ ބަންދުކުރާ ތަންތަނާއި، ނުވަތަ ގުދަންކުރާ ތަންތަނާއި، ވިއްކާތަންތަނާއި، ކާބޯތަކެތި ފޯރުކޮށްދޭ ތަންތަނުގެ ސިއްހީ ރައްކާތެރިކަން ބެލުމަށާއި ތަހުލީލުތައް ކުރުމަށް ނޭޝަނަލް ހެލްތު ލެބޯރޓަރީއެއް ގާއިމުކުރަންވާނެކަމަަށް ބިލުގައި ބުނެފައިވެއެވެ. ކާބޯތަކެތީގެ ރައްކާތެރިކަން ކަށަވަރު ކުރުމަށް ޚާއްސަ ލެބޯރޓަރީއެއް ގާއިމްކުރަންވާނެ ކަމަށްވެސް ބިލުގައި ބަޔާން ކޮށްފައިވެއެވެ.
ސަރުކާރުން މިފަދަ ބިލެއް ހުށަހެޅުމުގެ ބޭނުމަކީ، ދިވެހިރާއްޖޭގައި އުފައްދާ އަދި ބޭނުންކުރާ ކާބޯތަކެއްޗާއި، ދިވެހިރާއްޖެއަށް އިމްޕޯޓުކުރާ އަދި ދިވެހިރާއްޖެއިން އެކްސްޕޯޓުކުރާ ކާބޯތަކެތީގެ ރައްކާތެރިކަމުގެ ފެންވަރުކަނޑައެޅުމާގުޅޭ އުސޫލުތައް ބަޔާންކުރުމާއި، ކާބޯތަކެތި އުފައްދައި، ގުދަންކޮށް، ތައްޔާރުކޮށް، ވިއްކާ ތަންތަނުގައި ކާބޯތަކެއްޗަކީ، އިންސާނުންނަށް ސިއްހީގޮތުން އެކަށީގެންވާ، ރައްކާތެރި ތަކެތި ކަމުގައި ހެދުމަށްޓަކައި ޢަމަލުކުރަންޖެހޭ އުސޫލުތަކާއި މިންގަނޑުތަކަށް ބޭނުންވާ ގާނޫނީ އޮނިގަނޑު ގާއިމުކުރުމެވެ.
