ޓްރީ ޓޮޕް ހޮސްޕިޓަލުގައި އަންހެނުންނަށާއި ކުޑަކުދިންނަށް ޚާއްސަ ސެންޓަރެއް!
މި ސެންޓަރު ހުންނާނީ ހޮސްޕިޓަލުގެ 3 ވަނަ ފަންގިފިލާގައި
އަންހެނުންނާއި ކުޑަކުދިންނަށް ޚާއްސަ ސެންޓަރުގެ ޚިދުމަތްތައް އިތުރަށް ފުޅާކުރާނެ ކަމަށް ހޮސްޕިޓަލުން ބުނޭ
ޓްރީ ޓޮޕް ހޮސްޕިޓަލުން އަންހެނުންނަށާއި ކުޑަކުދިންނަށް ޚާއްސަ ސިއްހީ ހިދުމަތް ފޯރުކޮށްދޭ ސެންޓަރެއް ހުޅުވައިފިއެވެ.
ޓްރީ ޓޮޕް ހޮސްޕިޓަލުގެ އޮބްސްޓެޓްރިކްސް، ޕީޑިއެޓްރިކްސް އަދި ގައިނަކޮލޮޖީ ޑިޕާޓްމަންޓްތަކުގެ ފަރާތުން ތައާރަފް ކުރި އަންހެނުންނަށާއި ކުޑަކުދިންނަށް ޚާއްސަ ސިއްހީ ޚިދުމަތް ފޯރުކޮށްދޭ ސެންޓަރު ގާއިމްކޮށްފައިވަނީ ހޮސްޕިޓަލުގެ 3 ވަނަ ފަންގިފިލާގައެވެ. އަންހެނުންނަށާއި ކުޑަކުދިންނަށް ޚާއްސަ ސިއްހީ ސެންޓަރުގެ ޚިދުމަތް ފުޅާކޮށްފައި ވާއިރު ޓްރީ ޓޮޕް ހޮސްޕިޓަލުގެ އޮބްސްޓެޓްރިކްސް، ޕީޑިއެޓްރިކްސް އަދި ގައިނަކޮލޮޖީގެ ޚިދުމަތްތަކަށް ބޮޑު ތަރުހީބެއް ލިބޭ ކަމަށް އެ ހޮސްޕިޓަލުން ބުނެއެވެ.
އަންހެނުންނާއި ކުޑަކުދިންނަށް ޚާއްސަ ސިއްހީ ޚިދުމަތް ފޯރުކޮށްދޭ ސެންޓަރުގައި 13 ކޮންސަލްޓޭޝަން ރޫމް، ޚިދުމަތަށް ޚާއްސަ ވައިޓަލްސް ބަލާ ކޮޓަރި، ބޭބީ ނާސަރީ، ބްރެސްޓް ފީޑިން އަދި ބޭބީ ޗޭންޗިންގް ކޮޓަރި، އަލްޓްރާސައުންޑު ޚިދުމަތްދޭ ކޮޓަރި، އަދި ފޮޓޯތެރަޕީ ޔުނިޓް ހިމެނެއެވެ. އަދި މި ސެންޓަރުގެ އެންމަ އިސް ދައުރަކީ އެއްތަނަކުން ފަސޭހަކަމާއެކު މިހުރިހާ ޚިދުމަތެއް ފޯރުކޮށްދިނުން ކަމަށް ޓްރީ ޓޮޕް ހޮސްޕިޓަލުން ބުނެއެވެ.
އަންހެނުންނާއި ކުޑަކުދިންނަށް ޚާއްސަ ސެންޓަރުން ކުރިމަގުގައި އައި.ޔޫ.އައި ނުވަތަ އިންޓަރ ޔުޓެރިން އިންސެމިނޭޝަން އަދި އައި.ވީ.އެފް ނުވަތަ އިންވީޓްރޯ ފާޓިލައިޒޭޝަންގެ ޚިދުމަތްތައް ވެސް ތައާރަފް ކުރުމަކީ ހޮސްޕިޓަލްގެ އަމާޒެކެވެ.
ޓްރީ ޓޮޕް ހޮސްޕިޓަލަކީ ރާއްޖޭގެ ގިނަ ބައެއްގެ އިތުބާރު ހޯދައިފައިވާ، ޒަމާނީ ފެންވަރަށް ސިއްހީ ޚިދުމަތް ފޯރުކޮށްދެމުން އަންނަ އެއް ހޮސްޕިޓަލެވެ. އެގޮތުން މިހާރުވެސް އެ ހޮސްޕިޓަލުން އަންނަނީ އެންމެ ފަހުގެ ވަސީލަތްތަކާއެކު އާ ޚިދުމަތްތައް ތައާރަފުކުރަމުންނެވެ.
