ކިނޮޅަހު ބަނދަރަށް ވަދެ ނުކުމެވޭވަރަށް ފުންކޮށްފި
12 އޮކްޓޯބަރު 2021 | އަންގާރަ 13:27މަސައްކަތް ކުރިއަށްގެންދާނީ އަރޖެންޓް މަސައްކަތެއްގެ ގޮތުގައި
ކިނޮޅަހު ބަނދަރު
ރ. ކިނޮޅަހު ބަނދަރަށް އުޅަނދުފަހަރަށް ވަދެ ނިކުމެވޭ ވަރަށް ބަނދަރު ފުންކޮށްފިއެވެ.
ރ. ކިނޮޅަހުގެ ބަނދަރުގެ ބޮޑު ބަޔަކަށް ވެލި އަރާފައިވާ މައްސަލަ ފެންމަތިވުމާއެކު މި މައްސަލަ ހައްލުކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ޓީމަކުން ގެންދަނީ އެ ރަށުގައި ހަރަކާތްތެރިވަމުންނެވެ. އެގޮތުން މިމަހުގެ 10 ވަނަ ދުވަހު އެމްޓީސީސީން ވަނީ ޕްރޮޖެކްޓު ސައިޓް މޮބިލައިޒްކޮށް، ބަނދަރަށް އެޅުނު ވެލިތައް ނެގުމުގެ މަސައްކަތް ފަށާފައެވެ.
މި މަސައްކަތާއި ގުޅިގެން އެމްޓީސީސީން ބުނީ ކިނޮޅަހު ބަނދަރަށް އުޅަނދު ފަހަރަށް ވަދެ ނުކުމެވޭ ވަރަށް ނެރު ފުންކުރުމުގެ މަސައްކަތް މިހާރު ކުރެވިފައިވާ ކަމަށެވެ. އަދިވެސް ބަނދަރު ފުންކުރުމުގެ މަސައްކަތް ކުރިއަށްދާ ކަމަށް އެމްޓީސީސީން ވަނީ ބުނެފައެވެ.
ކިނޮޅަހު ބަނދަރުގެ މަސައްކަތް މޮބިލައިޒް ކުރުމަށްފަހު އެމްޓީސީސީން ބުނީ ބަނދަރަށް ވެލި އެޅުމުގެ މައްސަލަ ހައްލުކުރުމުގެ މަސައްކަތް ކުރިއަށްގެންދާނީ އަރޖެންޓް މަސައްކަތެއްގެ ގޮތުގައި ކަމަށެވެ.
ކިނޮޅަހު ބަނދަރަށް ވެލި އެޅުމުގެ މައްސަލައަކީ އަބަދުވެސް ދިމާވާ މައްސަލައެކެވެ. މިކަން ސަރުކާރުގެ ސަމާލުކަމަށް ގެންނަން ގިނަ މަސައްކަތްތަކެއް ކޮށްފައިވާކަމަށް އެ ރަށު ކައުންސިލުން ވަނީ ބުނެފައެވެ. ކިނޮޅަހުގެ އުތުރު ފަރާތުގައި ބަނދަރު ހަދާފައި ވަނީ 2010 ވަނަ އަހަރުއެވެ. މި ބަނދަރު ހެދީ އެ ރަށުގެ އުތުރު ފަރާތުގައި އޮންނަ ބޮޑު ދޮންވެލިގަނޑުން ބައެއް ނެގުމަށް ފަހު، ބަނދަރާއި ދޮންވެލިގަނޑު ވަކިކުރުމަށްޓަކައި, އެ ދެމެދުގައި އިންފާރެއްގެ ގޮތުގައި ހިލަ ޖެހުމަށް ފަހުގައެވެ. އެކަމަކު އޭގެ އަހަރެއްހާ ދުވަސް ފަހުން އެ އިންފާރު ހަލާކުވެ، ފަޅަށް ވެލި ވަންނަން ފެށިކަމަށް ކައުންސިލުން ބުނެއެވެ. އެހެންކަމުން 2012 ވަނަ އަހަރު ފެށިގެން މި މައްސަލަ ހައްލުކޮށްދޭން އެ ރަށުގެ ކައުންސިލުން ގެންދިޔައީ ސަރުކާރުގައި އެދެމުންނެވެ.
ކިނޮޅަހު ބަނދަރުގެ ބޮޑު ބަޔަކަށް ވެލި އެޅިފައިވާ މަންޒަރު ފެންނަ ފޮޓޯތަކެއް މި ފަހުން ސޯޝަލް މީޑިއާގައި އާންމުވެފައިވާއިރު، ފޮޓޯތަކުން ފެންނަގޮތުން ބޮޑަށް ވެލި އެޅިފައިވަނީ ނެރާ ދިމާލުންނެވެ. އެހެންކަމުން ނެރުން އެތެރެއަށް އޮޑިދޯނިފަހަރަށް ނުވަދެވޭ ވަރު ވަނީ ވެފައެވެ.
