ފާއިތުވި 24 ގަޑިއިރުތެރޭ ކޮވިޑަށް ޕޮޒިޓިވްވި 111 މީހުންނާއެކު، ޖުމްލަ އަދަދު 86،000ން މައްޗަށް
16 އޮކްޓޯބަރު 2021 | ހޮނިހިރު 17:27މާލެ ސަރަހައްދުން ޕޮޒިޓިވްވެފައިވަނީ 13 މީހުން
ކޮވިޑްއަށް ޓެސްޓު ކުރުމަށް ސާމްޕަލް ނެގުން
ފާއިތުވި 24 ގަޑިއިރުތެރޭގައި ރާއްޖެއިން ކޮވިޑް-19ށް 111 މީހުން ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނީ 4614 ސާމްޕަލްގެ ތެރެއިން 111 ސާމްޕަލް ޕޮޒިޓިވްވެފައިވާކަމަށެވެ. މީގެތެރެއިން މާލެ ސަރަހައްދުން ޕޮޒިޓިވްވެފައިވަނީ 13 މީހުންނެވެ. އަތޮޅުތަކުން 84 މީހުން ޕޮޒިޓިވްވެފައިވާއިރު ހިނގަމުންދާ ރިސޯޓްތަކުން 14 މީހަކު ވަނީ ކޮވިޑަށް ޕޮޒިޓިވްވެފައެވެ.
މިއާއެކު ރާއްޖެއިން ކޮވިޑް-19ށް ޕޮޒިޓިވްވި މީހުންގެ ޖުމްލަ އަދަދު ވަނީ 86،088ށް އަރާފައެވެ. މީގެތެރެއިން މިވަގުތު އެކްޓިވް ކޭހުގެ އަދަދަކީ 1251 އެވެ. އަދި 17 މީހަކަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ.
ރާއްޖޭގައި ކޮވިޑް-19 ޖެހުނު މީހުންގެ ތެރެއިން 84،587 މީހުން ވަނީ ބަލިން ރަނގަޅުވެފައެވެ. އަދި 237 މީހަކު ވަނީ މިބަލީގައި ނިޔާވެފައެވެ.
ރާއްޖޭގައި މިހާރު ކޮވިޑް-19 ވަނީ ވަރަށް ބޮޑަށް ކޮންޓްރޯލްކުރެވިފައެވެ. އެއާއެކު ކޮވިޑް ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކަށްވެސް ވަނީ ލުއިތައް ދީފައެވެ. ނަމަވެސް އަދިވެސް ބަލި ފެތުރުން ކޮންޓްރޯލުކުރުމަށް އަޅަންޖެހޭ ފިޔަވަޅުތަކަށް ސަމާލުވުމަށް ކަމާބެހޭ ފަރާތްތަކުން އަންނަނީ އިލްތިމާސްކުރަމުންނެވެ. އަދި ކޮވިޑުން ދިފާއުވުމަށް ޖަހަންޖެހޭ ވެކްސިން ޖެހުމަށް އަންނަނީ އިލްތިމާސްކުރަމުންނެވެ.
