ރާއްޖޭގައި ކޮންމެ އަހަރަކުވެސް އިންވިޓޭޝަނަލް ފުޓްބޯޅަ މުބާރާތެއް ބާއްވަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ލަފާދެއްވާފައިވާ ކަމަށް ކުޅިވަރާ ބެހޭ ވަޒީރު އަޙްމަދު މަޚްލޫފް ވިދާޅުވެއްޖެއެވެ.

ވަޒީރު މިހެން ވިދާޅުވީ ހޮނިހިރު ދުވަހުގެރޭ ކުޅުނު ދެކުނު އޭޝިއާގެ އެންމެ ބޮޑު ފުޓްބޯޅަ މުބާރާތް ކަމަށްވާ "އުރީދޫ ސާފް ޗެމްޕިއަންޝިޕް 2021" ގެ ފައިނަލް މެޗުގައި އިންޑިއާއިން 3-0 ގެ ނަތީޖާއަކުން ނޭޕާލް ބަލިކޮށް، އަށްވަނަ ފަހަރަށް މުބާރާތުގެ ތަށި އުފުލާލި ރަސްމިއްޔާތަށްފަހު ދެއްވި އިންޓަވިއުއެއްގައެވެ.

މި އަހަރުގެ ސާފް ޗެމްޕިއަންޝިޕް ރާއްޖޭގައި ބޭއްވިއިރު، މި މުބާރާތް ބޭއްވުމަށް އެންމެ ފުރަތަމަ ތާވަލުކުރީ ބަންގްލަދޭޝްގައެވެ. އެކަމަކު ބަންގްލަދޭޝްގައި ކޮވިޑް-19 ގެ ހާލަތު ގޯސްވުމާއި، އޭގެ އިތުރުން ސާފް ޗެމްޕިއަންޝިޕަށް ސްޕޮންސަރެއް ހޯދަން ކުރި މަސައްކަތުގައި އެކަށީގެންވާ ކުރިއެރުމެއް ނުލިބުމުން، ބަންގްލަދޭޝްއިން މުބާރާތް ބޭއްވުމުގެ ވިސްނުން ދޫކޮށްލިއެވެ. އެއާއެކު މުބާރާތް ބާއްވަން ރާއްޖޭން ވަނީ ނޭޕާލާ ވާދަކޮށް ސާފް ޗެމްޕިއަންޝިޕުގެ ބިޑް ކާމިޔާބުކޮށްފައެވެ.

ހޮނިހިރު ދުވަހުގެރޭ ދެއްވި އިންޓަވިއުއެއްގައި މަޚްލޫފް ވިދާޅުވީ މި ފަހަރުގެ ސާފް ޗެމްޕިއަންޝިޕް ކާމިޔާބުކަމާއެކު ރާއްޖޭގައި ބޭއްވިއިރު، މި މުބާރާތް ނުބޭއްވޭނެ ހިސާބަށް ގޮސްފަ އޮއްވައި މުބާރާތް ރާއްޖޭގައި ބޭއްވީ ރައީސްގެ އެއްބާރުލެއްވުމާއެކު ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލާ ވާހަކަދެކެވިގެން ކަމަށެވެ.

އެއާއެކު ފުޓްބޯޅައިގެ ފޯރި އޮތް މިންވަރު މި މުބާރާތުން ފެނިގެންގޮސްފައިވާ ކަމަށާއި، އެގޮތުން ސާފް ޗެންޕިއަންޝިޕުގައި ރާއްޖޭން ކުޅުނު ކޮންމެ މެޗެއްގައިވެސް ދަނޑު ފުރާލިތަން ފެނިގެންދިޔަ ކަމަށެވެ. އެހެންކަމުން މި ފޯރި ދެމެހެއްޓުމަށް ރާއްޖޭގައި އިންވިޓޭޝަނަލް މުބާރާތެއް ކޮންމެ އަހަރަކު ބޭއްވުމަށް ރައީސް ލަފާ ދެއްވާފައިވާ ކަމަށްވެސް މަޚްލޫފް ވިދާޅުވިއެވެ.

މަޚްލޫފް ވިދާޅުވީ ފުޓްބޯޅައިގެ އިތުރުން މިހާރުވެސް ރާއްޖޭގައި ބައިނަލްއަގުވާމީ މުބާރާތްތަކެއް ބާއްވާފައިވާ ކަމަށާއި، އަދި މި އަންނަ އަހަރުވެސް ގިނަ މުބާރާތްތަކެއް ބޭއްވޭނެ ކަމަށެވެ. އެގޮތުން އޭޝިއާގެ ބޮޑީބިލްޑިން މުބާރާތާއި، އޭޝިއަން ސާފިން އަދި ބެޑްމިންޓަނުގެވެސް ބައިނަލްއަގުވާމީ މުބާރާތްތަކުގެ އިތުރުންވެސް، ބައިނަލަގްވާމީ ގިނަ މުބާރާތްތަކެއް އަންނަ އަހަރު ބޭއްވިގެންދާނެ ކަމަށްވެސް ވިދާޅުވިއެވެ.

ރާއްޖޭގައި ކޮންމެ އަހަރަކު އިންވިޓޭޝަނަލް މުބާރާތެއް ބާއްވަން މަސައްކަތްކުރަމުން އަންނައިރު، ރާއްޖޭގައި ބައިނަލްއަގުވާމީ މުބާރާތްތައް ބޭއްވުމަކީ ރައީސް ޞާލިޙުގެ ރިޔާސީ ވައުދުފުޅެކެވެ. އެގޮތުން މީގެ ކުރިން ޓީޓީ އާއި ބެޑްމިންޓަނުގެ ބައިނަލްއަގުވާމީ މުބާރާތްތައް މީގެ ކުރިން ރާއްޖޭގައި ބާއްވާފައިވާއިރު، މިދިޔަ އޯގަސްޓް މަހުގެ ތެރޭގައި އޭއެފްސީ ކަޕުގެ ދެކުނު އޭޝިއާއަށް ޚާއްސަ ގްރޫޕުގެ މެޗުތައްވެސް ރާއްޖޭގައި ވަނީ ބާއްވާފައެވެ.