ވިލާގަނޑުގައި ގަޑިއަކު 50 މޭލަށް ވައިގަދަވާނެކަމަށް ލަފާކޮށް މުޅި ރާއްޖެއަށް ޔެލޯ އެލަރޓް ނެރެފި
15 އޮކްޓޯބަރު 2021 | ހުކުރު 20:23މުޅި ރާއްޖެއަށް ޔެލޯ އެލަރޓް ނެރެފައިވަނީ ހުކުރު ދުވަހުގެ ރޭ މެންދަމު 12:30ން ފެށިގެން ހޮނިހިރު ދުވަހުގެ ހެނދުނު 8:30 އާ ހަމައަށް
ކަނޑުގަދަ ދުވަހެއްގައި ދަތުރުކުރަނީ
ވިލާގަނޑުގައި ގަޑިއަކު 50 މޭލަށް ވައިގަދަވާނެކަމަށް ލަފާކޮށް މުޅި ރާއްޖެއަށް ޔެލޯ އެލަރޓް ނެރެފިއެވެ.
މޫސުމާއި ބެހޭ ގައުމީ އިދާރާއިން މުޅި ރާއްޖެއަށް ޔެލޯ އެލަރޓް ނެރެފައިވަނީ ހުކުރު ދުވަހުގެ ރޭ މެންދަމު 12:30ން ފެށިގެން ހޮނިހިރު ދުވަހުގެ ހެނދުނު 8:30 އާ ހަމައަށެވެ. މެޓް އޮފީހުން ބުނީ މިގަޑިތަކުގައި ގަޑިއަކު 25 މޭލާއި 30 މޭލާ ދެމެދުގައި ވައިޖެހޭނެކަމަށް ލަފާކުރެވޭކަމަށެވެ. އަދި ކަނޑުތައް ގަދަވާނެކަމަށް ލަފާކުރެވޭކަމަށްވެސް މެޓް އޮފީހުން ބުނެއެވެ.
މީގެއިތުރުން މެޓް އޮފީހުން ބުނީ ހޮނިހިރު ދުވަހުގެ ހެނދުނު 10 ޖެހުމާ ހަަމައަށް ހުޅަނގާއި ހުޅަނގުއުތުރުން ގަޑިއަކު 17 މޭލާއި 27 މޭލާ ދެމެދުގެ ބާރު މިނުގައި ވައި ޖެހޭނެކަމަށާއި ވިލާގަނޑުގައި ގަޑިއަކު ގާތްގަނޑަކަށް 45 މޭލަށް ވައި ގަދަ ވުން އެކަށީގެންވާކަމަށެވެ. އާންމު ގޮތެއްގައި ކަނޑުތައް ގަދަވާނެކަމަށާއި ރާޅުގެ އުސްމިން ހުންނާނެކަމަށް ބެލެވެނީ 5 ފޫޓާއި 8 ފޫޓާ ދެމެދުގައިކަމަށް މެޓް އޮފީހުން ބުނެއެވެ.
ދިޔަވަރު ބޮޑުވާ ވަގުތު އުދައިގެ އަސަރުކުރުން އެކަށީގެންވާކަމަށް ވެސް މެޓް އޮފީހުން ބުނެއެވެ.
