އެޗްއީއޯސީން ވޮލަންޓިއަރުންގެ ދަފްތަރެއް އެކުލަވާލަނީ

ކޮވިޑް-19ގެ މަސައްކަތްތައް ކުރުމަށް އުފައްދާފައިވާ ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ)އިން ވޮލަންޓިއަރުންގެ ދަފްތަރެއް އެކުލަވާލަން ނިންމައިފިއެވެ.

އެޗްއީއޯސީން ބުނީ އެ ސެންޓަރުގެ ދަށުން ގްރޭޓަރ މާލެ ސަރަހައްދުގައި ކުރެވޭ މަސައްކަތުގައި ވޮލަންޓިއަރުންގެ ގޮތުގައި މަސައްކަތް ކުރުމަށް ޝައުގުވެރިވާ މީހުންގެ ދަފުތަރެއް އެކުލަވާލުމަށް ނިންމާފައިވާކަމަށެވެ.

އެޗްއީއޯސީން ބުނީ އެ ސެންޓަރުން އެކުލަވާލާ ދަފުތަރުގައިވާ މީހުންނަށް ތަމްރީނު ޕްރޮގްރާމެއް ހިންގޭނެ ކަމަށެވެ. އަދި ތަމްރީނު ޕްރޮގްރާމް ފުރިހަމަ ކުރާ މީހުންގެ ތެރެއިން އެވަގުތެއްގައި އެ ސެންޓަރުގައި ކުރަންޖެހޭ މަސައްކަތްތަކަށް ރިޔާއަތްކޮށް ވޮލަންޓިއަރުން ނަގަމުންދާނެ ކަމަށް އެޗްއީއޯސީން ބުނެފައިވެއެވެ.

އެހެންކަމުން އެޗްއީއޯސީގައި އަދި އެޗްއީއޯސީގެ ދަށުން ގްރޭޓަރ މާލެ ސަރަހައްދުގައި ކުރެވޭ މަސައްކަތުގައި ވޮލަންޓިއަރުންގެ ގޮތުގައި މަސައްކަތް ކުރުމަށް ޝައުގުވެރިކަން ހުރި މީހުން ރެޖިސްޓްރޭޝަން ފޯމް ފުރިހަމަކުރުމަށް ވަނީ އަންގާފައެވެ.

ރާއްޖެއިން ކޮވިޑް-19ގެ ކޭސްތައް އެންމެ ފުރަތަމަ ފެނުނު ހިސާބުން ސިއްހީ ދާއިރާގައާއި، އެޗްއީއޯސީގެ މަސައްކަތްތަކުގައި ގިނަ އަދަދެއްގެ ވޮލަންޓިއަރުން ގެންދިޔައީ ހަރަކާތްތެރިވަމުންނެވެ. އަދި މިހާރު ކުރިއަށްގެންދާ ވެކްސިނޭޝަން ޕްރޮގްރާމުގައިވެސް ވެކްސިން ޖެހުމުގެ މަސައްކަތުގައި ގިނަ އަދަދެއްގެ ވޮލަންޓއަރުން ހަރަކާތްތެރިވަމުންދާއިރު، ކޮވިޑް ފެސިލިޓީތަކުގައިވެސް ގިނަ އަދަދެއްގެ ވޮލަންޓިއަރުން ހަރަކާތްތެރިވަމުންދެއެވެ.