ދަނޑުވެރިކަމުގެ ސިނާއަތަށް ޒުވާނުން ނެރުން މުހިންމު ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ދަނޑުވެރިކަމުގެ ދުވަހާއި ދުނިޔޭގެ ކާބޯތަކެތީގެ ދުވަސް ފާހަގަކުުރުމަށް ހުކުރު ދުވަހުގެ ރޭ ތ. ކަނޑޫދޫގައި ބޭއްވި ޚާއްސަ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ސިނާއީ ފެންވަރެއްގައި ދަނޑުވެރިކަން ކުރާނެ ޒުވާނުން އުފެދިގެން ދިޔުމަކީ ސަރުކާރުގެ އުންމީދު ކަމަށާއި ސަރުކާރުން އެކަމަށް ބޭނުންވާ މަގު ފަހިކޮށްދޭނެ ކަމަށެވެ.
ރިސޯޓުތަކުން ބޭނުންވަނީ ތަކެތި މެދުނުކެނޑި ލިބޭނެ ކަމުގެ ޔަގީންކަން ކަމަށާއި ދަނޑުވެރިން ވެސް ބޭނުންވަނީ ހައްދާ ތަކެތި ވިއްކޭނެ ކަމުގެ ޔަގީންކަމަށްވާއިރު ސަޕްލައި ލިބޭނެކަމުގެ ޔަގީންކަން ސަރުކާރުން ފޯރުކޮށްދޭނެ ކަމަށް ރައީސް ވަނީ ވިދާޅުވެފައެވެ. ދަނޑުވެރިކަން ހިއްސާ ކުރަނީ ރާއްޖޭގެ ޖީޑީޕީގެ 1.6 އިންސައްތަކަން ފާހަގަކުރައްވާ ރައީސް ވިދާޅުވީ ރާއްޖޭގައި ދަނޑުވެރިކަން ފުޅާ ދާއިރާއެއްގައި ކުރެވޭނެ ކަމަށެވެ. އެގޮތުން ރާއްޖޭގައި މާކެޓް އެބައޮތް ކަމަށެވެ.
ރައީސް އިތުރަށް ވިދާޅުވީ ކޮވިޑާއި ގުޅިގެން ތަޖުރިބާގެ އަލީގައި ކަންތައްތަކެއް ދަސްވި ކަމަށާއި މޫސުމަށް އަންނަ ބަދަލުތަކުން ރައްޔިތުންގެ ދިިރިއުޅުމަށް ބޮޑެތި ބަދަލުތައް ގެންނަން ޖެހިފައިވާ ކަމަށެވެ. ކާބޯތަކެތީގެ ސަލާމާތާއި ރައްކާތެރިކަން ކަށަވަރުކޮށްދޭން ޖެހޭ ކަމަށާއި ދަނޑުވެރިންނަށް ދިމާވާ ވަރަށް ބޮޑެތި ގޮންޖެހުންތައް އެބަހުރިކަމަށް ވެސް ރައީސް ފާހަގަކުރެއްވިއެވެ. އެގޮތުން ދަނޑުވެރިންނަށް ކުރިމަތިވާ އެންމެ ބޮޑު ގޮންޖެހުމަކީ ދިގު މުއްދަތަކަށް ބިން ނުލިބުން ކަމަށް ވެސް ވިދާޅުވިއެވެ. ދަނޑުވެރިކަން ބޮޑަށް ކުރަމުން އަންނަނީ މީހުން ދިރިއުޅޭ ރަށްރަށުގައި ކަމަށްވާއިރު ކައުންސިލްތަކާއި ވާހަކަދައްކައިގެން ފަސޭހައިން ބިން ލިބޭނެ އިންތިޒާމު ހަމަޖެއްސުމުގެ މަސައްކަތް ކުރައްވާނެ ކަމަށް ވިދާޅުވިއެވެ.
