މޮމްސް ޖަމްއިއްޔާއިން އިންތިޒާމްކޮށްގެން ކުރިއަށްގެންދާ "ސުޕަރ ކިޑްސް ޗެލެންޖް"، ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު، އިފްތިތާހް ކޮށްދެއްވައިފިއެވެ.

މި ހަފްލާ ކުރިއަށްގެންގޮސްފައިވަނީ ބުދަ ދުވަހު މެންދުރުފަހު މާގިރި ހޮޓަލުގައެވެ.

"ސުޕަރ ކިޑްސް ޗެލެންޖް" އަކީ ކުޑަކުދިން އެކުދިންގެ މައިންބަފައިން ނުވަތަ އެކުދިން ބަލަހައްޓާ ފަރާތްތަކާއެކު އުނގެނުމަށާއި، މަޖާ ވަގުތުކޮޅެއް ހޭދަކުރުމަށް އަމާޒުކޮށްގެން ރާވާފައިވާ ސިލްސިލާ ހަރަކާތްތަކެކެވެ.

މި ހަފްލާގައި ފަޒްނާ ވަނީ މޮމްސް ޖަމްއިއްޔާއިން ހާސިލުކުރުމަށް ކަނޑައަޅާފައިވާ މަޤްޞަދުތަކުގެ ތެރޭގައި، ގައުމީ ފެންވަރެއްގައި އެންމެ ބޮޑަށް މަސައްކަތްކުރަމުންދާ 3 ކަމެއްކަމުގައިވާ އަންހެނުން ބާރުވެރިކުރުވުމާއި، އަންހެނުންނާއި ކުޑަކުދިންގެ ނަފްސާނީ ދުޅަހެޔޮކަމަށް މަސައްކަތްކުރުން އަދި ކުޑަކުދިންނަށް ކުރާ އަނިޔާއާއި އަންހެނުންނަށް ކުރާ ޖިންސީ އަނިޔާއާ ދެކޮޅަށް އަޑު އުފުލުން ހިމެނޭކަން ފާހަގަކުރައްވާފައެވެ. އަދި އެކަމަނާ ވަނީ އަންހެނުން ބާރުވެރިކުރުވައި އަންހެނުންގެ ދިރިއުޅުން ފަސޭހަކުރުމަށް މޮމްސް ޖަމްއިއްޔާއިން ކުރަމުންދާ މަސައްކަތްތަކަށް އަލިއަޅުއްވާލެއްވިއެވެ.

ކޮވިޑް-19ގެ ލޮކްޑައުންއާއެކުގެ ކުޑަކުދިން ފޫހިވިޔަނުދީ ތިބުމަށް ނިމިދިޔަ ރަމަޟާން މަހު ސުޕަރ ކިޑްސް ޗެލެންޖްގެ ފުރަތަމަ ޕްރޮގްރާމް ކުރިއަށްގެންގޮސްފައިވާތީ އެކަމަށް ތައުރީފް ކުރައްވައި ފަޒްނާ ވިދާޅުވީ އޯގާތެރިކަމާއި، ލޯބިވުމާއި، އެހެން މީހުންގެ އިހްސާތަކަށް އިހްތިރާމްކުރުމަކީ ކުޑަކުދިންގެ ގައިގައި ހުރުން މުހިންމު ސިފަތަކެއް ކަމަށެވެ. އަދި އެ ޕްރޮގްރާމުގައި އޯގާތެރިކަމުގެ ސިފަ އަށަގެންނެވުމަށް ހަރަކާތްތަކެއް ހިމަނާފައިވާތީ އެކަމަށް ތައުރީފްކުރެއްވިއެވެ. މި ޕްރޮގްރާމުގައި ހިމެނޭ ކަންކަން ފުރިހަމަކުރުމަށް ކުދިންނަށް ބޮޑަށް ފުރުސަތުދީގެން ބެލެނިވެރިން އެހީތެރިންގެ ދައުރުއަދާކުރުމަށް އެކަމަނާ ވަނީ ބާރުއަޅުއްވާފައެވެ.

ފަޒްނާ ވިދާޅުވީ ކުދިންނަށް ހަވާލުކުރާ މަސައްކަތްތަކާއި، ހުސްވަގުތު ދިނުމުގައި ބެލެންސް ކުރުން ވަރަށް މުހިންމު ކަމަށެވެ. މިކަމުގެ ސަބަބުން ކުދިންގެ ހުސްވަގުތުގައި އެކުދިންނަށް އެދުވަހު ހިނގިކަންކަމާމެދު ވިސްނާލުމަށް ފުރުސަތު ލިބި، އެކުދިންގެ މުސްތަގުބަލާމެދު ވިސްނުމަށް މަގުފަހިވެގެންދާނެ ކަމަށް ފަޒްނާ ވިދާޅުވިއެވެ. އަދި ކުދިންގެ ހުސްވަގުތުތައް ފުރާނެ ގޮތްތައް ރޭވުމުގައި އެކުދިންނާ އެކު ވަގުތު ހޭދަކުރުމަށް ފަޒްނާ ވަނީ އެދިލައްވާފައެވެ.

މީގެ އިތުރުން އެކަމަނާ މުދައްރިސްކަން ކުރެއްވި ދުވަސްވަރުގެ ކަންކަމާއި، އަދި މަންމައެއްގެ ދައުރު އަދާކުރައްވާ ފަރާތެއްގެ ހައިސިއްޔަތުން މި ހަފްލާގައި ވަނީ ބައެއްކަންކަން ހިއްސާކުރައްވާފައެވެ.

މޮމްސް ޖަމްޢިއްޔާއަކީ 2016 ވަނަ އަހަރު އުފައްދާފައިވާ ޖަމްއިއްޔާއެކެވެ. މި ޖަމްއިއްޔާއަކީ މިވަގުތު ރާއްޖޭގައި އެންމެ ގިނަ އަންހެނުންނަށާއި ކުޑަކުދިންނަށް އެހީތެރިކަން ފޯރުކޮށްދޭ ޖަމްއިއްޔާއެވެ. މި ޖަމްއިއްޔާގައި 100 ރަށުން ޖުމްލަ 37،000 މެންބަރުން ތިބެއެވެ.