ވީއައި.ޕީންނަށް ދޭ ސެކިއުރިޓީ ޚިދުމަތްތައް ވިލަރެސް ކުރުމުގައި ފަންނީ އެހީތެރިކަން ފޯރުކޮށްދިނުމަށް އެމެރިކާގެ ކޮންސަލްޓެންޓަކު ރާއްޖެ ގެނެސްފިއެވެ.
ޑިފެންސް މިނިސްޓްރީން ބުނީ ރާއްޖޭގައި ވީއައިޕީއިންނަށް ދޭ ސެކިއުރިޓީ ހިދުމަތްތައް ވިލަރެސް ކުރުމުގައި ފަންނީ އެހީތެރިކަން ހޯދުމަށް ގެނެސްފައި ވަނީ ސެކިއުރިޓީ ކޮންސަލްޓަންޓް ޝީމަސް މިއުލާ ކަމުގައެވެ. ޑިފެންސް މިނިސްޓަރު މާރިޔާ އަހުމަދު ދީދީ ވަނީ ޝީމަސް މިއުލާ އާ ބައްދަލުކުރައްވާފައެެވެ.
ދައުލަތުގެ އިސްވެރިންނަށް ސެކިއުރިޓީގެ ކަންކަން ހަމަޖައްސަމުން ގެންދަނީ އެމްއެންޑީއެފްގެ ސްޕެޝަލް ޕްރޮޓެކްޝަން ގްރޫޕް (އެސްޕީޖީ)ން ނެވެ.
ރާއްޖެއަށް ސެކިއުރިޓީ ކޮންސަލްޓެންޓަކު ގެނެސްފައި މިވަނީ މި އަހަރުގެ މެއި މަހުގެ ހަ ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ހަމަލާ ދިން އިރު އެ މަނިކުފާނުގެ ސެކިއުރިޓީއާ ދޭތެރޭ ސުވާލުއުފައްދާ ވާހަކަދައްކާފައި ވަނިކޮށެވެ.
އެމަނިކުފާނުގެ ސެކިޔުރިޓީ ފެއިލްވި ގޮތުގެ އިންކުއަރީ ކުރިޔަށް ގެންދިޔަ ރައްޔިތުންގެ މަޖިލީހުގެ 241 ކޮމިޓީން އެކުލަވާލި ރިޕޯޓުގައި ބުނެފައިވަނީ ރައީސް ނަޝީދަކީ ތްރެޓް ލެވެލް ހައި ބޭފުޅެއްކަން އެނގޭއިރު ތްރެޓް ލެވެލް އޮތް މިންވަރާއި އަޅާބަލާއިރު ސެކިޔުރިޓީ ފޯރުކޮށްދިނުމުގައި ކަންބޮޑުވާކަންތައްތަކެއް ހުރިކަމަށެވެ. މިރިޕޯޓްގައި 45 ރިކޮމެންޑޭޝަނެއް ކަމާބެހޭ ފަރާތްތަކަށް ވަނީ ހުށަހަޅާފައެވެ.