ދަނޑުވެރިން ހިއްސާކޮށްފައިވާ ބައެއް ކަންބޮޑުވުންތަކަށް ބަލާއިރު ތާޒާ ކަންމަތީގައި އުފައްދާ ތަކެތި ބާޒާރަށް ނެރުމާއި ހަމަ އަގު ނުލިބުމާއި ޓެކްނޮލޮޖީގެ ވަސީލަތައް ދަނޑުވެރިންނާއި ހަމައަށް ފޯރުކޮށް ނުދެވޭ ކަމަށް ރައީސް ވިދާޅުވިއެވެ. ވިސްނުމަކީ ރާއްޖޭގައި އުފައްދާ ބާވަތްތައް ރާއްޖޭގައި ބޭނުންވާ ވަރަށް އުފެއްދޭނެ ޕްލޭނަކާއެކު ކުރިއަށް ގެންދިޔުމާއި އެފަދަ ބާވަތްތައް އެތެރެ ކުރާ ގައުމުތަކުން އިމްޕޯޓް ޑިއުޓީ ބޮޑުކުރުން ކަމަށް ރައީސް ވިދާޅުވިއެވެ. ލޯނު ލިބުމުގެ ދަތިކަން ދަނޑުވެރިންނަށް ހުރިިއިރު ލޯނުތަކަށް ވާސިލްވެވޭނެ ގޮތްތައް މިނިސްޓްރީ ހަމަޖައްސާނެ ކަމަށް ވެސް ވިދާޅުވިއެވެ.
ތަކެތި ހެއްދުމުގައި ބޭނުންކުރާ ކެމިކަލް ކާނާ ބޭނުން ނުކުރުމަށް ރައީސް ވަނީ އިލްތިމާސް ކުރައްވާފައެވެ. އަދި މިކަމުގެ ބައެއް ބަލިތަކަށް ފުރުސަތު ބޮޑުވެގެންދާކަމަށް ބެލެވިފައިވާ ކަމަށާއި އެކަންތައްތައް އިތުރަށް ދިރާސާ ކުރުމުގެ މަސައްކަތް ގައުމީ ޔުނިވަރސިޓީއާއެކު ކުރަމުންދާ ކަމަށް ރައީސް ވިދާޅުވިއެވެ. އޯގަނިކް ފާމިންގ އަށް ސަމާލުކަން ދިނުމަށް ރައީސް ވަނީ ބާރު އަޅުއްވާފައެވެ.
މީގެ ކުރިން ވެސް ތ. ކަނޑޫދޫއަށް ވަޑައިގެންނެވިކަން ފާހަގަކުރައްވާ ރައީސް ވިދާޅުވީ އޭރު ދަނޑުވެރިން ހިއްސާކުރި އެއް ކަމަކީ ދަނޑުތަކަށް ފަސޭހައިން ކަރަންޓާއި ފެން ލިބޭނެ ގޮތް ނެތުން ކަމަށެވެ. އެގޮތުން ދަނޑުތަކަށް ފަސޭހައިން ކަރަންޓާއި ފެން ލިބޭނެ އިންތިޒާމު ހަމަޖެއްސުމަށް ކަނޑޫދޫ ރައްޔިތުން އެދުނު ކަމަށާއި އެ މަޝްރޫއު ވަރަށް އަވަހަށް ނިމި، ރައްޔިތުންގެ އެ އުންމީދު ހާސިލްވެގެންދާނެ ކަމަށް ރައީސް ވިދާޅުވިއެވެ.
ކާނޑޫދޫ މިރުހުގެ ޑިމާންޑް މިހާރު ބޮޑުވެފައިވާއިރު މިރުސް ބްރޭންޑް ކުރެވި ބާޒާރަށް ނެރެމުންދާ ކަމަށް ވެސް ރައީސް ފާހަގަކުރެއްވިއެވެ. ރާއްޖޭގައި ބޭނުންވާ ވަރަށް ދަނޑުވެރިކުމުގެ ބާވަތްތައް އުފެއްދުމަކީ ސަރުކާރުގެ އަމާޒެއްކަަމަށް ވެސް ވިދާޅުވިއެވެ.
