މަހުމޫދުގެ މަރު: ބިދޭސީއަކު ފުލުހުންގެ ބެލުމުގެ ދަށަށް
16 އޮކްޓޯބަރު 2021 | ހޮނިހިރު 10:23އޭނާއަށް ވަރަށް ބޮޑަށް އަނިޔާކޮށްފައިވާ ކަމުގެ ނިޝާންތައް ހަށިގަނޑުގެ ބޭރުފުށުން ފެންނަން ހުރި
އދ. ދަނގެތި
އދ. ދަނގެތީގެ ވިޔަފާރިވެރިޔާ މަހުމޫދު އަބޫބަކުރުގެ މަރުގެ މައްސަލާގައި ފުލުހުންގެ ބެލުމުގެ ދަށަށް ބދޭސީއަކު ގެންގޮސްފިއެވެ.
ފުލުހުން ބުނީ މަހުމޫދު މަރާލި މައްސަލާގައި ތުހުމަތުގައި ބިދޭސީ ފިރިހެނަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. މައުލޫމާތު ލިބިފައިވާ ގޮތުގައި އެ ބިދޭސީއަކީ މަހުމޫދުގެ ހަށިގަނޑު ފެނުނު ގެޔާއި ޖެހިގެން ހުރި ގެއެއްގައި އުމުރުން ދުވަސްވީ މީހަކު ބަލަން ހުންނަ މީހެކެވެ.
އޮކްޓޫބަރު މަހުގެ 14 ވީ ބުރާސްފަތި ދުވަހުގެ މެންދުރުފަހުގެ ވަގުތެއްގައި 57 އަހަރުގެ މަހުމޫދު ގެއްލިގެން ހޯދަނިކޮށް ފެނުނީ ބޮލަށާއި، ފަޔަށް ގޯއްޏެއް ލައްވައި، ވަޅެއްގައި އެކޮޅުކޮޅުން އެލުވާފައިވަނިކޮށެވެ. އޭނާއަށް ވަރަށް ބޮޑަށް އަނިޔާކޮށްފައިވާ ކަމުގެ ނިޝާންތައް ހަށިގަނޑުގެ ބޭރުފުށުން ފެންނަން ހުރި ކަމަށް މަންޒަރު ދުށް މީހުން ބުނެއެވެ. އަދި ވަޅުން ނެގި ވަގުތު ވަރަށް ގިނަ ލޭ ފޭބި އެވެ.
މިމަރާ ގުޅިގެން ތަހުގީގު ކުރިއަށްދާއިރު، ގިނަ އަދަދެއްގެ ފުލުހުން ދަނީ އެރަށުގައި ހަރަކާތްތެރިވަމުންނެވެ.
ރާއްޖެއެމްވީއަށް މައުލޫމާތު ލިބޭ ގޮތުގައި މަހުމޫދުގެ ހަށިގަނޑު ފެނުނު ގެއާ ކައިރި ހިސާބުގެ ގެތައް ބަލައި ފާސްކުރުމުގެ މަސައްކަތްތައް ފުލުހުން ކުރަމުންދެއެވެ. އަދި މުޅި ސަރަހައްދު ވަނީ އާއްމުންނަށް ނުވަދެވޭނެ ގޮތަށް ބަންދުކޮށްފައެވެ.
މަހުމޫދުގެ މަރުގެ މައްސަލާގައި އެރަށުގެ ރައްޔިތުން އެންމެ ފުރަތަމަ ދެމީހަކަށް ތުހުމަތު ކުރިއެވެ. އެ ދެމީހުން ވެސް ތިބީ ފުލުހުން ބަންދުގައެވެ.
